Igi shara almatylyq kásipker Ǵalym Chýashevtyń bastamasymen qolǵa alynǵan. Al uıymdastyrý jaǵy Dmıtrıı Kımge júktelgen. Eki azamatqa qoldaý kórsetken Aıdyn Sádibekov te serikterimen birge jolǵa shyqqan. Marafonshylar elimizdegi ekologııalyq máselelerge kópshiliktiń nazaryn aýdarýdy maqsat tutady.
– Ár qalaǵa toqtap, aldymen 42 shaqyrym marafon júgiremiz. Odan keıin tal otyrǵyzamyz dep sheshtik. Osylaısha eń kemi 760 aǵash kóshetin otyrǵyzýdy josparlap otyrmyz. Ár óńirge aıaldaǵan saıyn sapymyzǵa jergilikti marafonshylar qosylyp jatyr. Sol kisiler jol kórsetedi, – dedi Ǵalym Chýashev.
Tańǵy saǵat 8:00-de oblystyq ákimdik ǵımaraty aldyndaǵy alańda jınalǵan marafonshylar ortalyq stadıonǵa baryp júgirdi. Ǵalym Chýashev 42 shaqyrym 195 metr qashyqtyqty baǵyndyrsa, Dmıtrıı 22 shaqyrymdy júgirip ótti. Jalpy eseptegende, aksııa aıasynda Ǵalym 380, Dmıtrıı 190 shaqyrymdy baǵyndyrypty. Aıdyn da biraz jer júgirdi. Biraq jaraqatyna baılanysty júgirisin toqtatty da, ony esepke tirketýden bas tartty.
Alystan at aryltyp jetken meımandar sapyna ekologııalyq máselelerge beıjaı qaramaıtyn qostanaılyq sportshylar da qosyldy. Marafon aıaqtalǵan soń, sportshylar Tobyl jaǵalaýyndaǵy Táýelsizdiktiń 25 jyldyǵy atyndaǵy saıabaqqa 15 aǵash kóshetin otyrǵyzdy.
– Biz Qostanaıǵa deıin elimizdiń 8 qalasynda 200-deı kóshet ektik. Keıbir qalalarda, tipti, eki jerde aǵash otyrǵyzdyq. Alaıda ýaqyt tyǵyz, mundaı múmkindik kóp bola bermeıdi. Aksııa aıaqtalǵansha, jalpy sany 760 aǵash kóshetin otyrǵyzýdy kózdep otyrmyz, – dedi Aıdyn Sádibekov.
Marafonshylar qala men qalanyń arasyna óz kólikterimen jetedi. Olardyń endigi baǵyty – Aqtóbe qalasy. Ekoshara qazannyń jetisi kúni Almaty qalasynda aıaqtalady.
Qostanaı oblysy
