Qyrkúıek aıynyń basynda elorda aýmaǵyndaǵy aýyldyq jerlerde qaıǵyly oqıǵa oryn aldy. Abaısyzdyqta nemquraılylyq saldarynan eki balany traktor basyp ketti. О́kinishke oraı, bir bala oqıǵa ornynda qaza boldy. Ekinshi bala elordalyq balalar aýrýhanasyna jedel jetkizildi. Aýrýhanaǵa túsken boıda balanyń jaǵdaıy óte aýyr bolǵanyn dárigerler de dáleldep otyr. Jedel hırýrgııalyq kómek bólimsheniń deńgeıinde naýqasty hırýrgtar, neırohırýr, travmatolog jáne reanımatologtar qarap shyqty. Bala 10 kún jansaqtaý bóliminde ýaqyt keshti.
Aýrýhananyń travmatolog dárigeri Muhtar Ahmurzaevtyń aıtýynsha, qyz bala jaraqattyq shok jaǵdaıynda tústi.
"Bala óte aýyr jaǵdaıda, 3 dárejeli jaraqattyq shok jaǵdaıynda tústi. Mamandardyń ýaqytyly jedel kómek kórsetkeni asa mańyzdy boldy. Bala apparatqa qosylyp, shokqa qarsy terapııa júrgizildi. Shuǵyl túrde ota jasaý kerek ekeni belgili boldy", dedi dáriger.
5 jasar qyzdyń basynan ótken oqıǵa onyń otbasy úshin qatty soqqy bolǵany sózsiz. Balasyn ólimnen qutqarǵany úshin dárigerlerge sheksiz alǵys bildiretin otbasy kishkentaı naýqastyń janynda.
"Qazir qyzymnyń jaǵdaıy jaqsy. Kóńil-kúıi de jaqsy. Ákesimen vıdeo baılanys arqyly telefonmen sóılesip turady. Barlyq otbasy bolyp dárigerlerge myń alǵys aıtamyz. Birinshi Qudaıdyń qalaýymen, ekinshi dárigerlerdiń arqasynda qyzymyz qazir aman-esen qasymyzda", deıdi qyzdyń anasy.
"Qyzdyń aman-esen shyǵýy úlken qýanysh. Jambas pen zár shyǵarý joldary qatty zaqymdanǵan. Qazir balanyń jaǵdaıy turaqty. Barlyq prosedýralardy aıaqtaǵannan keıin bala úıge shyǵarylady", dedi hırýrgııalyq bóliminiń basshysy Rınat Baıgıreev.
