Saryarqanyń saqyldaǵan sary aıazynda jylýǵa baılanysty ókpe-naz kóp aıtylatyn eldi mekenniń biri – Shýchınsk qalasy. Bıyl "Jumyspen qamtý jol kartasy" baǵdarlamasy aıasynda ortalyq bý qazandyǵyn kúrdeli jóndeýden ótkizý úshin 1 mıllıard teńgeden astam qarjy bólindi. Qazandyqtyń kónergen jabdyqtary jańartylyp, jylý berý maýsymyna deıin tap-tuınaqtaı etip aıaqtalmaq.
Elý myńǵa jeter-jetpes turǵyny bar qaladaǵy ortalyq bý qazandyǵy jylýmen kóp qabatty turǵyn úılerdiń, áleýmettik-turmystyq nysandardyń 70 prosentten astamyn qamtamasyz etedi. Sál shashyrańqy qonystanǵan qalanyń ózge móltek aýdandarynda 6 qazandyq jumys isteıdi. Bul qazandyqtarǵa da jaz aılarynda aǵymdaǵy jóndeý jumystary júrgizildi.
"Memleket tarapynan bólingen qarjyny utymdy paıdalanyp, ár tıynyn shashaý shyǵarmaı, kópten beri kúrdeli jóndeý kórmegen qazandyqty jańartyp aldyq. Birneshe agregattary jańartyldy. Jylý jetkilikti kólemde barýy úshin qala shetindegi móltek aýdandarǵa tartylǵan jylý júıesiniń dıametri ulǵaıtyldy. Sonymen birge qazandyq jumysshylary úshin turmystyq bólmeler salyndy. Qalǵan jumys qyrkúıek aıynyń sońyna deıin tolyq aıaqtalady.", – deıdi "Býrabaı jylý" kásipornynyń dırektory Zeınur Álibekov.
Endigi mańyzdy másele otyn qoryn ýaqytynda jınaqtap alý. Qazirgi kúni 4 aıǵa erkin jetetin mazýt pen kómir qory jasalypty. Aldaǵy ýaqytta arnaıy keste boıynsha qajetti kólem tasymaldanatyn bolady.
Aqkól qalasynda da jylý berý maýsymyna tyńǵylyqty daıyndalý ústinde. Munda "Vostochnyı" shaǵyn aýdanynda jańa jylý qazandyǵy salynyp jatyr. Jobanyń jalpy quny 816789,407 myń teńge. Jergilikti ónim – Shýchınsk qazandyq zaýytynyń synaqtan ótkizilgen qazandyqtary ornatylyp, qalanyń jylý júıesiniń júktemesin edáýir jeńildetetin syńaıly. О́tpeli kezeńde ortalyq jylý júıesinen aǵytylyp tastalǵan turǵyn úıler endi jylýmen qamtylady. Bul jaı turǵyndar úshin óte qolaıly bolatyn túri bar. Aýdan ákimi Alpysbaı Qaıyrjanovtyń aıtýyna qaraǵanda, qazandyqtyń jumysy jylý berý maýsymyna deıin tolyq aıaqtalyp shyqpaq. Qazir qazandyqqa qajetti otyn máselesi sheshilýde. Bul jaqsylyq óńirdegi áleýmettik baǵdarlamalardyń iske asyrylýynyń arqasynda qol jetimdi bolyp otyr.
Qos qaladaǵy kópten beri qordalanyp qalǵan ótkir másele – jylý berý bolatyn. Endi mine memleket tarapynan qoldaýǵa ıe bolǵannan keıin qıyn túıin sheshildi dep aıtýǵa tolyq bolady.
