Keńeske QR Parlament Májilisiniń depýtattary, ortalyq memlekettik organdardyń ókilderi, oblys ákimderiniń orynbasarlary, úkimettik emes uıymdardyń jáne qoǵamdyq birlestikterdiń ókilderi, bala quqyqtary jónindegi ýákil qatysty.
"Búgingi kúni Úılestirý keńesiniń músheleriniń 80% jańartylǵan jańa quramynda jınaldy. Alǵash ret Úılestirý keńesiniń 10 múshesi nemese 25%-y ınternet-daýys berý arqyly saılandy. Daýys berýge 22 myńnan astam adam qatysty. Bul tıisti máselege qoǵamnyń zor qyzyǵýshylyǵy baryn taǵy bir márte dáleldedi", dedi Úılestirý keńesiniń otyrysynyń jumysyn ashqan Eraly Toǵjanov.
Vıse-premer Úkimet tarapynan bıyl múgedek jandardy áleýmettik qorǵaýǵa 435 mlrd teńge bólingenin, kelesi jyly qarjylandyrý 457 mlrd teńgege deıin artatynyn atap ótti.
Ortalyq memlekettik organdardyń basshylary "Múgedek adamdardyń ómir súrý sapasyn jaqsartý jáne quqyǵyn qamtamasyz etý jónindegi 2025 jylǵa deıingi Ulttyq jospardyń" iske asyrylý barysy týraly baıandady.
Eńbek jáne halyqty áleýmettik qorǵaý mınıstri Birjan Nurymbetovtyń aıtýynsha, múgedekter úshin kásipti tańdaýdyń shekteýli bolýyna baılanysty, Qazaqstanda alǵash ret BUU DB-men birlesip múmkindikteri shekteýli jandarǵa arnalǵan Kásipter atlasyn ázirleý boıynsha joba júzege asyrylýda. Bul jumys berýshilerge, jumyspen qamtý ortalyqtaryna jáne HR salasyndaǵy jeke agenttikterge shekteý túrine baılanysty adamdarǵa qolaıly bos jumys oryndaryn usynýǵa múmkindik beredi.
Sondaı-aq otyrysta eńbek jáne halyqty áleýmettik qorǵaý mınıstrligi "Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly" Zań jobasyn tanystyrdy.
Zań jobasy "halyq únine qulaq asatyn memleket" tujyrymdamasy aıasynda, múgedek adamdardy qoldaý sharalaryn kúsheıtý maqsatynda ázirlendi.
Otyrys sońynda Eraly Toǵjanov ortalyq memlekettik jáne jergilikti atqarýshy organdarǵa Ulttyq jospardyń ýaqtyly jáne sapaly oryndalýyn, sondaı-aq zań jobasyn ázirleýde qoǵam pikiriniń de eskerilýin qamtamasyz etýdi tapsyrdy.
