Taıaýda Taraz qalasynda bastaý alǵan respýblıkalyq shara «Qazirgi zaman qaharmany» dep atalady. Qazaqstandyq polısııanyń oń ımıdjin qalyptastyrý, ishki ister organdarynyń jeke quramyn erlik, patrıottyq pen adamgershilikke tárbıeleý maqsatynda qolǵa alynǵan shara Halyq Qaharmany Ǵazız Baıtasov opat bolǵan orynǵa gúl shoqtaryn qoıýdan bastaldy. Osylaısha shara shymyldyǵy oǵan qatysqan barsha jurtshylyqtyń erlikke taǵzym etýimen ashyldy.
Taıaýda Taraz qalasynda bastaý alǵan respýblıkalyq shara «Qazirgi zaman qaharmany» dep atalady. Qazaqstandyq polısııanyń oń ımıdjin qalyptastyrý, ishki ister organdarynyń jeke quramyn erlik, patrıottyq pen adamgershilikke tárbıeleý maqsatynda qolǵa alynǵan shara Halyq Qaharmany Ǵazız Baıtasov opat bolǵan orynǵa gúl shoqtaryn qoıýdan bastaldy. Osylaısha shara shymyldyǵy oǵan qatysqan barsha jurtshylyqtyń erlikke taǵzym etýimen ashyldy.
Osydan dál eki jyl buryn tek Tarazdy emes, barsha qazaqstandyqtardy dúr silkindirgen oqıǵa eldiń esinen áli óshe qoıǵan joq. Qarashanyń 12-si kúni uıalaǵan úreı taby jurttyń júreginde áli de bar. Tarazdaǵy lańkestikten keıin elimizdiń ár aımaǵynan estilip qalǵan «jaryldy, atty, óltirdi» degen sýyq habarlarǵa el eleńdeýli, jurt alań. Eki jyl ótse de ǵazız janyn qurban etken kapıtan Baıtasovtyń, qarýly qylmyskerge qarsy turamyn dep sheıit bolǵan polısııa serjanttary – Polat Aıanqulov pen Jaqsybek Baıseıitovtiń esimderi el esinde, erlikteri erteńgi urpaqqa ónege.
Respýblıkalyq sharaǵa IIM Kadr departamenti, IIM Ishki áskerleri komıteti, Jambyl oblystyq IID, qalalyq IIB-niń basshylyǵy men jeke quramy, ardagerleri, oblystyq jáne qalalyq ákimdik ókilderi, sondaı-aq, elimizdiń túkpir-túkpirinen kelgen polısııa qyzmetkerleri qatysty. Bir aıta keterligi, óńirlerden osy sharaǵa arnaıy kelgen 21 tártip saqshysynyń barlyǵy qyzmet babynda erlik kórsetip, el alǵysyn alǵandar.
Polısııa kapıtany Ǵazız Baıtasov qaza tapqan jerge jınalǵan jurt – polısııa qyzmetkerleri men qala turǵyndary, JOO stýdentteri men mektep oqýshylary osydan eki jyl buryn qandyqol lańkesti quryqtaý kezinde qaza bolǵan saqshylardy bir mınýt únsizdikpen eske aldy.
El tynyshtyǵy úshin jandaryn qıyp, anttaryna adaldyq tanytqan asyl azamattardyń beınesi otanshyldyqtyń naqty úlgisi bolyp qalary sózsiz. Erdiń eriniń ǵana qolynan keletin qadamǵa baryp, beıbit kúnde jasaǵan batyrlyqtary bolashaq urpaq jadynda máńgi saqtalary da sózsiz.
«Qazirgi zaman qaharmany» sharasy ishki ister organdarynyń jas mamandaryna antqa adaldyq, qyzmettik mindetke tazalyq degen uǵymdardyń túp-tamyryn túsindirip beredi. Aǵa býyn retinde jastarǵa aıtar aqyl-keńesimiz ortaımaıdy. Alaıda, kózben kórip, qolmen ustap kórgen mundaı sharalardyń bereri mol, tálimi tereń», – deıdi Jambyl oblystyq IID ardagerler keńesiniń tóraǵasy, polısııa polkovnıgi О́rnekbaı Smaıylov.
Aksııaǵa Ǵazızdyń kózi – qos qulynyn ertip ákelgen Halyq Qaharmanynyń jary Gúljamal Tájıeva da qatysyp, erin umytpaǵan eline júrekjardy alǵysyn bildirdi.
