Jýyrda ǵana áleýmettik jelide qoǵam belsendileri Qasym Qaısenovtiń músini óz esimimen atalatyn saıabaqtyń bir pushpaǵynda qalǵanyn jazyp, másele kóterdi.
– Qazaqtyń Qasymynyń atyndaǵy saıabaqta Kırov tórde, Qasymnyń esikte turǵany eldigimizge syn! Súıekke tańba! Qasym kim, Kırov kim!? Kırov Lenın men Stalınnen artyq emes qoı. Eskertkishin ornynan taıdyryp, sol jaǵalaýdaǵy ıdeıalyq turǵyda eskirgen eskertkishterdiń qataryna baıaǵyda aparyp qoıýǵa bolatyn. Al Qasymǵa úlken eskertkish jasalýy tıis. Ol óle-ólgenshe Shyǵysyn súıip ótti, – deıdi qoǵam belsendisi, «Altaı Asý» qoǵamdyq birlestiginiń teń tóraǵasy Túsiphan Túsipbekov.
Halyq Qaharmanynyń bıýstin kórip qaıtaıyn dep saıabaqqa biz de barǵan edik. Saıabaq ishi jaıqalyp tur. Jaıqalǵan saıabaqtyń qaq ortasynda qolyn kókke sozǵan baıaǵy Kırovtyń músini menmundalaıdy. Ornynda qasqaıyp Qasym Qaısenov tursa qandaı ǵajap?! Egemendi elimizdiń urpaǵy batyr babasyn bilip óser edi. Al balaǵa Kırovty kim dep túsindiremiz?!
Kúzetshige taqap baryp, Qaısenovtiń músini qaıda turǵanyn suradym. Sál tosyrqap qaldy da jol siltedi. Oılanyp qalǵanyna qaraǵanda, kúzetshi de naqty bilmeıtindeı kórindi. Kóz aldynda turmaǵan soń qaıdan bilsin?! Sóıtsem, etnoaýyl jaqtaǵy qorshaýdyń ishinde tur eken. Ishinde bolǵanda da bir qýysynda. Adam aıaǵy basa bermeıtin kóleńkeleý bir burysh.
Qyl aıaǵy belgili partızan jazýshynyń Lıharev qurly quny joq pa edi?! Jýyqta ǵana qalanyń ortasynan Lıharevqa arnalǵan músindi Ertistiń jaǵalaýyna jarqyratyp turyp ornatty. Bar eńbegi – 1700 jyldary qazaqtyń jerine bekinis salǵan deıdi. Al Kırov kim? Qazaq úshin basyn báıgege tigip pe edi? Orys revolıýsıoneri, saıası qaıratker eken. О́mirbaıanynan «Qazaqstan úshin ter tókti» degendeı joldardy tappadyq. Bir baıqaǵanym, Kırov óltirilgennen keıin qyrǵyn repressııa bastalǵan.
«Elý jylda el jańa». Tarıhty tarazylap, ult múddesi úshin kúresken tulǵalardy urpaq aldynda nasıhattaı berýimiz kerek. Músinderin qoıaıyq, esimderin kóshege bereıik. Patrıottyq tárbıe degen sol.
О́skemen
