Sonymen qatar Prezıdent «Quqyq qorǵaý júıesiniń jumysynda burynǵy daǵdy boıynsha aıyptaýǵa beıimdilik basymdaý bolyp tur. Azamattardyń qylmystyq jaýapkershilikke negizsiz tartylatyn jaǵdaılary da az kezdespeıdi» degen bolatyn. Joldaýda aıtylǵan osy tujyrymǵa arnaıy toqtalýymyzdyń ózindik sebebi bar.
«Egemen Qazaqstan» gazetiniń redaksııasyna Ishki ister mınıstrligi Qylmystyq atqarý júıesi komıtetiniń «ES-166/1 mekemesinde» jazasyn ótep jatqan Pavel Genadevıch Trýfanovtan hat kelgen edi. Onda Pavel Trýfanov óziniń ádiletsiz sottalǵandyǵyn, ózine qatysty qylmystyq is boıynsha Nur-Sultan qalasy «Saryarqa» aýdandyq polısııa basqarmasy tarapynan birqatar quqyqbuzýshylyq bolǵanyn, ártúrli memlekettik organdarǵa shaǵym túsirgenimen, istiń nátıjesiz aıaqtalǵanyn jazady.
«Múlde qatysym joq urlyqqa qatysty eki faktini maǵan tańyp otyr. Atalǵan urlyqtarǵa meniń qatystylyǵym týraly fakti dáleldenbedi. Biraq sot muny eskergen joq. Al úsh adamnan turatyn jábirlenýshi taraptyń da maǵan qoıar talaby joq, óıtkeni moraldyq ta, materıaldyq ta shyǵyny tolyqtaı ótelgen. Qylmystyq quqyqbuzýshylyq boıynsha talap-aryz joq. Iá, men qylmystyq teris áreket jasadym, ol úshin ókinemin. Eki kishkentaı balam bar ekenine qaramastan, sot meniń jazamdy tórt jylǵa qaýipsizdigi barynsha joǵary jazalaý ornynda óteýge úkim shyǵardy» dep jazady jazasyn óteýshi.
Pavel Trýfanov shaǵymynda ózine qatysty qylmystyń jeńil jaza túrine jatatyndyǵyn, áli de ádilettilikke úmit artatyndyǵyn, sondaı-aq tikeleı ózine qatysty urlyq mólsheri 189 200 teńge kóleminde tolyqtaı ótelgenin jazady.
Jazasyn óteýshiniń janaıqaıyn quqyq qorǵaý organdarynyń nazaryna usyna otyryp, Pavel Trýfanovtyń qylmystyq isine ádiletti sheshim shyǵarylady dep úmittenemiz.
