Endi qarııalar qalaǵan ýaqytta osynda bas qosyp, qaýqyldasyp, hal surasyp, áńgime-dúken quryp, shahmat, doıby, toǵyzqumalaq oıyndaryn ermek etedi. Ardagerler keńesi munda aýdan jastaryna ónege-tárbıe beretin túrli taǵylymdy sharalar uıymdastyryp, óskeleń urpaqqa óńir tarıhyn nasıhattaýdy kózdep otyr.
– Bul ortalyqty ashýdy birazdan beri oılastyryp júr edik. Burynyraq ashqymyz kelgenimen, laıyqty oryn bolmady. Kópten beri kóńilde júrgen ıgiliktiń sáti endi tústi. Osylaı bir jerge jınalyp, bas qossaq, bos ýaqytty tıimdi ári qyzyqty etip ótkizsek, jarasymdy emes pe?! Bul oıdy ákimdikke jetkizdik. Aýdan ákimi Talǵat Toıshybekuly birden qoldap, azdap qarjylaı kómek kórsetip, osy ortalyqtan oryn bóldi. Onyń ishin mádenıet bóliminiń qyzmetkerleri árlep, jasaqtady. Barlyǵy da tamasha jabdyqtalǵan. Aqsaqaldar alqasy bolyp jınalyp, óńirdegi qandaı da bir másele bolsa sheship, basshylyqty shaqyryp, mán jaıdy aıtýǵa múmkindik týyp otyr. Aýdanǵa jańa kelip jatqan jas mamandardy da alǵash osy jerde qarsy alyp, batamyzdy berip, el amanatyn tabystasaq degen oıymyz bar. Pandemııaǵa baılanysty shekteýler kedergi bolyp tur. Qazirshe jıi bas qosyp, kúnde kezdese almaımyz. Áıtpese, jospar kóp. Aman bolsaq, bul ortalyq áli talaı tamasha kezdesýlerdiń ordasyna aınalady, – dedi aýdandyq ardagerler keńesiniń tóraǵasy Baqytjan Muttaqov.
Ortalyqqa keletin qarııalardyń barlyǵy – óz ýaqytynda ár salada eńbek etip, osy ólkeniń damýyna úles qosqan, eńbegi sińgen azamattar. Naýyrzym aýdanynda qazir 1060 ardager bar. Aqsaqaldar jańadan ashylǵan ortalyqta biraz is-shara uıymdastyrýdy josparlap otyr eken. Osy aptada shahmattan jarys ótpek. Sondaı-aq ardagerlerge arnalǵan eske alý taqtasyn ornatý josparda bar. Kórshi kabınette etnoaýyl bar.
Aýdan basshylyǵy endi atalǵan ortalyqqa kompıýter qurylǵylaryn ornatyp, ómirden kórgen-túıgeni mol, kókiregi kómbe qarııalar men mektep shákirtteriniń onlaın kezdesýlerin uıymdastyrýdy kózdep otyr.
Qostanaı oblysy,
Naýyrzym aýdany,
Qarameńdi aýyly
