Taǵy bir atap óterligi, chempıonattyń alǵashqy týrlaryna qatysqan, el fýtbolynyń tarıhynda ózindik orny bar Pavlodardyń «Ertis» klýby qarjylyq qıyndyqqa baılanysty jarystan shyǵyp qaldy. Sonymen qatar Qazaqstannyń kásipqoı fýtbol lıgasy birinshiliktegi komanda sanynyń jáne karantınge baılanysty uzaq ýaqyt úzilis bolǵanyn eskerip, chempıonatty jyldaǵydaı úsh aınalym emes, eki aınalymǵa deıin qysqartýǵa májbúr boldy.
Osyndaı tosyn jaǵdaıda jáne erekshe tártipte ótip jatqan dop dodasynda qazaqstandyq fýtbol jankúıerlerin bir ǵana suraq mazalap júrgeni jasyryn emes. Iаǵnı túrli ózgerispen ótip jatqan el chempıonatynda súreńsiz oıyn kórsetip jatqan «Astananyń» álsiz jaǵdaıynan keıin jankúıer qaýymyn «bıyl qaı klýb top jarady?» degen suraq oılandyryp qoıǵany ras. Jalpy, bul 2014 jyly «Astana» chempıon bolǵannan bastap jyl saıyn jankúıerlerdi mazalaıtyn suraq bolsa da, chempıonat sońynda «Astana» jeńiske jetip jatady. Al rasymen bıyl chempıon komanda ózgere me, álde taǵy da «Astana» chempıon bola ma? Dál qazirgi jaǵdaıda qaı klýbtyń bas júldeni enshileýge bási bıik bolyp tur? Búgin osy suraq tóńireginde ágime órbitip kórmekpiz.
Qazaq fýtbolynyń ardageri ári sarapshysy Iýsýp Shadıev bıyl tórt komandanyń chempıon atanýǵa múmkindigi zor ekenin aıtady. ««Qaırat», «Astana», «Tobyl» jáne «Ordabasy» alǵashqy úshtikke talasatyn komandalar. Olardyń qataryna «Qaısar» men «Jetisýdy» da qosýǵa bolady. О́tken týrlarda «Shahterdiń» «Jetisýǵa» qarsy ótkizgen oıyny maǵan qatty unady. Ásirese birinshi taımda qarsylasyna múlde múmkindik bergen joq. Árıne, kóshbasshy klýb fýtbolshylarynyń oıyn deńgeıi joǵary ekendigi baıqalady, biraq alda áli tolyq bir aınalym bar. Sondyqtan qyzyqty, tartysty matchtardyń bári alda dep oılaımyn. Qazir aldyn ala ton pishý erterek, tipti chempıonat sońyna deıin sensasııa bolyp qalýy múmkin», deıdi Iýsýp Shadıev.
Al qazaqstandyq tanymal bapker Vahıd Masýdov «Qaırattyń» qarqynyna basqa komandalar shydas bere almaıdy deıdi. Dese de ol «Astana» burynǵy oıynyna qaıta oralyp kele jatqanyn, sondyqtan chempıon komandanyń aty sońǵy týrda da sheshilýi múmkin ekenin aıtady.
– Jalpy, chempıonattaǵy ózge komandalarǵa qaraǵanda «Qaırattyń» chempıon atanýǵa múmkindigi joǵary. О́ıtkeni olar qazir barlyq kezdesýin Almatyda ótkizip jatyr. Birinshi aınalymnan keıingi týrnır kestesine qaraıtyn bolsaq, «Qaırat» chempıon atanýy múmkin komandalardyń ishinde favorıt bolyp qala beredi. Biraq «Astana» ár týr saıyn alǵa qaraı ilgerilep, psıhologııalyq toqyraýdan shyǵyp keledi. Endi olar qarqynyn joǵarylatpasa, tómendetpeıdi dep oılaımyn», – dep atap ótti Masýdov.
Qazirgi tańda chempıonat bel ortasynan aýyp, komandalar márege qaraı jaqyndap keledi. Alǵashqy aınalymnyń qorytyndysy boıynsha, Almatynyń «Qaırat» komandasy birinshi orynda kele jatyr. Ekinshi orynǵa «Qaırattan» tórt upaı kem jınaǵan «Astana» jaıǵasqan. Úzdik úshtikti Shymkenttiń «Ordabasy» klýby túıindep tur.
Birinshi aınalymdaǵy 10 týrda «Qaırat» segiz ret qarsylastarynan basym túsken. Al bir oıynda teń oınasa, taǵy bir kezdesýinde jeńilip qalǵan. Bul chempıonattaǵy ózge komandalardyń nátıjelerimen salystyrǵanda jaqsy kórsetkish. «Astana» 10 oıynnyń altaýynda jeńiske jetip, úsh matchta teń túsken. Elorda komandasy da «Qaırat» sııaqty ázirge bir oıynda ese jibergen. Qazaqstan chempıonatyn úzbeı tamashalaıtyn kórermen mundaı jaǵdaı jyl saıyn qaıtalatynyn jaqsy biledi. Iаǵnı jyl saıyn chempıonat barysynda «Qaırat» top bastap keledi de, birinshilik sońynda kútpegen jerde qarsylastarynan jeńilip, qolda turǵan chempıondyqty «Astanaǵa» berip qoıady.
Alysqa barmaı-aq, chempıonattyń byltyrǵy nátıjesine kóz júgirtip kóreıik. 2019 jyly birinshilikte «Qaırat» chempıonat sońyna qaraı týrnır kestesinde top bastap kele jatyp, sońǵy eki-úsh týrda qatarynan jeńiliske ushyrap, bas júldeden qaǵylǵan edi. Al chempıonattyń ekinshi jartysynan bastap «Astana» ekinshi-úshinshi orynda júrip-aq, birinshilik sońyna qaraı chempıon atanyp ketti.
Týrnır kestesindegi qazirgi jaǵdaı da tap byltyrǵy ssenarıımen órbip keledi. Ázirge «Qaırat» kósh basynda. «Astana» ádettegideı ekinshi satyda keledi. Budan keıingi oıyndarda da eki komanda qarsylastaryna ese jibere qoıýy ekitalaı. О́ıtkeni eki klýb ta bas júldeden jáne kelesi jyly Chempıondar lıgasynyń irikteý kezeńinde óner kórsetýden úmitti. Eger eki komanda osy qarqynmen oınaı berse, jeńimpaz komandanyń esimi «Qaırat» pen «Astana» arasyndaǵy ózara kezdesýdiń qorytyndysy boıynsha anyqtalýy ǵajap emes.
