Áleýmettik ortalyq Aqparat jáne qoǵamdyq damý mınıstrliginiń qoldaýymen ashylyp otyr. Dál osyndaı joba elimizdiń 17 qalasynda qolǵa alynǵan. Uıymdastyrýshylardyń habarlaýynsha, ortalyq 7 baǵyt boıynsha «Birgemiz» jalpyulttyq tujyrymdamasy aıasynda jumys isteıdi.
– Qazirgi tańda «Eriktiler lıgasynda» júzge jýyq volonter bar. Bizdegi volonterlerge de kómek qajet. Basty maqsatymyz – jastardyń jańa jobalaryna qoldaý bildirý. Biz aldyn ala tańdap alǵan 7 baǵyt boıynsha jobalardyń júzege asýyna múmkindik beremiz. Jalpy, Volonterler lıgasy osyndaı ortalyqtar arqyly respýblıkamyzda volonterliktiń damýyna úles qospaq. Lıga 2013 jyldan beri jumys istep keledi. Osy jyldar ishinde atqarylǵan ıgi ister jetkilikti. Ortalyǵymyzǵa kez kelgen ıdeıasy bar, qaıyrymdylyqqa jany jaqyn jas kelip jobasyn usyna alady. Iаǵnı kómek surap kelgen bolashaǵy bar jobalar nazardan tys qalmaıtyny anyq, – dedi «Qazaqstan volonterler lıgasynyń» Batys Qazaqstan oblysy boıynsha dırektory Altynbek Bısenov.
Aýqymdy jobalardy júzege asyrýda eriktiler qozǵalysynyń mańyzy zor ekenin atap ótken shahar basshysy Abat Abaıuly:
– Bıylǵy jyldyń eń basty jańalyǵynyń biri – Memleket basshysynyń bul jyldy «Volonter jyly» dep jarııalaýy. Búgingi tańda Oralda 100-den asa eriktiler uıymy, 2 myńǵa jýyq volonter jas bar. «Qazaqstan volonterler lıgasy» shtabynyń bizdiń qalamyzda ashylǵany qýantady. Eline, jerine jany ashıtyn, qoǵamdyq ómirge belsendi atsalysyp, janashyrlyq tanytyp júrgen jastardyń basyn biriktiretin uıymnyń ashylǵany izgi istiń aldaǵy ýaqytta da jalǵasyn tabýyna sebepshi bolmaq. Al mundaı baǵyt-baǵdar berýshi ortalyq qaıyrymdylyq sanyn arttyryp qana qoımaı, elimizde volonterlik mádenıetiniń qalyptasýyna jaqsy jaǵdaı jasamaq. Prezıdent kezekti Joldaýynda da azamattyq qoǵamdy damytý qajettiligin, azamattardyń belsendiligin arttyrý máselesine keńinen toqtaldy. Jastardyń eńbekke qyzyǵýshylyǵyn oıatyp, qaı mamandyqty bolsyn qadirleý qajettigin aıtty. Volonterler pandemııa kezinde de úlken kúsh ekenin dáleldep, alǵy shepte aıanbaı eńbek etti. Osyndaı ortalyqtar azamattyq pozısııasy bar, belsendi jastardyń shoǵyrlanýyna, ıdeıalaryn aıtyp, josparyn bólisetin alańǵa aınalady dep senemin, – dedi.
Lıga volonterlerin óńirdegi jastar uıymdarymen tyǵyz baılanysta jumys isteýge shaqyrǵan oblystyq jastar saıasaty máseleleri basqarmasy basshysynyń mindetin atqarýshy Nurhat Orash ortalyq jumysyna sáttilik tilep, birlesken jumystardyń jemisti bolaryn atap ótti.
Oral qalasynyń volonteri, Lıganyń múshesi Marjan Myrzaǵalıeva ortalyqqa kelip ózi sııaqty dostar tapqanyn, eń mańyzdysy óziniń maqsatyn túsingenin aıtady. «Halqymyz úshin synǵa aınalǵan pandemııa kezinde basqa volonterlermen birge jumys istedik. Dárigerler men polısııalarǵa tamaq tasydyq, muqtaj jandarǵa kóńil bólip, olarǵa azyq-túlik sebetterin jetkizdik. Sol kezde qansha muqtaj otbasynyń baryn kórdik. Olardy kórip, bizdiń kómegimiz qajet ekenin túsindim. Sondyqtan volonterlikti ómirimniń bóligine aınaldyrýdy jón sanadym. Konkýrstarǵa qatysyp, ózimniń jobamdy da usynsam degen josparym bar», dedi erikti.
Jıyn barysynda aldaǵy ýaqytta atalmysh joba aıasynda shaǵyn granttar beriletini belgili boldy. Ortalyq qyzmetkerleriniń aıtýynsha, 300 myń teńgeden bastalatyn barlyǵy 107 grant respýblıka jastarynyń jańa bastamalaryn júzege asyrýǵa mol múmkindik syılamaq.
Shaǵyn granttar konkýrsyna úkimettik emes uıymdar, bastamashy toptar jáne jeke tulǵalar qatysa alady. Tolyq aqparatpen liga.org.kz resmı saıtynda tanysýǵa bolady.
