– Olga Sergeevna, Prezıdenttiń aıtyp otyrǵany túptep kelgende, urpaq tárbıesi men ult densaýlyǵy. Sizdiń oıyńyzsha, elimizdegi buqaralyq sport pen balalar sportyn damytýdyń qandaı tyń joldary bar?
– Eń aldymen Memleket basshysynyń bıylǵy Joldaýy birqatar salaǵa qatysty jańa mindetterdi aıqyndap bergenin aıtqym keledi. Qýantarlyǵy, onyń ishinde sportty, ásirese buqaralyq sportty damytýǵa qatysty kóptegen másele kóterilgen. Kásibı sportshy bolǵan soń, meni de respýblıkamyzdaǵy buqaralyq jáne balalar sportynyń bolashaǵy alańdatatyny anyq. Qasym-Jomart Kemeluly osyndaı qıyn-qystaý zamanda el qazynasynan kásibı sporttyq klýbtarǵa qarjy quıýdyń esh negizi joq ekenin aıtqan bolatyn. Rasymen de, jyl saıyn respýblıkalyq bıýdjet pen kvazımemlekettik kompanııalar esebinen elimizdegi san alýan kásibı sporttyq klýbtardy qarjylandyrýǵa mıllıardtaǵan teńge bólinedi. Endi budan bylaı deneshynyqtyrý men buqaralyq sportty damytýǵa, balalarǵa arnalǵan sport seksııalarynyń jumysyn qoldaýǵa basymdyq berýimiz kerek.
Buqaralyq sporttyń kásibı sporttan aıyrmashylyǵy sol, onda tutastaı bir ulttyń salaýattylyǵyna, jas pen káriniń túgeldeı deneshynyqtyrýmen aınalysýyna den qoıylady. Kásibı sport bolsa, belgili bir topty ǵana qamtıdy. Shynymen de, sport degenimiz – densaýlyq kepili. Demek, ol kez kelgen adamǵa qoljetimdi bolýy shart.
– Memleket basshysy balalarǵa arnalǵan túrli sport seksııalary barlyq oblysta, ár aýdan ortalyǵynda bolýy kerektigin aıtty...
– О́z basym Prezıdenttiń bul bastamasyn tolyqtaı qoldaımyn. Jalpy, bıylǵy Joldaýda balalar sportyn qoldaýǵa erekshe mán berilip otyrǵany beker emes. Sebebi óskeleń urpaqty deneshynyqtyrý men sportqa kishkentaıynan baýlyǵan mańyzdy.
Bizdiń oblysqa keler bolsaq, sońǵy jyldary Shyǵysta bul baǵytta aıtarlyqtaı sharýa tyndyryldy. Máselen, pandemııaǵa deıin aımaqta respýblıkalyq jeńil atletıka federasııasynyń muryndyq bolýymen túrli deńgeıdegi jarystar, aıtýly marafondar ótkizilgen. Onyń ishinde kásibı jarystarmen qatar, áýesqoılar, balalar men oqýshylar arasyndaǵy saıystar da boldy. Qýantarlyǵy, mundaı básekelerge qatysýǵa nıet bildirgender sany jyl ótken saıyn artýda. Tipti karantın kezinde de qol qýsyryp otyrmaı, túrli onlaın-chellendjder uıymdastyrdyq. Sondyqtan sport salasy bizde aıtarlyqtaı jetistikterge jetip keledi.
– Karantın demekshi, kóktemnen bastalǵan shekteýler kóp nársege qolbaılaý boldy. Árıne halyqtyń densaýlyǵy mańyzdy. Suraıyn degenim, osy kezde sportshylarymyz aldaǵy baıraqty básekelerge qalaı daıyndaldy?
– Koronavırýs pandemııasy úırenshikti ómirimizge aıtarlyqtaı ózgerister engizgeni ras. Indet sportqa da keri áserin tıgizbeı qoımady. Barlyq josparymyz túbegeıli ózgerdi. Aǵymdaǵy jyldyń eń aıtýly sporttyq oqıǵasy – Tokıo Olımpıadasy keıinge shegerildi. Sonyń kesirinen aldyn ala daıyndalyp qoıǵan jattyǵýlar kestesi aýysty. Jasyryp-jabary joq, kóbimiz Olımpıada oıyndary ýaqtyly ótkiziledi dep sońǵy sátke deıin úmittendik. Tokıodaǵy oıyndarǵa arnaıy jattyǵý jospary boıynsha daıyndaldyq. Alaıda úmitimiz aqtalmady. Elimiz ben álemdegi jaǵdaı kúrt nasharlaǵan soń, sportshylardyń deni jattyǵý jasaýdy da doǵardy.
Men dál qazirgi ýaqytta artyq salmaq qospaý úshin óz betimshe jattyǵýlar jasap júrmin. Biraq qazirgi jattyǵýym úlken jarysqa qatysatyndaı daıyndyq deýge kelmeıtin shyǵar. Álemdi dúrliktirgen indetten tez arylyp, ózimniń tolyqqandy jattyǵýlaryma, jarystarǵa oralǵym keledi. Osydan biraz ýaqyt buryn sportshylarǵa saıabaqtarda, stadıondar men arnaıy sporttyq alańdarda jattyǵý júrgizýge ruqsat berilgen edi. Sózsiz bul biz úshin jaqsy jańalyq boldy. Endi qysqy maýsymǵa daıyndyqty bastaý qajet. Qys aılarynda birneshe iri jarys ótýi tıis. Oǵan deıin el men jahandaǵy jaǵdaı turaqtalyp, shekteý sharalary alynady dep úmittenemin.
– Qazir she, qaıda jattyǵyp júrsiz?
– Qazir О́skemendegi jeńil atletıka ortalyǵynda, sondaı-aq aýa raıy qolaıly kúnderi «Samal» saıabaǵynda jattyǵamyn. Bári sátimen bolyp, qystaǵy jarystar shegerilmese, birneshe kishigirim saıysqa qatysý oıda bar. О́ıtkeni Olımpııa oıyndaryna deıin tezirek babyma kelý qajet.
– Jalpy, oqý-jattyǵý jıyndary qashan bastalýy tıis?
– Ol týraly esh nárse aıta almaımyn. Ol jaǵy ázirge belgisiz. Epıdemııalyq ahýal jaqsaryp, shekaralar ashylyp jatsa, mindetti túrde Ulttyq Olımpıada komıtetinen ruqsat alyp, oqý-jattyǵý jıyndaryna shyǵamyz. О́ıtkeni jyl on eki aı kóship-qonyp júretin sportshy degen halyq úshin osynshama ýaqyt bir orynda otyrý óte aýyr. Qalaı degenmen, úı jaǵdaıynda oıdaǵydaı jattyǵý jasaı almaıdy ekensiń.
– «Egemen Qazaqstan» gazetiniń oqyrmandaryna qandaı keńes berer edińiz?
– Eń bastysy, densaýlyqtaryńyzdy kútińizder. Ár adam shama-sharqyna qaraı jattyǵý jasaýy qajet. Máselen, tańǵy jattyǵý jasaýǵa, júgirýge nemese jaıaý júrýge bolady. Onyń bári densaýlyqqa paıdaly. Jumystan keıin sportzalǵa baryp shynyǵýǵa da bolady. Máselen, bizdiń qalada mundaı jattyǵýlar jasaýǵa bolatyn jerler jetip artylady. Eń bastysy, jattyǵý qarqynyna emes, jıiligine mán bergen jón.
Áńgimelesken
Mereı Qaınaruly,
«Egemen Qazaqstan»
Shyǵys Qazaqstan oblysy