Sharaǵa qatysýshylardyń JOO stýdentteri men qalanyń jalpy bilim beretin mektep oqýshylarymen kezdesýleri de josparlanǵan eken. Shara aıasynda 9 jalpy bilim beretin mektep, 2 JOO men 1 kolledjde kezdesýler uıymdastyrylyp, túrli is-sharalar qolǵa alynǵan.
Bir ýaqytta birneshe oqý oshaqtarynda uıymdastyrylǵan sharalardyń biri Jambyl atyndaǵy №5 mektep-gımnazııasynda ótti. Dál osy mektepte Ǵazız Baıtasovtyń úlken uly Armanjan 8-synypta oqıdy eken.
Sharaǵa qatysqan 21 jigittiń ishinde «Erligi úshin» medali jáne «Qazaqstan patrıoty» tósbelgisimen shoqtyǵy bıik Rústemdi sózge tartqanymyzda ol: «Shynymdy aıtsam, órtpen arpalysyp júrgende «Erlik jasap, erteń medal alamyn» degen oı basyńa kelmeıdi ǵoı. Ony oılaıtyn ýaqytyń da, múmkindigiń de joq. Kóz aldyńda adam ajalmen betpe-bet turǵanda qolyńnan kelgendi jasap qalýǵa meniń ornymda bolǵan kez kelgen adam umtylar edi. О́z basym solaı oılaımyn. Búgingi aksııaǵa elimizdiń túkpir-túkpirinen 21 tártip saqshysy jınaldy. Árqaısysynyń óz erligi bar, ár jigittiń qazaqstandyq polısııanyń abyroı-bedelin kóterýge qosqan óz úlesi bar. Olardy búgingi kúnniń qaharmandary dep uıalmaı aıtýǵa bolady», – dedi.
Árıne, mundaı mysaldardy kóptep keltirýge bolady. Aksııaǵa arnaıy kelgen 21 polısııa qyzmetkeriniń 21 túrli oqıǵasy osyndaı batyldyqqa, jiger men qurmetke toly.
Respýblıkalyq sharanyń ekinshi kúni Jambyl oblystyq IID alańynda ornalasqan Halyq Qaharmany Ǵazız Baıtasovtyń bıýstine jáne Dańq eskertkishine gúl shoqtaryn qoıýmen ashyldy. Bul sharaǵa Ishki ister mınıstriniń birinshi orynbasary, polısııa general-maıory Marat Demeýov pen oblys ákimi Qanat Bozymbaev qatysty.
Egemendi elimizdiń tarıhynda, onyń ishinde, el tynyshtyǵynyń aldyńǵy qatarynda turǵan qazaqstandyq polısııa jylnamasynda naǵyz erlik pen batyrlyqtyń mysaly az emes. О́kinishke qaraı, olardyń arasynda qyzmettik mindetterin atqarý kezinde kóz jumǵan, beıbit halyqtyń tynyshtyǵyn kúzetemin dep janyn qıǵan oǵylandar da bar. Etek-jeńimizdi jıyp, óz aldymyzǵa el bolǵan táýelsizdik jyldary qyzmet babynda júrip sheıit bolǵan tártip saqshylarynyń qaraly tizimi 710-ǵa jetipti. Onyń ishinde, 21-i Ishki ister mınıstrliginiń ishki ásker sarbazy. Árıne, halyq óz batyryn eshqashan umyt qaldyrǵan emes. Naǵyz erlerin batyrym dep basyna kóterip, baryn aldyna tosatyn halyqtyń urpaǵymyz ǵoı. Erlik eleýsiz qalmady, baǵalandy. Búgingi tańǵa deıin ishki ister organdary men ishki áskerdiń 877 qyzmetkeri Qazaqstan Respýblıkasynyń memlekettik nagradalarymen marapattalsa, ókinishke qaraı, taǵdyr qıyndyǵy kóp, jaýapkershiligi mol qyzmette úzilgen 90 saqshy bul marapatqa qaza bolǵannan keıin usynylǵan. Sol sebepti de Tarazda bastaý alǵan bul sharany osy qyzmettiń qıyndyǵyna tózip, aýyrtpalyǵyn arqalap kele jatqan búgingi kúnniń batyrlaryna jasalǵan qurmet, namys týyn jyqpaǵan erlikterine berilgen baǵa dep bilgen jón.
Baný RAHYMBAIQYZY,
jýrnalıst.
Jambyl oblysy.
Sýretti túsirgen avtor.
