Aıta ketý kerek, buryn mundaı kúrdeli ota Nur-Sultan qalasynda jasalynyp júrgenimen, jergilikti dárigerler buryn-sońdy mundaı táýekelge baryp kórmegen edi. Baýyr aýrýynyń asqynǵan túrine shaldyqqan naýqastarǵa qazirgi medısınadaǵy sońǵy ádisterdiń biri – jasýshaly terapııanyń jańa baǵytyn qoldanyp em júrgizgen aqtóbelik dárigerler medısınanyń joǵary tehnologııalyq ádisterin meńgere bastaǵandaryn dáleldedi.
Búgin oblys ákimi Ońdasyn Orazalın Medısına ortalyǵyna baryp, otadan shyqqan eki naýqastyń jaǵdaıyn surap kirip shyqty, sodan keıin jasýshaly emdeý tásilderin qoldanyp em júrgizetin dárigerlermen júzdesti. Marat Ospanov atyndaǵy Batys Qazaqstan memlekettik medısına ýnıversıtetiniń professory Samat Saparbaevtyń aıtýynsha, jasýshaly emdeý ádisin baýyr, teri aýrýyna shaldyqqandar men qant dıabetimen naýqastanǵandarǵa da qoldanýǵa bolady.
Ol baýyryna kúrdeli ota jasalǵan eki azamatqa fetaldy gepatosıtter arqyly em júrgizilgenin habarlady. Dárigerlerdiń aıtýynsha, jasýshaly emdeý tásili naýqastardyń otadan keıin aıaqtan tez turýyna sebepshi, ári medısınada tıimdiligi joǵary. Ońdasyn Orazalın emdelńp jatqan azamattardyń tez saýyǵyp ketýlerine tilektestigin bildirip, bilikti dárigerlerdiń qyzmetine sáttilik tiledi.
