Nysan qazannyń sońyna deıin tolyqtaı iske qosylýy tıis ekenin qurylysshylar biledi. Sondyqtan da olar jaýapkershilikti sezinip, ózderine júktelgen jumystardy sapaly atqaryp keledi.
Oblys basshylyǵynyń aıtýynsha, Pýlmonologııa ortalyǵyn jabdyqtaý úshin eń zamanaýı jáne qajetti jabdyqtar satyp alynǵan. Koronavırýstyń jańa tolqyny bola qalǵan jaǵdaıda, 5 300 ınfeksııalyq jáne provızorlyq tósektik oryn, 5 PTR zerthana daıyndaldy. Zerthananyń árqaısysy kúnine myń taldaý jasaýǵa qaýqarly. Iаǵnı, turǵyndar test tapsyrsa, nátıjesin aptalap-aılap kútpeıdi. Sonymen qatar qosymsha 3 kompıýterlik tomograf satyp alyndy.
El-jurtty ábigerge salǵan pandemııa aıaqtalyp, zaman tynyshtalǵan soń Pýlmonologııa ortalyǵy mamandary tek naýqastardy emdeýmen aınalyspaıdy, tynys alý aýrýlary bar jandar úshin eń ozyq medısınalyq tehnologııalar qoldanylatyn ǵylymı mekeme bolady.
Bolýy yqtımal pandemııanyń ekinshi tolqynyna aýdandarda da daıyndyq qarqyny báseńdegen emes. Besqaraǵaı aýdanynda qurylǵan BIRLIK qaıyrymdylyq qorynyń kómegimen ottegi konsentratory apparatyn tıimdi baǵamen satyp alýǵa múmkindik týdy. Atalǵan qor arqyly aýdandyq aýrýhanaǵa bir ottegi konsentratorynyń apparatyn, eki pýlsoksımetr, úsh tonometr satyp alyndy. Sonymen qatar memlekettik qyzmetshiler, Nur Otan partııasynyń aýdandyq fılıaly jáne basqa da qyzmetkerler birigip, ortalyq aýrýhanany taǵy bir ottegi konsentratory apparatymen qamtydy. Aýdanǵa janashyrlyq tanytýdan jergilikti kásipkerler de shet qalyp jatqan joq. Olar da dál osyndaı apparattyń ekeýin tabys etti. Odan bólek medısınalyq qural-jabdyqtar jetkizip bergen.
Al Katonqaraǵaı aýdandyq aýrýhanasyna quny 52 mln teńge turatyn jańa sıfrly rentgen apparaty alyndy. Apparatqa oblystyq bıýdjetten qarajat bólindi.
Mamandardyń aıtýynsha, jańa qurylǵynyń artyqshylyǵy – sáýle ótkizý qabileti joǵary, zııandy doza mólsheri tómen. Rentgen sýretiniń sapasy anaǵurlym artyq.
Pandemııa halyqqa uıymshyldyq, bereke-birlik keregin túsindirgendeı boldy. Densaýlyqqa mán bergen eldiń meıirimi artty. Halyq qol qýsyryp, joǵarydan kómek kútpedi. О́zderi amalyn tappasa, taralǵan indet ýaqytqa qaramaıtyn edi. Sóıtip birligi bekem el bir kisideı qurylǵan qorlarǵa aqsha aýdaryp, tamshydaı bolsyn úlesterin qosty. Sol úrdis shyǵysta áli de jalǵasyp keledi.
Shyǵys Qazaqstan oblysy
