Japonııa Parlamentiniń joǵarǵy palatasynyń Spıkeri Akıko Santo is-sharanyń basty qonaǵy boldy. Onyń aıtýynsha, Abaıdyń fılosofııasy adamzattyń qazirgi kezeńdegi barlyq qıynshylyqtardy, sonyń ishinde koronavırýstyq pandemııany eńserý úshin qajetti danalyq pen batyldyqqa úıretedi.
Elshi Erlan Baýdarbek-Qojataev bıyl Abaı Qunanbaıulynyń 175 jyldyǵy aıasynda búkil álem boıynsha ótkizilip kele jatqan is-sharalar Qazaqstannyń mádenı dıplomatııasynyń damýyna erekshe úles qosyp jatqan aıtty.
Japonııa Mádenıet jónindegi agenttiginiń tóraǵasy Rıoheı Mııata óz sózinde Abaı óleńderiniń jáne "Maneshıý" japon óleńderiniń kóne jınaǵynyń jalpy mazmuny uqsas bolǵanyna tánti bolǵanyn atap ótip, eki el ejelden Jibek joly arqyly baılanysqanyn aıtty.
Kitaptyń túsaýkeserin Kún shyǵys elinde zamanaýı japon poezııasynyń "qozǵaýshy kúshi" dep atalyp júrgen ataqty aqyn jáne synshy Kıvao Nomýra jasady.
Kórermender aǵymdaǵy jyldyń shildesinde Qazaqstan men Japonııada keńinen taralǵan osy ánge beıneklıp shyǵarǵan ánshi Rankanyń Abaıdyń "Kózimniń qarasy" ánin japon tilinde jan daýysymen oryndaýyn ystyq yqylaspen qarsy aldy.
Is-shara Japonııada qabyldanǵan sanıtarlyq-epıdemıologııalyq talaptar men áleýmettik qashyqtyq normalaryn saqtaı otyryp ótkizildi. Jalpy alǵanda, Abaı Qunanbaıulynyń 175 jyldyǵyn merekeleý aıasynda Tokıodaǵy Qazaqstan Elshiligi aǵymdaǵy jyly birqatar is-sharalar uıymdastyrdy.
Atap aıtqanda, Abaı shyǵarmalaryn mánerlep oqý estafetasyna Japonııa Parlamentiniń depýtaty jáne Qazaqstanmen Parlamenttik dostyq lıgasynyń tóraǵasy Takeo Kavamýra qatysyp, QR Parlamentiniń senatory Muhtar Qul-Muhammedtiń "chellendjine" jaýap retinde japon tilinde "Qara sózden" úzindi oqydy. Sonymen qatar, "Abai World Challenge" halyqaralyq vıdeomarafonynda Japonııa aqyndar qaýymdastyǵynyń prezıdenti Iаmada Takaakı Abaıdyń kóktemge arnalǵan óleńderiniń japonsha aýdarmasyn usyndy. Tokıo ortalyq kitaphanasynda Abaı Qunanbaıulynyń 175 jyldyǵyna arnalǵan kitap jáne ıllıýstrasııalar kórmesi ótti.
Kitap shyǵarý jobasyn Mádenıet jáne sport mınıstrliginiń tapsyrysy boıynsha Qazaqstannyń Japonııadaǵy Elshiliginiń qoldaýymen "Ulttyq aýdarma bıýrosy" qoǵamdyq qory júzege asyrdy.
Mátinderdiń ádebı aýdarmasyn Tokıo shet tilder ýnıversıtetiniń professory Hırokı Sakaı, qazaq ádebıetin zertteýshi Mıkııa Nıshımýra, japon-qazaq sózdiginiń aýdarmashysy jáne qurastyrýshysy Shıgenobý Masýdjıma oryndady. Abaı Qunanbaıulynyń japon tilindegi kitaby Kún shyǵys eliniń kitaphanalary men oqý oryndaryna taratylady.
