«Is-shara #Birgemiz aksııasyn qoldaý maqsatynda júrgizilip otyr. Volonterler koronavırýs ınfeksııasynyń qaýpi men salamatty ómir saltyn nasıhattaý úshin jolaýshylar poıyzdary men temir jol vokzaldaryna kelýshilerge maska taratyp, sondaı-aq karantınge baılanysty engizilgen shekteýlerge túsindirme jumystaryn júrgizdi. Olar betperdeni tek úı-jaılarda ǵana emes kóshede de mindetti túrde taǵýdyń mańyzdylyǵy týraly aıtty», dedi departament bastyǵynyń orynbasary Abzal Jumataev.
Búginde kúni elimizdiń barlyq óńirinde karantındik is-sharalar engizilgeni belgili. Sondyqtan adamdar kóp jınalatyn áýe jáne temir jol obektilerinde de sanıtarlyq-gıgıenalyq talaptardy saqtaý óte mańyzdy.
Abzal Jumataevtyń aıtýynsha, kólik polıseıleri ózderiniń negizgi mindetterine qosa azamattardyń densaýlyǵyna qamqorlyq kórsetýdi de maqsat tutady. Oǵan osy ótkizip jatqan is-sharalar dálel bolady.
«Nur-Sultan-1» stansasynda A.Jumataev jeke qurammen jáne volonterlermen kezdesip, jumystyń basym baǵyttaryn aıqyndady. Budan soń «Qaraǵandy – Qostanaı», «Jezqazǵan – Nur-Sultan», «Almaty – Qostanaı» jáne «Nur-Sultan – Pavlodar» baǵyttaryndaǵy jolaýshylar poıyzdarynyń kelip-ketýi kezinde jolaýshylarǵa qorǵanys betperdeleri men profılaktıkalyq sıpattaǵy jadynamalar taratyldy.
Volonterler departament uıymdastyratyn aksııalarǵa udaıy qatysyp otyratynyn aıtty. Olar bul jumysqa óz erkimen jumylýda. Jastar qoǵamǵa qolushyn berýdi ár azamattyń paryzy dep biletinin jetkizdi.
Al jolaýshylar óz kezeginde tártip saqshylaryna rızashylyǵyn bildirdi. Olar osyndaı almaǵaıyp kezeńde erekshe kóńil bólip tegin betperde taratqan polıseılerdiń qamqorlyǵyn joǵary baǵalap, olardyń qıyn da jaýapty qyzmetterine alǵys aıtyp, tabys tiledi.
Shara barysynda azamattardyń kópshiligi qorǵanys betperdelerin taǵýǵa asa jaýapkershilikpen qaraıtynyn kórsetti.
«Aksııa kezinde kólik polıseıleri jolaýshylarǵa 500 medısınalyq qorǵanys betperdesin taratty. Tártip saqshylary aldaǵy ýaqytta osy baǵyttaǵy jumysty jalǵastyratyn bolady», dedi polısııa polkovnıgi.
Kólik polısııasy qyzmetkerleri osyndaı aksııalardy júıeli túrde uıymdastyrmaq. Máselen, bıyl tamyz aıynyń aıaǵynda Nur-Sultan stansasynda eriktilermen birlese otyryp, 1500 betperde taratylǵan bolatyn. Búginge deıin polıseıler 2 myńǵa jýyq medısınalyq betperde taratty.
