Aıta keteıik, «AKME» halyqaralyq aǵartýshylar klýby 2017 jyly qurylyp, kúni búginge deıin ashyq suhbat alańyna aınalyp keledi. Klýb músheleriniń aldyna qoıǵan maqsaty – Ahmet Baıtursynuly bastaǵan Alash zııalylarynyń isin jalǵastyrý. Búginde alqaly jıyndarǵa alys-jaqyn shetelderdegi zııaly qaýym ókilderi, ǵalymdar, professorlar óz oılaryn bildirip jatyr. Jastar da qalys qalyp jatqan joq.
Abaı ıdeıalaryn, oıshyl murasyn jastar arasynda odan ári dáripteý maqsatynda ótken sharaǵa onlaın qatysqan Halyqaralyq Túrki akademııasynyń prezıdenti Darhan Qydyráli «Abaı murasynyń túrki elderinde tanylýy» týraly baıandama jasasa, Dúnıejúzilik Islam akademııasynyń prezıdenti Mýnıf Zoýbı «Abaı murasy jáne ıslam órkenıeti» taqyrybynda oı qozǵady.
– Abaı – qazaq halqynyń ǵana emes, túgel túrkilerdiń, tamyrlas, týystas halyqtardyń ortaq aqyny. 1934 jyly «Jas Túrkistan» gazetinde Mustafa Shoqaıdyń áriptesi, professor Tahır Shaǵataıdyń Abaıǵa baılanysty «Túrkistannyń bas aqyny» atty maqalasy jaryq kórgen eken. Ras, óz dáýirinde Abaı Túrkistannyń bas aqyny retinde moıyndalǵan, – deıdi Halyqaralyq Túrki akademııasynyń prezıdenti Darhan Qydyráli.
Sondaı-aq sharaǵa arnaıy kelgen Eýropa qazaqtary federasııasy prezıdenti (Shvesııa) Murat Ermısh «Abaı murasy jáne sheteldegi qandas baýyrlar» taqyrybynda oı órbitti. Túrkııadan tikeleı efırge shyqqan professor Gúljanat Erjýlasýn Abaı murasynyń Túrkııada, Hashatrıan Shýshan (Armenııa) Armenııada nasıhattalýyn aıtyp, hakim shyǵarmalarynyń shetel tilderindegi aýdarmalarymen tanystyrdy.
Al Ulttyq ǵylym akademııasynyń akademıgi Ǵarıfolla Esim «Abaı – hakim», professor Arap Espenbetov «Abaı murasy jaıly», Abaı ınstıtýtynyń dırektory Jandos Ábýbákir «Abaı murasy jáne órkenıet» taqyrybyn qaýzady. Uly oıshyldyń shyǵarmashylyǵy men qazaq mádenıetine qosqan úlesin aıtty.
Shara barysynda Iаsnaıa Polıanadaǵy L.Tolstoı mýzeıiniń bólim meńgerýshisi Gennadıı Oparın «Abaı jáne Tolstoı» taqyrybyn qozǵasa, Abaıdyń Jıdebaı-Bórili memlekettik qoryq-mýzeıiniń dırektory Turdyqul Shańbaı mýzeıdegi atqarylǵan is-sharalarǵa toqtaldy.
Sonymen qatar Shenchjen ýnıversıteti Zertteý ınstıtýtynyń dırektory (Qytaı) professor Tao Itao, Ekonomıka jáne menedjment boıynsha shveısarııalyq qoldanbaly ǵylymdar mektebiniń rektory (Shveısarııa) Domınık Djordan jáne Leshno qalasynyń Iаn Amos Komenskıı atyndaǵy memlekettik joǵary kásiptik bilim berý mektebiniń professory (Polsha) Macheı Petshak Abaıdyń 175 jyldyq mereıtoıymen quttyqtady.
Shara sońynda Abaıdyń esimin, shyǵarmashylyǵyn odan ári dáripteý sharalary talqylanyp, mereıtoıǵa arnaıy kitaptar shyǵarý týraly usynystar aıtyldy.
