Qazirgi ýaqytta salada 96 kásiporyn jumys isteıdi, olardyń 33-i dárilik zattar, 41 medısınalyq buıymdar jáne 22 kásiporyn medısınalyq tehnıka shyǵarady. Kásiporyndardyń basym bóligi respýblıkanyń tórt aımaǵynda – Almaty, Shymkent qalalarynda, sondaı-aq Almaty jáne Qaraǵandy oblystarynda shoǵyrlanǵan.
Bul óńirlerde ǵylymı-tehnıkalyq ortalyqtardyń, damyǵan kólik ınfraqurylymynyń jáne jeke ósimdik shıkizatynyń bolýy kásiporyndardyń básekelestik artyqshylyqtaryn qamtamasyz etti.
Mysaly, "Dolce-Pharm" qazaqstandyq farmasevtıkalyq kompanııasy 22 jyl ishinde bir rettik medısınalyq buıymdardy óndirý salasynda joǵary kórsetkishterge qol jetkizdi. Kompanııanyń ónimderi elimizdiń medısınalyq mekemelerinde ǵana emes, ózge shet memleketterde de suranysqa ıe. Búgingi tańda zaýyt medısınalyq maqsattaǵy 250-den astam ataý shyǵarady, onyń ishinde medısınalyq betperdeler men qolǵaptar, bahılalar, sterıldi operasııalyq jıyntyqtar jáne bir rettik jaımalar. О́ndiristik keshen Almaty oblysy, Yntymaq kentinde ornalasqan, onda 355 adam eńbek etedi.
Zaýytta 6 óndiristik seh bar: sterıldi jáne sterıldi emes qolǵaptar óndirý sehy; "Ýltra-Adsorb" saýda markasymen belsendirilgen kómir óndirý sehy; medısınalyq maqsattaǵy buıymdar (halattar, betperdeler, qalpaqtar, jıyntyqtar) óndirisi; tórtinshi seh maqta men plastıkadan jasalǵan buıymdar óndirýge daıyndalǵan; etılen oksıdimen sterıldeý sehy jáne plastıkten jasalǵan buıymdar (kesek aına, Eıer shpatel, Folkman qasyǵy) óndirisi sehy. Bıyl kásiporyn shyǵarylatyn betperdeler qataryn keńeıtti jáne gınekologııalyq aınalar, maska-respıratorlar, fısh-maskalar, SI-maskalar jáne balalarǵa arnalǵan "batterflıaı" maskalary, sondaı-aq sýretpen bezendirilgen betperdelerdi shyǵara bastady.
Búginde kompanııa óz ónimderin Qyrǵyzstan, О́zbekstan, Túrkmenstan, Tájikstan jáne Reseı elderine eksporttaıdy. Bolashaqta shıkizatty qarama-qarsy jetkizýdi qamtamasyz etý shartymen Qytaımen yntymaqtastyq ornatý kózdelgen.
Sonymen qatar, kásiporyn toqylmaǵan mata óndiretin zaýyt salýdy josparlap otyr, sondaı-aq leıkoplastyr óndirisin uıymdastyrý kózdelýde. Toqylmaǵan mata óndirý jónindegi jobany iske asyrý jeke qorǵaný quraldaryn shyǵarý úshin otandyq kásiporyndardy óz shıkizatymen qamtamasyz etedi.
