Embargony buzǵan áýe kompanııalary

Qazaqstan Respýblıkasynyń In­dýstrııa jáne ınfraqurylymdyq damý mınıstrligi quqyq qorǵaý organdarymen birlesip, BUU QK embargosyn Qazaqstanda tirkelgen áýe kemelerimen buzǵan úsh áýe kompanııasy boıynsha jumystar júrgizdi (Azee Air JShS, Sigma Airlines JShS, Jenis Air JShS).

Osy paıdalanýshylardyń áýe keme­leriniń menshik ıeleri Birikken Arab Ámirlikterinde (AGANYA LTD) jáne Brıtandyq Vırgın araldarynda (Infi­nitive Seal Inc.) tirkelgen sheteldik kompanııalar.

Atalǵan áýe kemelerin paıdala­ný­shylardyń áýe kemeleri Taıaý Shy­ǵys aımaǵynda sheteldik tapsyrys berý­shilerdiń múddeleri úshin paıdalanyldy. Áýe kemeleriniń negizgi bazasy – Birikken Arab Ámirlikteri.

BUU Qaýipsizdik Keńesiniń sanksııasy bar elderge reıster úshinshi elderdiń aýmaǵynan júzege asyryldy.

Halyqaralyq praktıkaǵa sáıkes shetelde qalyptastyrylǵan tasymaldanatyn júkterdiń sıpatyn paıdalanýshy memleket, ıaǵnı Qazaqstan tarapy baqylamaıdy, kerisinshe ushýlar júzege asyrylatyn shet memleketterdiń memlekettik organdary baqylaıdy.

Qazaqstan Respýblıkasy zańna­ma­synyń, IKAO standarttary men usynylatyn praktıkasynyń talaptaryn saqtaý turǵysynan tekserý nátıjeleri boıynsha Qazaqstannyń avıasııalyq ákimshiligi Bas dırektorynyń 2020 jylǵy 29 mamyrdaǵy №167/1 buıryǵyna sáıkes azamattyq áýe kemeleriniń atalǵan úsh áýe kompanııanyń paıdalanýshysy sertıfıkatyn, onyń ishinde Sigma Airlines JShS paıdalanýshy sertıfıkatynyń qoldanylýy ýaqytsha toqtatyldy.

Qazaqstan Respýblıkasynyń Syrtqy ister mınıstrligi 2020 jylǵy 5 maýsymda BUU Qaýipsizdik Keńesiniń Lıvııa jó­nin­degi komıtetiniń jetkizilimge embar­gosynyń buzylýyna qatysty baıandamasyn usyndy.

BUU Qaýipsizdik Keńesiniń baıandamasynda tergeý barysyndaǵy qazaqstandyq bılik pen Qazaqstannyń avıasııalyq ákimshiliginiń ashyqtyǵy men yntymaqtastyǵy úshin BUU sarapshylar tobynyń alǵysy atap ótildi.

Elimizdiń ımıdjin qaqtyǵys aımaq­taryna nemese BUU Qaýipsizdik Keńe­siniń sanksııasyndaǵy elderge qarý-jaraq pen áskerı tehnıkany tehnıkany jetkizýdiń «ashyq emes shemalaryna» tartylǵan josyqsyz sheteldik áýe kompanııalarynyń áreketterinen saqtaý maqsatynda júk tasymaldaýǵa jáne olardy keıinnen baqylaýǵa arnalǵan áýe kemelerin tirkeý úshin qosymsha sharttar ázirlendi, olar «Qazaqstan Respýblıkasynyń áýe keńistigin paıdalaný jáne avıasııa qyzmeti týraly» Qa­zaq­stan Respýblıkasynyń zańyna ózgeris­ter engizý týraly» Qazaqstan Res­pýb­lıkasy zańynyń jobasyna engizildi.

Atalǵan normalar 2020 jyldyń sońyna deıin «Ekonomıkalyq ósýdi qalpyna keltirý máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobasynyń aıasynda qabyldanady dep kútilýde.

Osy baǵyttaǵy jumystar jalǵa­sýda.