«Bolashaq» baǵdarlamasy jańa úlgimen irikteıdi

Bilim jáne ǵylym mınıstrligi bas­pasóz qyzmetiniń habarlaýynsha, birinshiden, qujat qabyldaý tolyq avtomattandyrylǵan jáne tek egov.kz por­talynda júzege asyrylady.

Ekinshiden, úmitkerdiń ótetin barlyq irikteý kezeńi sıfrlandyrylǵan. Úmit­kerge jeke kabınetinde biregeı kod beriledi. О́tinish berýshiniń jeke derek­teri biregeı sáıkestendirý júıesi arqyly kodtalady.

Úshinshiden, irikteýdiń I kezeńi – keshendi testileý mazmuny sapalyq tur­ǵydan ózgertildi. 2020 jyldan bas­tap úmitkerlerdiń ózdiginen ótinish be­rýine qoıylatyn negizgi talaptardy eskere otyryp, pándik bilimdi tekserý qajettigi joıyldy. Onlaın formatta ótetin testileý endi verbaldyq, sandyq jáne daǵdylyq-tulǵalyq suraqtardan turady. Sondaı-aq suraqtar úmitkerdiń qysqa merzimde jańa aqparatty óń­deı alý, taldaý, tulǵalyq qabiletin anyq­taýǵa baǵyttalǵan.

Tórtinshiden, onlaın platformada qol­danylatyn proktorıng júıesi úmit­kerlerdiń jumys paraǵyn qaldyryp, kelesi paraqqa ótýine nemese testileý ýaqy­tynda jańa terezeni ashýyna múm­kin­dik bermeıdi. Mundaı jaǵdaıda júıe ony buǵattap, testileý nátıjeleri joıy­lady.

II kezeń – Táýelsiz saraptamalyq komıssııa múshelerimen derbes suhbat ta onlaın ótip jatyr. Suhbat barysynda sarapshylar suraqtaryn úmitkerge jeke kodymen ıdentıfıkasııalaý arqyly ǵana qoıyp (aty-jónin kórmeıdi), naq­ty krıterııler boıynsha birden baǵalaıdy. Sarapshylardyń baǵasyn júıede ǵana kó­rýge bolady. Árbir sarapshy óziniń úmit­kerge qoıǵan jeke baǵasyn ǵana kóre ala­dy.

Konkýrstyq irikteýdiń barlyq kezeńi beıne jáne aýdıo jazbaǵa alynatynyn atap ótý mańyzdy. Demek, onlaın format pen avtomattandyrý júıesi «Bolashaq» halyqaralyq stıpendııasyn taǵaıyndaýǵa konkýrstyq irikteýdiń sapasyn arttyryp qana qoımaı, búkil irikteý júıesin ashyq, qoljetimdi, yńǵaıly ári mobıldi ete alady.

Konkýrstyq irikteýdiń eki kezeńiniń qorytyndysy boıynsha «Bolashaq» halyqaralyq stıpendııasyn taǵaıyndaý týraly sońǵy sheshimdi Shetelde kadrlar daıarlaý jónindegi respýblıkalyq komıssııa qabyldaıdy.

Aıta ketelik, 2020 jylǵy 4-9 qyr­kúıek aralyǵynda konkýrstyq irikteýdiń birinshi legine «magıstratýra» boıynsha 100 úmitker, «doktorantýraǵa» – 9 adam, «taǵylymdamaǵa» – 5 adam, barlyǵy 114 úmitker qatysty.