Basqarma basshysynyń aıtýynsha, búginde óńirde 10 túrli konfessııaǵa qatysty 110 dinı birlestik qyzmet atqarady. Olardyń 31-i ıslam, 33-i pravoslav, 4-eýi katolık, 41-i protestant, bireýi krıshnaıt dinine jatady. Dinı birlestikterdiń bári ádilet organdarynda tirkelgen jáne qoldanystaǵy zańnama normalary sheńberinde áreket etedi.
– Oblys aýmaǵynda 99 dinı nysan jumys isteıdi. 35 meshit, 30 pravoslavıe shirkeýi, 4 katolık kosteli, 30 namaz úıi bar. Al qalǵan dinı birlestikter jalǵa alynǵan páterlerde óz is-sharalaryn ótkizedi. Sonymen qatar mıssıonerlikpen aınalysatyn 11 adam bar. Bári Túrkııa, Polsha, Reseı, Qyrǵyzstannan kelgen sheteldik azamat. Olar Qazaqstan Respýblıkasynyń zań talaptary sheńberinde jumys istep júr. О́ńirde destrýktıvti dinı birlestikter, sondaı-aq shetelde dinı negizde áskerı qaqtyǵystarǵa qatysqan turǵyndar tirkelmegen, – dedi J.Úmbetov.
Bıyl din isteri basqarmasy men polıseıler din salasyndaǵy zańnama normalaryn buzýdyń 9 faktisin anyqtap otyr. Zańǵa qaıshy áreket etkenderge sot qaýlysymen jalpy somasy 1 mln 374 myń 355 teńgeniń ústinde aıyppul salynǵan.
Oblystaǵy din saıasatyna jaýapty mekeme jyl basynan beri úkimettik emes uıymdardyń kómegimen konfessııaaralyq jáne etnosaralyq kelisimdi qamtamasyz etýge, dinı saýattylyq pen tolerantty sanany arttyrýǵa, memleket damýynyń zaıyrly qaǵıdattaryn nyǵaıtýǵa, dinı ekstremızm men terrorızmniń aldyn alýǵa baǵyttalǵan 849 is-shara ótkizgen. Bıyl oblysta memlekettik áleýmettik tapsyrys boıynsha dinı ekstremızm men terrorızmniń aldyn alýdy jáne destrýktıvtik dinı aǵymdardyń qyzmetinen zardap shekkenderge kómek kórsetýdi kózdeıtin 2 joba qolǵa alynǵan. Alǵashqy jobany «Sosıým&Iа» qoǵamdyq birlestigi, al ekinshisin «Qostanaı oblysynyń psıhologter qaýymdastyǵy» qoǵamdyq qory júzege asyryp jatyr. Bul jobalar dinı ekstremızm men terrorızm ıdeıalarynyń aldyn alýǵa, halyqtyń dinı saýattylyǵyn arttyrýǵa, destrýktıvti dinı uıymdardyń qyzmetinen zardap shekken adamdarǵa ýaqtyly jáne sapaly konsýltasııalyq, psıhologııalyq, zańgerlik kómek kórsetýge baǵyttalǵan.
Aımaqta byltyrǵy sáýir aıynan beri aqparattyq qaýipsizdikti qamtamasyz etetin «Kıber baqylaý» júıesi jumys isteıdi. Dintaný saraptamasynyń qorytyndysy boıynsha atalǵan júıe arqyly tekserilgen 7 myńnan astam materıaldyń 6466-sy ekstremıstik materıal dep tanylyp otyr.
Basqarma basshysynyń aıtýynsha, jalpy, Qostanaı oblysynda konfessııaaralyq saladaǵy jaǵdaı turaqty, memlekettik-konfessııalyq jáne konfessııaaralyq qatynastar qalypty damýda. Dinı faktorlarǵa baılanysty ashyq qaqtyǵystar men tereń qaıshylyqtar joq.
Qostanaı oblysy
