Qarýly Kúshter Bas shtaby bastyǵynyń orynbasary – Tárbıe jáne ıdeologııalyq jumystar departamentiniń bastyǵy, birinshi dárejeli kapıtan Serik Borambaev Qazaqstan Respýblıkasynyń Prezıdenti Qasym-Jomart Toqaevtyń halyqqa Joldaýynyń negizgi erejeleri men tárbıe qurylymdarynyń mindetterin túsindirý boıynsha sóz sóıledi.
Jıynǵa qatysýshylar úshin memlekettik organdardyń, qoǵamdyq jáne ardagerler uıymdarynyń ókilderimen kezdesýler uıymdastyryldy. Aqparat jáne qoǵamdyq damý mınıstrligi basqarmasynyń bastyǵy Saltanat Álimqulovanyń baıandamasy qazirgi zamanǵy halyqaralyq qatynastar men qaýipsizdik problemalaryna arnaldy. Destrýktıvti dinı ıdeıalardyń taralýyn boldyrmaýǵa baǵyttalǵan jumystardyń nysandary men ádisteri týraly Nur-Sultan qalasy ákimdiginiń Din máselelerin zertteý ortalyǵynyń teology Marat Smaǵulov áńgimelep berdi.
Qorǵanys mınıstriniń birinshi orynbasary – Qazaqstan Qarýly Kúshteri Bas shtabynyń bastyǵy Murat Bektanov tárbıeshi-ofıserlerge arnaǵan sózinde áskerı qyzmetshiniń joǵary jaýyngerlik rýhynyń mańyzdylyǵy týraly tilge tıek etti. «Jaýyngerlik rýh boryshqa degen adaldyqtan, patrıotızm men tárbıeden qalyptasýy kerek. Bul óz kezeginde ózine, óz múmkindikterine jáne áriptesterine degen senimdi nyǵaıtady», – dep atap ótti general-leıtenant Murat Bektanov.
Oqý-ádistemelik jıynnyń jumysyna Memleket tarıhy ınstıtýty dırektorynyń orynbasary Amangeldi Qashqymbaev, «Qarýly Kúshterdiń ardagerleri» RQB tóraǵasynyń orynbasary, otstavkadaǵy general-maıor Marat Nuǵymanov qatysty. Sonymen qatar «Medıa professional» JShS basshysy Ǵazıza Raıymbek ofıserlerdi sheshendik óner tásilderimen tanystyrdy.
Tárbıeshi ofıserlerdiń oqý-ádistemelik jıyn barysynda alǵan bilimderi elimizdiń Qarýly Kúshterindegi tárbıe jáne ıdeologııalyq jumystardyń sapasyn arttyrýǵa yqpal etetin bolady.
