Joǵarǵy Bas Qolbasshy: Bizge elimizdiń ǵana emes, álemniń de tynyshtyǵy mańyzdy

 Batyr babalar urpaǵy

Almaty oblysynda Qazaqstan Qarý­ly Kúshteriniń tarıhynda alǵash ret ke­shen­di bitimgershilik oqý-jattyǵý jıyny ótti. Oqý-jattyǵý jıynyn Memle­ket basshysy Qasym-Jomart Toqaev baqy­lady.

Oqý-jattyǵý jıynyna desantshy-sha­býyldaýshy áskerdiń, áskerı-áýe kúsh­terdiń, áskerı polısııanyń, áskerı me­dısınalyq mekemelerdiń, Bitimgershilik daıyndyq júrgizý ortalyǵy men Mı­na­dan tazartý ortalyǵynyń myńnan astam áskerı qyzmetshileri, 100-den as­tam áskerı jáne arnaıy tehnıka ju­myl­dyryldy.

Oqý ortalyǵynyń komandalyq pýnk­tinde Joǵarǵy Bas Qolbasshyǵa bitim­gershilik polkiniń jumysy týraly baıandaldy. Sondaı-aq qazaqstandyq bitimgershilik polkine júktel­gen min­detterdi oryndaýdyń jalpy al­go­rıtmi týraly aqparat berildi. Sonymen qatar bitimgershilik bazanyń úlgisi tanystyryldy. Memleket basshy­sy oqý ortalyǵynyń ınjenerlik, lıngvıs­tıkalyq, taktıkalyq jáne medısı­nalyq synyptaryn aralap kórdi.

Qasym-Jomart Toqaev bitimgershilik daıarlyq oqý ortalyǵynyń ınfra­qu­ry­lymymen tanysqannan keıin oqý-jat­tyǵý jıynyn baqylady. Oqý-jattyǵý jıyny barysynda bitimgershilik kontıngenttiń gýmanıtarlyq júk tıelgen kolonnany alyp-júrý kezindegi is-áreketteri pysyqtaldy.

Joǵarǵy Bas Qolbasshy oqý-jat­tyǵýlary aıaqtalǵannan keıin áskerı qyzmetkerlerdiń aldynda sóz sóılep, Qazaqstannyń zamanaýı armııasy Uly dalanyń erjúrek batyr­larynyń dańqy men áskerı dástúr­lerin muraǵa alǵanyn, muny árdaıym este ustaý kerek ekenin atap aıtty.

Memleket basshysy elimizde ǵana emes, búkil álemde beıbitshilik pen ty­nyshtyqty qamtamasyz etýdiń mańyzyn atap ótti. Onyń aıtýynsha, Qazaq­stan álemdegi tynyshtyqty saqtaý maq­satymen qaqtyǵys aımaqtaryna bitim­gershilik áskerin turaqty jiberip otyrady.

– Qurmetti generaldar jáne ofıserler, serjanttar men sarbazdar! Sizderge eń qasıetti borysh júktelgen. О́ıtkeni, Otan qorǵaýdan artyq mindet joq! Armııa – memlekettiń berik qorǵany. Búgingi ásker – baıraqty batyr babalardyń urpaǵy! Osyny eshqashan umytpaǵan jón. Bizdiń ulan-baıtaq jerimiz bar. Ony qorǵaý úshin daıyndyǵymyz joǵary bolýy kerek. Bizge óz elimizdiń ǵana emes, álemniń tynyshtyǵy da óte mańyzdy. Sol úshin árdaıym bitimgershilik qyzmet atqaryp kelemiz.

Bizdiń basty basymdyǵymyz – ynty­maq­tastyq pen áriptestik. Sizder halyq­aralyq qaýipsizdikti nyǵaıtýǵa úlken úles qostyńyzdar. Bitimger bolý degenimiz – álemniń elshisi bolý degen sóz. Sizder bul mindetti abyroımen atqardyńyzdar. Osyndaı oqý-jattyǵý jıyndarynyń arqasynda áskerı sheberlikterińiz shyńdala túsedi. Armııamyzdyń áskerı rýhy men dańqy odan ári arta túsetinine senimdimin, – dedi Prezıdent.

Memleket basshysy Tuńǵysh Prezı­dent – Elbasynyń ózi tikeleı qurǵan  Qarý­ly Kúshterdiń bitimgershilik qyzmeti elimiz­diń beıbitshilik, halyqaralyq qaýip­sizdik jáne turaqtylyq qaǵıdattaryna is júzinde saı keletinin jetkizdi.

