Tanymal tarıhshy, professor Mámbet Qoıgeldiniń dáldikpen jasaǵan myna bir tujyrymyna zer salyp kórelik: «Gagarınniń qazaq jerinen qalaı ushqany bárimizdiń esimizde ári kóz aldymyzda, – deıdi kórnekti ǵalym. – Ǵaryshqa ushyp-qoný óz elinde bolyp jatqandyqtan da qazaq halqy «Apyr-aı, bizden bir ul týmady ma?» dep uzaq ýaqyt tolǵatyp júrdi. Mine, taǵdyr sol róldi, sol tarıhı mindetti oryndaýdy qazaqtyń ishinen er týǵan Toqtar Áýbákirovtiń mańdaıyna jazypty. Jalpy, biz, qazaq halqy, HH ǵasyrda talaı jeńilis tapqan halyqpyz. Ne kórmedi qazaq halqy? Sonyń aqyrǵysynan, ıaǵnı 1986 jylǵy Jeltoqsan kóterilisinen keıin halyqtyń rýhy múldem túsip qalǵan. Sonda qazaq halqynyń basyn kótertken oqıǵa – Toqtar Áýbákirovtiń ǵaryshqa ushýy boldy».
Táýelsizdik alýdyń tóte jolyna túsken Qazaq eliniń Nursultan Nazarbaev bastaǵan jańa ókimeti 1990 jyldyń 25 qazanynda Joǵarǵy Keńeste «Qazaq KSR-niń Memlekettik Egemendigi týraly» Deklarasııasyn qabyldady. Sonymen qatar naǵyz toılanatyn el egemendigi merekesiniń qarsańynda halyqqa tosynsyı retinde qazaqty ǵaryshqa ushyrýdyń jedel qamy jasalyndy. Bári de dál búgingideı kóz aldymyzda!.. «Myń ólip, myń tirilgen» qazaqtyń sondaǵy qýanyshynda shynynda da shek bolmady! Keńes Odaǵy atty «jabyq memlekettiń» jabyq mekemesinde dybystan jyldam áskerı ushaqtardyń tusaýyn kesip júrgen biregeı synaqshy-ushqysh qazaq azamaty da tez tabyldy. Áıgili tarıhshy Mámbet Qoıgeldiniń meńzegeni, mine, osy...
Bul tusta Keńes Odaǵynyń Batyry, eńbegi sińgen synaqshy-ushqysh Toqtar Áýbákirov Soltústik polıýsti ıgerý, áskerı teńiz laınerine ushaqty qondyryp-ushyrý (Gınnestiń rekordtar kitabyna kirgen) sııaqty basqa da memqupııalyq ushý baǵdarlamalaryn oıdaǵydaı oryndap shyqqan. Endi «MIG» konstrýktorlyq bıýrosynyń shef-pıloty Valerıı Menıskııdiń orynbasary retinde áskerı mańyzy erekshe «Teńiz jobasyn» bastap ketken eken. «...Ol ǵaryshqa ushsa, tarıhta tuńǵysh qazaq ǵaryshkeri atanady. Demek, bizdiń fırmadaǵy bekitilgen ushý josparymyz ol úshin ekinshi satyǵa jyljıdy. Mundaı erekshe myqty orynbasardan aıyrylý maǵan óte aýyr soǵatyny sózsiz. Áýbákirov ketse, men eń basty rezervimdi joǵaltamyn, ushý kestesindegi saǵattar sıreıdi. Jastardyń jańa legin daıarlaý kerek. Al ondaı sátter kútpegen qaıǵyly oqıǵalarǵa uryndyrary daýsyz. Osynyń barlyǵyna qaramastan, Toqtardyń jolyn bógemedim...» Bul júrekjardy, jan tebirenterlik úzindiler – Batyr, eki márte laýreat, basshy V.Menıskııdiń (MIG) «Aspandaǵy aǵaıyndar» kitabynan alyndy.
Keńes Odaǵy úshin «Teńiz jobasynyń» qanshalyqty qymbat ekendigin myna tómengi joldardan da baıqaımyz. «Baǵdarlamany júzege asyrýdyń alǵashqy kezeńinen-aq kóp tájirıbe jınadyq. Bizdiń teńiz mashınasy týraly bastapqy pikirimiz birden ózgerdi. Toqtarmen birge bul jobany qaýzaý barysynda teńiz ushqyshtaryn daıarlaýdyń óte bir názik kiltıpandaryna kóz jetkizdik. Ekeýmiz ushy-qıyry joq teńiz ústinde MıG-21, MıG-23, MıG-29 ushaqtarymen juptasyp ta, jeke-jeke de óte kóp ushtyq. Osy kezeńde Toqtar ózin eń jaqsy qyrynan tanytty. Asa kúrdeli ushý máseleleri boıynsha, ol óziniń teńizdegi avıasııa salasy boıynsha ómirlik kásibı baǵdarlamasyn jasaqtap úlgergen.» Adamzat ókiliniń ǵaryshty ıgerýdi qazaq jerinen bastaǵanyn jaqsy biletin bas maman men kúlli konstrýktorlyq bıýronyń qas sheberleri bárin de kóre-bile tura, qımaı-qımaı... óz ortasynda aıryqsha bedeldi qazaq qyranyna «Aq jol!» aıtypty sonda.
Osydan 9 jyl burynǵy «Egemen Qazaqstan» gazetine bergen suhbatynda Toqtar Áýbákirov 2 qazan týraly «Bul – qazaqtyń namysy ekenimdi uqqan kúnim» depti. Tarıhı shyndyq, búkpesi joq aqıqat.
2015 jyldyń 14 qazanynda Aqordadan jasaǵan málimdemesinde Qazaqstannyń Tuńǵysh Prezıdenti – Elbasy Nursultan Nazarbaevtyń bylaı degeni bar: «Bizdiń tuńǵysh ǵaryshkerimiz Toqtar Áýbákirovtiń 24 jyl burynǵy ǵaryshqa sapary Qazaqstan Táýelsizdiginiń altyn bastaýy boldy. Osy ushýdy júzege asyrý úshin qanshama qıyndyqty eńserýge týra kelgeni esimizde.»
2 qazannyń – qazaq tarıhynda tuńǵysh qazaq ǵaryshqa ushqan kún dep aıshyqty áriptermen jazylýy da sondyqtan. Endeshe, búgin – ıisi qazaq bórkin aspanǵa atqan kún, qazaq – ǵaryshqa esik ashqan kún! Qutty bolsyn!
