Alynbaı qalǵan paıda – bul kásiporyndar jumysyn toqtatpaǵanda tabatyn aqshasy. Saıası turaqsyzdyqqa baılanysty jergilikti kásipkerler men shetel seriktesteri birlesken jumysyn ýaqytsha toqtatýǵa májbúr boldy. Bıznes-qaýymdastyqtar Ulttyq alıansynyń málimetinshe, 210 mıllıon dollarǵa baǵalanǵan 20-dan asa kelisimshart pen jobanyń kúshi joıyldy. Endi osynyń saldarynan elde jumyssyzdyq artyp, áleýmettik-ekonomıkalyq jaǵdaı nasharlaýy múmkin.
Anvar Abdraev, bankter odaǵynyń prezıdenti: "Bul máselelerdi tez arada sheshýimiz kerek. Biraq tolyqqandy jumys isteýimiz úshin árıne tynyshtyq pen qaýipsizdik qajet. Basymyzdan ótkendikten, biz de alańdaımyz. Bıznes-qaýymdastyqtardyń Ulttyq alıansy tez arada elde zańdylyq ornatýdy surap otyr. Júk tasymaly men qyzmetkerleriniń erkin qatynaýy jáne kásiporyndardyń qaýipsizdigi qamtamasyz etilýi tıis. Ásirese taý-ken salasynda ınvestorlardyń múlkin zańsyz tartyp alý áreketterin kesý úshin jedel toptar qurýǵa shaqyrdy", dep aıtyp ótti.
Al Investısııalardy tartý jáne qorǵaý agenttiginiń dırektory mindetin atqarýshy Nýradıl Baıasov: "Investısııalarsyz, kásipkerlersiz bolashaqta aýyr qıyndyqtarǵa tap bolamyz. Bıýdjetimizge de zııany keledi. Investorlar men kásipkerler jumys oryndaryn qurady. Al bul búkil halyq úshin paıdaly. Kásipkerler bılikten menshikti tartyp alýǵa jol bermeıtin zańdar qabyldaýyn surap otyr. Bul – úkimet pen parlament aldynda turǵan basty mindet. Jańadan saılanatyn Jogorký Kenesh eń aldymen osy máselelerdi qarastyrmaq. Al Ortalyq saılaý komıssııasy 6 qarashaǵa deıin jańa parlamenttik saılaýdyń merzimin belgileýi tıis", deıdi ol.
