Jattyqtyrýshylardyń aıtýynsha, kóbinese qazaqstandyq muǵalimder bilim berýdegi ınklıýzııa uǵymyn durys túsinbeıdi. Sondyqtan onlaın-trenıng oqytýshylardy tek praktıkalyq daǵdylarǵa ǵana emes, teorııalyq daǵdylarǵa da úıretýdi maqsat etedi.
"Biz pedagogtarǵa, birinshiden, ınklıýzıvti bilim berý týraly jalpy uǵymdy qalyptastyrýǵa kómektesý mindetin qoıdyq. Ekinshiden, mektepterde damytý qajet tásilder, júıeler týraly usynymdar berý. Úshinshiden, biz synyptaǵy bilim berýdiń praktıkalyq aspektisine, oqý josparyn qurýǵa, tehnologııalardy engizýge jáne t.b. kóshemiz", dedi Nazarbaev Ýnıversıtetiniń Joǵary bilim berý mektebiniń zertteý qyzmeti jónindegi vıse-dekany, doktor Maıkl Makoel.
Trenıngke qatysýǵa búkil Qazaqstannan 8 myń muǵalim ótinim berdi. Alaıda, onlaın-platforma usynatyn oryndar sanynyń shekteýli bolýyna baılanysty osy baǵytta 3 myń pedagog oqýdan ótýde.
Pedagogtardy ınklıýzıvti bilim berý negizderine oqytý jónindegi bastama ásirese memleket basshysynyń 22 qazandaǵy Ulttyq qoǵamdyq senim keńesiniń otyrysynda aıtylǵan málimdemesi aıasynda erekshe ózekti.
"Memleket ınklıýzıvti bilim berý, kedergisiz orta qurý, ınfraqurylymdyq qoljetimdilikti qamtamasyz etý, osyndaı tulǵalardy jumysqa ornalastyrý múmkindikterin keńeıtý máselelerine basa nazar aýdara bastady. Alaıda bul sharalar qabyldanǵanyna qaramastan, olar erekshe qajettilikteri bar adamdardyń muqtajdyqtaryn qanaǵattandyrý úshin áli de jetkiliksiz", dedi Qazaqstan prezıdenti Qasym-Jomart Toqaev.
Osylaısha, Joǵary bilim berý mektebiniń jattyqtyrýshylarynyń pikirinshe, Nazarbaev Ýnıversıtetiniń onlaın-trenıngi – bul ár adam jynysyna, jasyna, mentaldyq nemese fızıkalyq jaǵdaıyna qaramastan, ózin tolyq quqyqty azamat retinde sezinetin eldegi ınklıýzıvti qoǵamdy damytý baǵytyndaǵy úlken qadam.
D-r Makoeldiń aıtýynsha, qarjylandyrý kólemi jetkilikti bolǵan jaǵdaıda mundaı trenıngterdi turaqty negizde ótkizýdi josparlap otyr.