Prezıdent 2007 jyldan beri 35 qa­zaq­standyq áskerı qyzmetshi, onyń ishinde tórt áıel azamat BUU-nyń Nepaldaǵy, Kot-d’Ivýardaǵy, Batys Sahara men Lı­van­daǵy mıssııalaryna shtab ofıserleri men áskerı baqylaýshylar retinde qatysqanyn aıtty. 2018 jyly BUU mandaty negizinde áreket etetin alǵashqy qazaqstandyq rotanyń Lıvanǵa jiberilýi elimizdiń bitimgershilik áleýetin nyǵaıtý úshin jasalǵan mańyzdy qadam.

– Qazirgi ýaqytta óz jaýapkershilik aımaǵynyń baqylaý-ótkizý beketterindegi áskerı mindetterin qazaqstandyq bitim­gerler rotasynyń tórtinshi quramy atqa­rýda. BUU bitimgershilik áleýetiniń daıyndyq júıesindegi mindetter jelisin keńeıtý úshin Qazaqstan saperlerdiń, áskerı medısına qyzmetkerleriniń, barlaý jáne áskerı polısııanyń arnaıy bólimshelerin usyndy. Bul bólimsheler qazirgi bitimgershilik operasııalarynda barynsha suranysqa ıe, – dedi Prezıdent.

Joǵarǵy Bas Qolbasshy bitimgershilik daıarlyq oqý ortalyǵy mundaı mamandardy joǵary deńgeıde daıyndaıtynyna toqtaldy.

Basty maqsat aıqyn

Qasym-Jomart Toqaev oqý-jat­tyǵý jıyny barysynda áskerı qyz­met­kerlerdiń kórsetken kásibı biliktiligin atap ótip, qazaqstandyq bitimgerlerge minsiz jumystary úshin alǵys bildirdi. Memleket basshysy beıbit ómirde úlken mindetterdi atqaryp otyrǵan áskerdiń aıryqsha róline nazar aýdardy.

– Aıbyndy armııa – el egemendigi men qa­ýip­sizdiginiń kepili. Qarýly Kúshter qa­tarynda bolyp, Otandy qorǵaý – már­tebeli mıssııa ári joǵary jaýapkershilik. Biz armııamyzdyń jaýyngerlik qýatyna nyq senimdimiz! Halqymyz sizderdi maqtan tutady!

Bıyl biz el bolyp pandemııamen kúre­sýdemiz. Osyndaı jaýapty kezeńde áske­rı qyzmetshiler árqashan aldyńǵy shep­te boldy. Sarbazdar men ofıserler otan­dastarynyń ıgiligi jolynda na­ǵyz áskerı erliktiń úlgisin kórsetti. Pan­de­mııa­ǵa qarsy is-qımyl sharalaryna atsa­lys­­qan barsha áskerı qyzmetkerlerge al­ǵys bil­­diremin, – dedi Prezıdent.

Memleket basshysy áskerı qyzmet­shi­lerge arnaǵan sózinde armııanyń irgetasy qatań tártipke, ulttyq qaýipsizdikti saqtaýǵa baǵyttalǵan dara basshylyqqa negiz­­deletinin málimdedi. Sonymen qatar Qasym-Jomart Toqaev BUU bitimger­shilik kontıngenti aıasynda qyzmet etý zor abyroı jáne úlken jaýapkershilik ekenin atap ótti.

Prezıdent BUU qurylǵan sátten beri álem kóptegen aımaqtyq jáne ultaralyq qaqtyǵystardan arylmaǵanyn ókinishpen jetkizdi. Ol barlyq qaqtyǵysty saıası-dıplomatııalyq jolmen sheshýge úndeıtin Qazaqstannyń dáıekti ustanymyn, halyq­aralyq quqyqtyń bazalyq qaǵı­dattaryn saqtaý qajettigin aıtty.

– «Bitpeıtin» nemese «uzaqqa so­zyl­ǵan» dep tanylǵan aımaqtyq qaqty­ǵystar BUU Jarǵysynyń qazirgi ha­lyq­­aralyq quqyqtyń qaınar kózi jáne negizi bolyp tabylatyn basty eki qaǵı­da­tynyń arasyndaǵy túbegeıli qarama-qaıshylyqtardy aıqyndady. Bul – memleketterdiń aýmaqtyq tutastyǵy men ulttardyń óz taǵdyryn ózi tańdaý quqyǵy. Sońǵy qaǵıdat memleketter táýelsizdik alyp, otarlyqtan qutylǵan kezde óte ózekti bola tústi. Qazirgi ýaqytqa deıin álem óziniń damý baǵytyn anyqtady. Sondyqtan búginde memleketterdiń aýmaqtyq tutastyǵy qaǵıdaty birinshi orynǵa shyǵyp, basymdyqqa ıe boldy. Qazirgi qaqtyǵystarǵa baǵa berý kezinde BUU Bas Assambleıasy men Qaýipsizdik Keńesiniń qararlaryn basshylyqqa alýy tıis, – dedi Memleket basshysy.

