Konferensııada Memlekettik hatshy Qyrymbek Kósherbaev pen Premer-Mınıstrdiń orynbasary Eraly Toǵjanovtyń konferensııa qatysýshylaryna quttyqtaý hattary oqyldy. Q.Kósherbaevtyń pikirinshe, ozyq IT-tehnologııalardy jedel engize otyryp zamanaýı bilim berýdi odan ári damytý, bilim berý mekemeleriniń qyzmetin tolyq sıfrlandyrý máseleleri, bilim berýdi jańǵyrtý perspektıvalary asa mańyzdy quzyretke aınalýy tıis.
«Bizdiń eń basty mindetimiz – qazirgi zamannyń jahandyq syn-qaterlerin jedel túrde sheshý. Sońǵy oqıǵalardy eskere otyryp bilim berý saıasaty júıesin jańartý bilim berý prosesin sapaly jaqsartýǵa múmkindik beredi. Osyǵan deıingi tájirıbe kórsetkendeı, qashyqtan bilim berý tehnologııalary mańyzdy ról atqarady», delingen Memlekettik hatshynyń hatynda.
Premer-Mınıstrdiń orynbasary Eraly Toǵjanovtyń halyqaralyq jıynǵa qatysýshylarǵa joldaǵan hatynda joǵary sapaly bilim berý, oqytýdyń formaty men mazmunyn jańartý – kezek kúttirmes másele ekeni aıtylǵan.
Halyqaralyq onlaın-konferensııany L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov ashyp, oqytýdyń neǵurlym qolaıly quraldary men tásilderin, tehnologııalaryn izdeýde álemdik pedagogıkalyq praktıkanyń barlyq qalyptasqan qaǵıdalaryn qaıta qarap, jańartý jumystaryn júrgizý keregin atap ótti. Qashyqtan oqytý tehnologııalary bilim berý júıesi úshin eń úlken suranysqa ıe ekenin jetkizdi. Bul óz kezeginde jahandyq prosesterdiń, atap aıtqanda, sıfrlandyrý men aqparattandyrýdyń yqpalyna baılanysty keń aýqymdy jańǵyrtýdy talap etedi.
Konferensııanyń birinshi kúninde Bilim jáne ǵylym vıse-mınıstri Rústem Bıǵarı, Sıfrlyq damý, ınnovasııalar jáne aeroǵarysh ónerkásibi vıse-mınıstri Daryn Tuıaqov, Tomsk memlekettik ýnıversıtetiniń rektory Edýard Galajınskıı, UNINETTUNO halyqaralyq telematıkalyq ýnıversıtetiniń zertteýler jáne ınnovasııalar bóliminiń basshysy Aleksandro Kaforıo, Modern Education & Research Institute dırektory Ekaterına Saranok, «MISıS» ǵylymı-zertteý tehnıkalyq ýnıversıtetiniń onlaın oqytý ortalyǵynyń dırektory Nurlan Qııasov jáne basqa da sarapshylardyń baıandamalary tyńdaldy.
Halyqaralyq konferensııanyń jumysy búgin de jalǵasyp jatyr. Shara baǵdarlamasynda sandyq qashyqtan oqytý qaýymdastyǵyndaǵy úzdik tájirıbelerdi kórsetetin vorkshoptar, vırtýaldy sessııalar josparlanǵan.
