Qostanaı oblysynyń Áýlıekól aýdanyna qarasty Qusmuryn aýylynyń turǵyny Álııanyń aıtýynsha, taıaýda ǵana mashına satyp alǵan qyz aıaǵy aýyr apasyn kóligine mingestirip Tobyldaǵy týystarynyń úıine qonaqqa barady. Tústen keıin tolǵaq qysa bastaǵan soń, apasyn apyl-ǵupyl kólikke mingizip alyp, oblystyq aýrýhanaǵa aparmaq bolady. Qalanyń ishinde adasyp ketip, edáýir ýaqyt uttyryp alǵan jeńil kólik júrgizýshisine, abyroı bolǵanda, jol polısııasynyń qyzmetkerleri kezdesip, aıaǵy aýyr kelinshekti der kezinde aýrýhanaǵa jetkizedi.
– Kólik júrgize bastaǵanyma kóp bola qoıǵan joq. Mashınany aýylda júrgizý jeńil, al qalada qıyn eken. Onyń ústine, perınataldyq ortalyqtyń mekenjaıyn da bilmeımin. Biraz adasyp ketip, ýaqyt joǵaltyp aldyq. Sátin salǵanda, Qostanaıda polısııanyń patrýldik kóligi kezdesip qalyp, birden kómek kórsetti, – deıdi júrgizýshi qyz.
Polısııa leıtenanttary Meıram Kárimbaev pen Amandyq Ábilǵazın kóp oılanbastan eki kelinshek mingesken kólikke medısınalyq mekemege deıin jol kórsetip ákeledi. Perzenthananyń qabyldaý bólimine deıin kirgizip, aıaǵy aýyr kelinshekti aýrýhana dárigerleriniń qolyna tabystaıdy.
Kóp keshikpeı tártip saqshylaryna jas bosanǵan ananyń ózi qońyraý shalyp, uldy bolǵanyn habarlaıdy. Apaly-sińliler endi polısııa departamentiniń basshylyǵyna hat jazyp, ózderi qysylǵan sátte kómekke kelip, qol ushyn sozǵan eki leıtenantty marapattap, ózderiniń alǵystaryn jetkizýdi ótinip otyr.
Qostanaı oblysy
