Fýnksıonaldyq ýltradybystyq jáne sáýlelik dıagnostıka jasaý bólimshesiniń meńgerýshisi Qaırat Mýrzalınniń aıtýynsha, bólimshe zamanaýı jabdyqtarmen jáne bilikti mamandarmen jasaqtalǵan.
Qaırat Erbolatuly: "Bizde ýltradybystyq zertteýler men kompıýterlik tomografııanyń barlyq túrleri jasalady, endi gamma-kamerany iske qostyq. Júrektiń dıagnostıkalyq zerttelýiniń mańyzdylyǵyn túsine otyryp, biz mıokardtyń perfýzııalyq ssıntıgrafııasy sekildi zertteýge erekshe kóńil bóletin bolamyz", dedi.
Osy aptada biz mıokardtyń ssıntıgrafııasyn jasadyq. Mıokard – bul júrektiń bulshyqeti. Júrek – adam aǵzasyndaǵy mańyzdy múshe. Onyń fýnksıonaldyq qyzmeti buzylǵan jaǵdaıda adamnyń ádettegi ómir súrý sapasy tómendeıdi.
Júrek bulshyqetiniń patologııasy bar adam ádettegi belsendiligin saqtap, aýyrǵanǵa deıingi ómir súrý saltyn saqtaı almaıdy. Mıokardtyń ssıntıgrafııasyn jasaý úshin mıokardtyń tinderinde jınalýǵa qabiletti ızotoptar paıdalanylady. Olar zertteletin aımaqqa júrek bulshyqetiniń qan aǵymy arqyly túsedi de, qanmen qamtamasyz etilýi tolyǵyraq bolatyn jerde tunyp qalady. Prosess túrli-tústi sýretterde jaqsy kórinedi. Gamma-kamera sáýleni anyqtaıdy.
Zertteý jasap otyrǵan dáriger ony kompıýterge jibergennen keıin júrektiń qaı aýmaǵy jaqsy, qaısysy nashar qanmen qamtamasyz etiletindigin kórip otyrady. Eger mıokardtyń sýreti tús aıyrmashylyǵy bolmaı, tegis jáne aıqyn bolsa, onda júrek tolyǵymen saý ekenin kórsetedi.
Radıoızotopty ádis zertteýge daıyndalý kezinde ádettegi ómir súrý saltyn buzbaı, preparatty aǵzadan tabıǵı túrde esh zııansyz shyǵarýǵa múmkindik beredi. Prosedýradan keıingi jarty táýlik ishinde aǵzada radıofarmasevtıkalyq preparat qalmaıdy. Qajet bolǵan jaǵdaıda az ýaqyt ótken soń prosedýrany qaıtalaýǵa bolady. Zertteý qaýipsiz, eshqandaı keri áserleri joq.
"Kelesi aptada biz qalqansha beziniń ssıntıgrafııasyn jasaýdy josparlap otyrmyz", deıdi bólimshe meńgerýshisi.
Bul apparat júrek-qan tamyr júıesi, asqazan-ishek joldary, endokrındik jáne basqa da patologııalary bar pasıentterdi zertteýdiń sapasy men kólemin arttyrýǵa múmkindik beredi.
Osy zertteýdiń (mıokardtyń perfýzııalyq ssıntıgrafııasy) kómegimen operasııaǵa deıin jáne operasııadan keıingi kezeńdegi júrektiń ıshemııalyq aýrýy men mıokardtyń jaǵdaıyn da dıagnostıkalaý, júrekti emdeý men oǵan jasalatyn operasııalardyń sapasyn arttyrýǵa múmkindik beredi.
ALMATY
