Prezıdent: Abaıdyń ósıeti – óskeleń urpaqtyń aınymas temirqazyǵy

Prezıdent Qasym-Jomart Toqaevtyń Semeı qalasyna jumys sapary "Uly aqyn Abaı uldarymen" eskertkishiniń ashylý saltanatymen bastaldy. Atalǵan kompozısııa danyshpan Abaı Qunanbaıulynyń 175 jyldyq mereıtoıyna oraı ashyldy. Eskertkishte Abaı uldary Aqylbaımen jáne Týraǵulmen birge beınelengen. Kompozısııa ıdeıasy portrettik uqsastyqty ǵana kózdemegen. Avtor uldarynyń uly ákesine degen erekshe mahabbaty men sheksiz maqtanysh sezimin beıneleýdi maqsat etken.

Memleket basshysy jurtshylyqty Abaı Qunanbaıulynyń 175 jyldyq mereıtoıymen quttyqtap, hakimdi birtutas ult bolyp ulyqtaý – bizdiń perzenttik paryzymyz ekenin atap ótti.

– Uly Abaı – bizdiń elimizdiń maqtanyshy ǵana emes, álemdik deńgeıdegi kemeńger. Ol – qazaqtyń jan-dúnıesiniń tuńǵıyǵyna boılaǵan dara tulǵa. Onyń óleńderi men qara sózderi – ulttyq bolmysymyzdyń aınasy. Abaı jańa ádebıetimizdiń negizin qalaǵan aqyn retinde el tarıhynda aıryqsha iz qaldyrdy. Onyń eńbekteri bir ǵasyrdan astam ýaqyt ótse de ózektiligin joǵaltqan emes. Áli kúnge deıin barshamyzǵa rýhanı azyq bolyp keledi. Aqynnyń ǵıbratty ǵumyry men mol murasy – halqymyzdyń jáne jahan jurtynyń asyl qazynasy. Abaıdyń ósıeti – óskeleń urpaqtyń aınymas temirqazyǵy, – dedi Qasym-Jomart Toqaev.  

Prezıdent damýdy tejeıtin bes dushpannan arylyp, eldik múdde jolynda eńbek etsek qana qoǵamdyq sanany jańǵyrtatynymyzdy aıta kelip, Abaı amanatyna adal bolýymyz kerek dedi. "Jaýapty memleket – jaýapty qoǵam – jaýapty adam" júıesiniń berik ornyǵýy aqyn aıtqan asyl qasıetterge baılanysty ekenine toqtaldy.

– Ol úshin búgingi býyn Abaı murasynan nár alyp, rýhanı kemeldenýi qajet. Myna eńseli eskertkish jas urpaqqa taǵylymdy oı salýǵa tıis. Abaı jáne onyń sózi men isin jalǵaǵan parasatty perzentteri Aqylbaı men Týraǵul – elge úlgi bolǵan tulǵalar. Munda urpaq sabaqtastyǵy, áke men balanyń syılastyǵy beınelengen. Bul – Qunanbaı qajy áýletiniń tektiligin tanytatyn týyndy. Abaı shańyraǵynyń taǵylymy – ult ulaǵatynyń kórinisi. Jalpy tálim-tárbıe ult sapasyn qalyptastyratyn basty faktordyń biri bolýy kerek! – dedi Memleket basshysy.

Prezıdent bıyl Abaıdyń 175 jyldyq mereıtoıyn atap ótýge erekshe mán berilgenin, memlekettik jáne halyqaralyq deńgeıde aýqymdy is-sharalar ótkenin, aqyn murasyn nasıhattaýǵa, ulaǵatty sózin jas urpaqtyń sanasyna sińirýge den qoıylǵanyn aıtty.

– Biz mereıtoı kezinde ysyrapshyldyq pen dańǵazalyqqa  jol bergen joqpyz. Abaı aıtqan "maqtanshaqtyq", "beker mal shashpaqty" tyıýdyń bir joly osy dep sanaımyn. Uly oıshyldyń murasy – elimizdiń odan ári ósip-órkendeýine jol ashatyn baǵa jetpes qundylyq. Abaıdyń asqaq rýhy uly murattarǵa jeteleı bersin! – dep túıindedi sózin Qasym-Jomart Toqaev.

Eskertkishtiń ashylý saltanatynan keıin Prezıdent Abaıdyń "Jıdebaı-Bórli" memlekettik tarıhı-mádenı jáne ádebı-memorıaldy qoryq-murajaıyn aralap kórdi. Murajaı 1940 jyly aqynnyń týǵanyna 95 jyl tolýyna oraı ashylǵan. Bul Qazaqstan tarıhynda tuńǵysh ádebı-memorıaldy murajaı sanalady.

Oıshyldyń 175 jyldyq mereıtoıyna oraı mýzeı zaldary qaıta jóndelip, ǵımarattyń qasbeti men aýmaǵy jańartylǵan. Búgin Memleket basshysy saltanatty túrde ashqan "Uly aqyn Abaı uldarymen" eskertkishi de osy murajaı aýmaǵynda ornalasqan. Prezıdentke murajaıdaǵy jańa ekspozısııalar usynyldy. Aıta keteıik, endi mýzeıge kelýshiler eksponattardy kórip qana qoımaı, zamanaýı qural-jabdyqtardyń kómegimen Abaı ómir súrgen zamannyń rýhyn sezinip, ulttyq aspaptardyń únin tyńdaı alady. Qasym-Jomart Toqaev mýltımedııalyq zaldyń jumysyna oń baǵa berdi.

Sonymen qatar Qazaqstan Prezıdentine "Aqynnyń balalyq shaǵy", "Aqynnyń qalyptasýy", "Aqynnyń shyǵarmashylyǵy", "Abaıdyń poezııalyq mektebi", "Otbasy", "Qara sózder" zaldaryndaǵy jádigerler tanystyrylyp, uly oıshyldyń ómiri men shyǵarmashylyǵy jaıynda jan-jaqty málimet berildi.