Foto: Polisia.kz
Almaty qalasynda júrgizilgen jedel-izdestirý sharalary barysynda qala turǵyny ustalyp, odan eki kılogramnan astam alfa-PVP sıntetıkalyq esirtkisi tárkilendi. Kúdikti kinásin moıyndaǵan.
Sondaı-aq megapolıste taǵy bir azamat qolǵa tústi. Onyń turǵylyqty jerin tintý kezinde shamamen bir kılogramm sıntetıkalyq esirtki men psıhotroptyq áseri bar dárilik zattar tabyldy.
Esirtki usynyp, birge ketýge kóndirgen: Almatyda jasóspirim qyzǵa tıisken er adam izdestirilip jatyr
Shyǵys Qazaqstan oblysynda ınternet-dúken kýratorynyń tapsyrmasymen óńirlerge esirtki tasymaldaǵan Almaty oblysynyń turǵyny ustaldy. Kúdiktiden eki kılogramnan astam esirtki tárkilendi.
Al Qaraǵandy oblysynda Almaty – Ekaterınbýrg tasjolymen iri kólemdegi sıntetıkalyq esirtki tasymaldaǵan kúdikti qolǵa tústi. Avtokólikti tintý kezinde bir kılogramm alfa-PVP sıntetıkalyq esirtkisi anyqtalǵan.
IIM málimetinshe, tárkilengen sıntetıkalyq esirtkiniń jalpy salmaǵy 6 kılogramnan asty. Bul zańsyz aınalymǵa túsýi múmkin 18 myńnan astam bir rettik dozanyń joly kesilgenin kórsetedi.
«Osylaısha myńdaǵan jastyń ómiri men densaýlyǵyna tónetin qaýiptiń aldyn aldyq. Atalǵan derekter boıynsha Qylmystyq kodekstiń 297-baby 3-bóligimen sotqa deıingi tergep-tekserý amaldary júrgizilip jatyr. Qazir basqa da qatysy bar adamdardy anyqtaý baǵytynda jedel-tergeý sharalary jalǵasyp otyr. Barlyq kúdikti ýaqytsha ustaý ızolıatoryna qamaldy. Jazǵy demalys qarsańynda jastardy esirtki taratyp, «jeńil aqsha» tabýǵa úndeıtin jalǵan usynystarǵa aldanbaýǵa shaqyramyz. Qylmystyq toptar mundaı adamdardy tek «shyǵyn materıaly» retinde paıdalanady. О́z bolashaǵyńyz ben jaqyndaryńyz týraly oılanyńyz», dedi IIM esirtki qylmysyna qarsy is-qımyl komıteti basqarmasynyń bastyǵy Baqytjan Ámirhanov.
Buǵan deıin esirtki bıznesimen aınalysqan 76 sheteldiktiń ustalǵany týraly habarlaǵanbyz.