Prezıdenttiń aıtýynsha, Qazaqstan Qarýly Kúshteriniń qasıetti boryshy elimizdiń, jerimizdiń tutastyǵyn qorǵaý. Bul joǵary maqsatty oryndaý úshin armııamyz árqashanda daıyn bolý kerek.

Sonymen qatar Joǵarǵy Bas Qol­bas­shy Qarýly Kúshterdi damytýdyń pers­pektıvalaryna arnaıy toqtaldy.

– «Eki maqsatty kózdeıtin» kompo­nent­terdi damytýǵa basymdyq berý qajet. Pandemııamen kúres tájirıbesi olar­dyń suranysqa ıe ekenin kórsetti. Atap aıtqanda, biz áskerı-kólik avıasııa­syn damytatyn bolamyz. Radıasııalyq, hımııalyq jáne bıologııalyq qorǵanys áskerleri óz mindetterin oryndaýǵa árqa­shan daıyn bolýy tıis, – dedi Qasym-Jomart Toqaev.

Prezıdenttiń sózine qaraǵanda, mun­daı áskerlerdi zamanaýı tehnıkamen jab­­dyqtaýǵa basymdyq berilip, bul ju­mys­qa otandyq kásiporyndar tartylýy qajet.

Memleket basshysy áskerdi basqarýda sıfrlyq tehnologııalardy damytý qa­jet­­tigine, sondaı-aq kıber jáne aqpa­rat­­tyq keńistiktegi taktıka men áreket­terdiń strategııasyn pysyqtaýǵa kóńil bóldi.

Joǵarǵy Bas Qolbasshy serjanttar men ofıserlerdi durys daıyndamaǵan jáne yntalandyrmaǵan jaǵdaıda qýatty Qarýly Kúshter qurý múmkin emes dep esepteıdi.

– Bizdiń basty mindetterimizdiń biri – serjanttyq quramǵa kásibı áskerı bilim berý isin damytý. Bul máseleni sheshýde «Jas Ulan» mektepteriniń jáne Kadet korpýsynyń barlyq áleýetin paıdalaný qajet. Qalyptasqan jaǵdaı komandırlerge de erekshe talap qoıady. Olar baqylaýshy organdar tarapynan ótkiziletin túrli sharalarǵa alańdamaı, qajetti bastama men sheshim qabyldaý múmkindigine ıe bolý kerek. Eger áskerı qyzmetshilerdiń tarapynan quqyqbuzý­shylyq derekteri anyqtalsa, olar zańǵa sáıkes qatań jaýapqa tartylýy tıis. Biraq komandırlerdi jumystarynan sebepsiz ajyratýǵa jol berilmeıdi. Bul máseleler quqyq qorǵaý júıesin reformalaý aıasynda qarastyrylýy kerek, – dedi Qasym-Jomart Toqaev.

Memleket basshysy Qarýly Kúshterdiń zamanaýı áskerı ınfraqurylymyn jáne materıaldyq-tehnıkalyq qamtamasyz etýdiń logıstıkalyq júıesin qurý qajet­tigine de toqtaldy. Prezıdenttiń sózine qaraǵanda, Qarýly Kúshterdi keń aýqym­dy jańǵyrtý zamanaýı áskerı ınfra­qurylym men materıaldyq-tehnıkalyq qamtamasyz etýdiń logıstıkalyq júıe­sin qurýdy qajet etedi. Bul da bizdiń Qarýly Kúshterimizdi damytýdyń negizgi basymdyqtary.

Qasym-Jomart Toqaev odan ári armııany jáne áskerı qyzmetshilerdi áleýmettik qoldaý máseleleri árdaıym memlekettiń basty nazarynda bolatynyn aıta kelip, sóziniń sońynda:

– Qurmetti sarbazdar! Sizder Otandy qorǵaýdyń ozyq úlgisin kórsetip kele­siz­der. Búgingi joǵary daıyndyq – sonyń aıqyn kórinisi. El tynyshtyǵyn saq­taý, halqymyzdy qorǵaý – eń basty min­det! Osy perzenttik paryzdy adal atqara­syzdar dep senemin! Memleketimiz Qarýly Kúshterdi árqashan qoldaıdy. Sebebi armııamyz halyqtyń múddesi úshin qyzmet etedi, – dedi.