Qazaqstanda tótenshe jaǵdaı engizilgen kúnnen bastap Almaty men Nur-Sultan qalalarynda táýlik saıyn dárigerlerdi, blokbekette turǵan jaýyngerlerdi bir mezgil ystyq tamaqpen qamtamasyz etýdi qalypty jaǵdaıǵa aınaldyrdy. Qysqasy, bıznesin toqtatyp, barlyq múmkindikti pandemııa oshaǵynda qalyp qoıǵan azamattarǵa bir mezgil ystyq tamaq jetkizip berýge jumyldyrǵan. Keıinirek, olarǵa Almatydaǵy kásipkerlerdiń biri qosylyp, tamaqqa qosa, kofe, salat túrleri, ystyq shaı, tátti kúlshelermen tolyqtyrypty.
– Karantın jarııalanǵannan kúnnen bastap dárigerlerdi jáne quqyq qorǵaý organdarynyń qyzmetkerlerin bir mezgil ystyq tamaqpen qamtamasyz etýge sheshim qabyldadyq. Pandemııanyń alǵashqy kúnderi olardyń qandaı jaǵdaıda jumys istegeni bárimizge belgili. Áleýmettik jeliler arqyly kómekke muqtaj azamattardyń qatarynyń ósip kele jatqany baıqaldy. Olardyń bárin qamtamasyz etýge múmkindigimizdiń jetpeıtini belgili. Sondyqtan ýaqyt ótkizbeı demeýshi izdeýge sheshim qabyldadyq, – deıdi E.Ibragım.
Osy kezde bul jumys tobyn qoldaýshylar kóp boldy. Kásipker Aıbek Barysov alǵashqylardyń biri bolyp kómek qolyn sozyp, qarjy usyndy.
– Al biz qolymyzdan keletin tirlikti – ystyq taǵamdy der kezinde daıyndap, qajetti núktelerge jetkizip berýdi jalǵastyra berdik, – deıdi ol. Sáýir aıynda kovıd fobııasy qoǵamdyq sanaǵa úreı bolyp tańbalanyp qaldy. Boıynan dert belgisi baıqalǵan azamattardyń úıi qorshaýǵa alynǵany, osy dertten qaıtys bolǵan marqumdardy bólek jerlegeni el arasynda dertti juqtyryp alam ba degen úreıdiń boıaýyn qalyńdatyp jiberdi. Osy kezde aýrýhanalar men blok-beketterge daıyn tamaqty jetkizýdiń ózi problemaǵa aınaldy.
– Kýrerlerge tamaqty jetkizip bergeni úshin tólenetin jalaqy eki, úsh esege deıin ósip ketti. Al demeýshilerdiń bergen qarjysynda bul eskerilmegen. Sol sebepti bul mindetti ulym ekeýmiz atqardyq. Derttiń betalysy órship turǵan kezde órttiń oshaǵynda júrdik. Qazir bizdi adamdardyń yqylasy saqtap júrgen sııaqty, – deıdi E.Ibragım.
Arada birer aı ótkende demeýshilerdiń bergen qarjysynyń túbi kórinip qaldy. Al pandemııanyń beti qaıtar túri joq. A.Barysovtyń demeýshiligimen bólingen qarjy túgesildi. О́z múmkindigimen kóp degende kún saıyn 40 adamǵa tamaq jetkizip berer.
– Qazir eshkim ash emes. Biraq qazaqta «kóńil kóńilden sý ishedi» degen sóz bar. Tirligimiz toqtap qalmaý úshin kraýfandıng múmkindigine júgindik. Sebebi on adamǵa arnalǵan tamaqty dárigerler 40 adamǵa teń etip bólip berip jatqanyn kórgen kezde kózimnen jas yrshyp ketti. Áleýmettik jeli arqyly bizdiń tobymyzǵa qosylýǵa úndedim. Az ǵana ýaqyt ishinde 4 mln teńge jınaldy. Kómek qolyn sozǵandar da kóp boldy. Qysqasy, biz pandemııa kezinde 4 myń tamaqty tıisti oryndarǵa jetkizdik, – deıdi E.Ibragım. Aqedil azamat pandemııanyń qazaqstandyqtardyń birligi men peıiline syzat túsire almaǵanyna kýá bolǵanyn jetkizdi. Tipti zeınetkerler habarlasyp, kún kórisinen artylǵan tıyn-tebenin de usynǵan sátter bolǵan.
– Aýylda apalarymyz «altyn, kúmis tas eken, arpa, bıdaı as eken» degen qanatty sózdi qıynshylyq zaman qalyptastyrǵanyn aıtatyn. Buryn jastyqpen onyń maǵynasyna tereń mán berip kórmeppin. Kúni uzaq blok-bekette turǵan jaýyngerler, aýrýhanada kúndiz-túni kezekshilikte bolǵan dárigerler ash dep eshkim aıta almaıdy. Biraq qıyn sátte dostyq peıilmen usynǵan tuz-dámimizdi olar eshqashan umytpaıtynyna senemin, – deıdi E.Ibragım.
Ol búginge deıin bıznes salasynda túrli salada baq synap kórgenin de aıtyp ótti. Al pandemııa adamdardy tamaqtandyrý eń saýapty is ekenin talaı adamdarǵa uǵyndyra túskendeı.
– О́zbekstanda daıyn taǵamdar ındýstrııasy álemdik deńgeıge kóterilgen. Tashkentte turatyn dostarym keshegi pandemııa kezinde aýrýhanalardy, blok-beketterdi bir mezgil ystyq tamaqpen qamtamasyz etýdi óz jaýapkershilikterine alǵanyn aıtady. Kórshi elde bul sala damyǵan ǵoı. Bir dámhana 20 adamǵa ystyq tamaq berse de másele sheshiler edi. Bizde bul másele sheshilmegenin, osy salaǵa ultjandy azamattar kóptep kelgende ǵana sheshimin tabatynyn pandemııada baıqadyq. Fors-majorlyq sıpatta bastalǵan volenterlik áreketimiz kásipkerler tarapynan qoldaý tapty. Pandemııadan keıin osy salaǵa shyndap bet burýǵa sheshim qabyldadym. Sebebi Almatydaǵy bıznestiń osy túrinde ózge elden kelip, jumysyn jandandyryp, tipti qazaqstandyqtarǵa jumys taýyp berip otyrǵan sheteldikter jetedi. Taǵamnyń túr-túrin daıyndaýdy qazaq ta biledi, endi osy saladaǵy bastaǵan isimdi alǵa jyljytýǵa talpynyp kóremin, – deıdi ol.
ALMATY
