Oblystyq Polısııa departamentindegi krımınaldyq polısııa basqarmasynyń bastyǵy Meıram Bazarbaev mal urlyǵy kóbinese úı janýarlaryn qaraýsyz jibere salýdyń saldarynan bolatynyn aıtady. Jyl basynan beri polısııa qaraýsyz ketip qalǵan 114 bas maldy taýyp, ıelerine qaıtaryp bergen. Aımaqta mal urlyǵyna qatysty 145 oqıǵa tirkelip otyr. Basqarma bastyǵynyń aıtýynsha, bıyl mal urlyǵy ótken jylmen salystyrǵanda úsh ese azaıǵan. Al asa iri kólemdegi mal urlyǵy 60%-ǵa tómendegen.
Túlikti qaraýsyz jiberip, keıin kóz jazyp qalǵan soń malym urlandy dep polısııaǵa shaǵym túsiretin turǵyndar jıi kezdesedi. Taıaýda ǵana Qamysty aýdanynda dál osyndaı jaǵdaı oryn alǵan. Turǵyndardyń biri úıdiń mańynda jaıylyp júrgen quny 300 myń teńge turatyn sıyrynyń urlanǵany týraly aryz jazǵan soń polısııa dereý mal izdestirý sharasyna kirisedi.
– Aldymen izdestirý tobyn jasaqtap, aýyldyń mańyn eki kún boıy aınala sholyp, tas joldaǵy júk kólikterin toqtatyp, tekserdik. Sóıtsek kók sıyr qoldy bolmapty, óriste alańsyz kúıis qaıyryp jatyr eken. Eger turǵyndar malyn tańbalap, qaraýsyz qaldyrmasa mundaı keleńsiz oqıǵalar birneshe ese azaıatyn edi. Bizge kelip túsken árbir aryz resmı túrde tirkelip, mal urlyǵyna qatysty sotqa deıingi tergeý sharalary taǵaıyndalady. Odan keıin adam shyǵaryp, tehnıka bólip jedel izdestirý sharasyn bastaımyz. Osylaısha turǵyndardyń salǵyrttyǵy polısııany bos áýre-sarsańǵa salyp qoıatyn kezder jıi bolyp turady, – deıdi aýdandyq polısııa bóliminiń bastyǵy Erlan Mýsın.
Máslıhat depýtattary qabyldaǵan jańa erejege sáıkes, endi ár aýyldyq okrýgte qaraýsyz júrgen janýarlarǵa arnalǵan qamaý oryndary paıda bolady. «Tártip buzǵan» túlik osy malqamaqqa qamalyp, aıyppuly tólengen soń ǵana ıesine qaıtaryldy.
Osy oraıda, Qostanaı oblysynyń egin sharýashylyǵy jaqsy damyǵan soltústik aýdandarynda jergilikti turǵyndar aýyldyń mańynan mal jaıatyn qolaıly óris taba almaı otyrǵanyn aıta ketý kerek. Kóptegen aýyldyń aınalasyndaǵy qolaıly jaıylymdardy iri sharýashylyqtar menshiktep alǵandyqtan, jekeniń malyna tuıaq basar jer qalmaı qalyp otyr. Jergilikti ákimdikter turǵyndardyń jeke malyna dep arnaıy bólgen jaıylym, birinshiden, aýyldan shalǵaı bolsa, ekinshiden, qunarsyz jerler bolyp jatady. Mundaı jaıylymdar kúz bolmaı shańy shyǵyp, qara taqyrǵa aınalady. Al aýyl halqy azyn-aýlaq malyn kóbeıte almaı álek. Máslıhat depýtattary endi osy máseleni sheshýge kúsh salsa ıgi...
Qostanaı oblysy
