Klınıkalyq synaqtan ótkizýge ruqsat alǵan QazCovid-in® vaksınasyn Ǵylym komıtetiniń Bıologııalyq qaýipsizdik máseleleri ǵylymı-zertteý ınstıtýty ázirledi. Ǵylym komıtetiniń aqparatyna súıensek, otandyq vaksınanyń klınıkalyq synaqtaryna 627 adam qatysýǵa nıet bildirdi. Buǵan deıin atalǵan ınstıtýttyń ǵalymdary ekpeni synaqtan ótkizýge nıetti eriktilerdi izdestirý jumysynyń bastalǵanyn habarlaǵan. Bıologııalyq qaýipsizdik problemalary ǵylymı-zertteý ınstıtýty (BQPǴZI) qazaqstandyq koronavırýs vaksınasynyń klınıkalyq synaqtaryna qatysýǵa eriktiler tartýdy jalǵastyryp jatyr.
BQPǴZI bas dırektory Kúnsulý Zákárııa bul týraly:
«Qujattardy qabyldaý osy jyldyń 10 qyrkúıeginde aıaqtalady. Az ǵana ýaqyttyń ishinde 627 adam biz jasaǵan vaksınany ózderine saldyrýǵa nıet bildirdi. Birinshi kezeńde 44 adamdy, ekinshisinde 200 adamdy tańdaýdy josparlap otyrmyz. Qazaqstandyqtardyń otandyq vaksınaǵa degen senimine, oń kózqaras tanytýyna, jaǵymdy motıvasııasy men patrıotızmine qurmetimiz bólek. Mundaı senim is júzindegi demeý ǵana emes, sonymen qatar biz sııaqty óndirýshi úshin jáne búkil qazaqstandyq ǵylymǵa úlken moraldyq qoldaý bolatyny anyq. 627 adamnyń árqaısysy, tipti olar eriktiler qataryna kirmeı qalsa da (244 adam ǵana erikti bolýǵa tańdalyp alynady, osy tizimge kirmeı qalatyndar jóninde sóz bolyp otyr – A.Sh.), biz úshin batyr deýge bolady. Biz olarǵa barlyq qazaqstandyqtardyń densaýlyǵy men qaýipsizdigin saqtaýǵa qosqan jeke úlesi úshin óte rızamyz», dedi.
Eske sala keteıik, 31 shildede Dúnıejúzilik densaýlyq saqtaý uıymy QazCovid-in® koronavırýsqa qarsy qazaqstandyq ınaktıvtelgen vaksınany klınıkalyq synaqtarǵa jiberilgen kandıdat vaksınalar tizimine engizdi.
Instıtýt dırektory bastaǵan jeti vaksına jasaýshy ǵalym vırýspen jumys kezinde qaýipsizdigin qorǵaý úshin ózderi ázirlegen ekpeni birinshi bolyp saldyrdy. Test nátıjeleri boıynsha vaksına salǵandardyń bárinde vırýsqa qarsy antıdeneler paıda boldy, qyzmetkerlerdiń deni saý jáne ǵylymı-tehnıkalyq baǵdarlama sheńberinde jumystaryn jalǵastyryp jatyr.
