Jaqynǵa janashyrlyq tanytatyn sharalardyń bel ortasynda júretin volonterler indet órship turǵan sátte kópten kómegin aıap qalǵan joq. Judyryqtaı jumylyp, birlesken iste bereke baryn dáleldedi. Abdyraǵan eldiń arasynan tabylyp, betperde, antıseptıkalyq quraldar, aýrýdan saqtaný sharalary jazylǵan únparaqtar taratty.
Jastar ortalyǵy janynan ashylǵan áleýmettik dúkenge turǵyndardan jınalǵan vırýsqa qarsy dári-dármekter jetkizildi. Bastapqy kezeńde dárihanalarda tapshy bolǵan parasetamol, S vıtamıni, deksametazon, dısol, natrıı hlorıdi, eýfıllın, taǵy da basqa preparattar qaıyrymdylyq aksııasy aıasynda úlestirildi. Derti janyna batqanymen dárihana aralaýǵa dármeni joq jandarǵa ortalyqtaǵy avtovolonterler dári-dármekti jetkizip berdi. Bul iske oblys ortalyǵynan 20-ǵa jýyq turǵyn atsalysyp, jaqsylyqqa jumyldy. Eriktilerdiń bastamasyna ún qosqan jastar qala men aýdandarda kópbalaly otbasylardyń, jalǵyzilikti analardyń tizimin jasaqtap, olarǵa birinshi kezekte qajetti ónimder taratyldy.
Jastar «Kvant» JShS mekemesinen aýrýhanalarǵa ottegi ballondaryn jetkizýdi de júıeli uıymdastyrdy. Dertke shaldyqqandar qatary kún sanap kóbeıgen tusta oblystyq juqpaly aýrýlar, temir jol, oblystyq ókpe aýrýlary aýrýhanasyna jáne provızorlyq ortalyqtarǵa 60 ballon jetkizilip, eriktiler bir jutym aýaǵa zar bolyp jatqan talaılardyń alǵysyn aldy.
Aýrýdyń beti qaıtqan qazirgi sátte de Syr volonterleri qaıyrymdylyq sharalaryn úzgen joq. Jaqynda ortalyqtaǵy IT parktiń bazasynda turǵyndardan isten shyqqan kompıýterlerdi qabyldaý bastaldy. Mamandar ondaǵy qajetti bólshekterden iske jaramdy kompıýter qurastyryp, kómekke zárý otbasy balalaryna taratady. Qazir jastar 100-ge jýyq kompıýter jınap úlgirdi. Ortalyq janynan bilim ortalyǵy ashylyp, 11-synyp oqýshylary UBT-ǵa tegin daıyndalýǵa múmkindik aldy, olarǵa qaladaǵy mektep muǵalimderi volonterlik negizde qosymsha sabaqtar ótkizedi.
Shilde aıynyń sońynda oblystyq ishki saıasat basqarmasy janynan aımaqtaǵy volonterlerdiń basyn biriktirip, bir tereze qaǵıdaty boıynsha qyzmet kórsetetin «Syr Volonterlary» ortalyǵy ashyldy. Bul jurtqa jaqsylyq jasaýǵa umtylǵan eriktiler qyzmetin úılestirýge yqpal etti.
Jańa oqý jylynyń basynda qınalǵan janǵa qamqorlyq tanytqan sharalar legi taǵy da jalǵasyn tapty. QMDB-nyń Qyzylorda oblysy boıynsha ókildiginiń uıymdastyrýymen «Mektepke jol» respýblıkalyq aksııasy aıasynda 220 oqýshyǵa kómek kórsetildi. Bul isten basqa da demeýshiler syrt qalǵan joq. «Qaýipsiz mektep ortasy» respýblıkalyq aksııasy aıasynda demeýshiler esebinen tamyz aıynyń ortasyna deıin Qyzylorda qalasyndaǵy mektepterde oqıtyn 200-den astam oqýshyǵa kompıýter, planshet, noýtbýk, oqý quraldary jıyntyǵy taratyldy.
Osylaısha Syr boıynda jurtqa jaqsylyq jasaýǵa jumylǵan jandar qatary kún sanap kóbeıip keledi.
Qyzylorda oblysy
