Sondyqtan jaýaptylar páter aralap, qyzmet tutynýshylaryna eskertý jasaýǵa májbúr. Biraq keıbir páter ıeleri tipti esigin de ashpaıdy eken.
Jylý taratýshy ortalyqtyń mamandary boryshkerlerdiń úıdi-úıin aralaýdan jalyqpaıdy. Bul joly qala ortalyǵyndaǵy "Sport" shaǵyn aýdanyndaǵy qaryzy bar páterlerdiń esikterinen syǵalaýda. Aıtýlarynsha, eń qaryzy kóp turǵyndar qalanyń osy ortalyq bóliginde turady. Bereshegi 300 myńnan asqan myna úıdegiler páter ıesi basqa, kommýnaldyq qyzmet aqysyn tóleýge mindetti emespiz dep aqtaldy. Al úı ıesi jańa jylǵa deıin tóleımin dep sólesýden qashqaqtady.
Páterin jalǵa berýshilermen jolyǵý qıynnyń qıyny deıdi sala mamandary. Biri kúndiz úıinde bolmasa, ekinshisi esigin de ashpaıtyn kórinedi.
Jylýǵa tólemeıtinderdiń qatary kóbeıse de, osy kúnge deıin olardyń birde-biri júıeden ajyratylmapty. Karantındik rejımde turǵyndar jaǵdaıyn tómendetkeni bar. Sondyqtan ázirge tek túsindirýmen shektelip jatyrmyz deıdi mamandar.
"Búgingi tańǵa debıtorlyq qaryzymyz qala boıynsha 73169 abonentti quraıdy. Onyń ishinde 202 mln teńge bereshek qaryzymyz bar. Atap aıtqanda, Abaı aýdanynda 27 mln, Ál-Farabı aýdanynda 62 mln, Eńbekshide 68 mln, Qarataý aýdanynda 43 mln-dy qurap otyr", dedi "QÝATJYLÝORTALYQ" mekemesiniń bólim basshysy Asqar Bóleshov.
Sonda da boryshkerlermen kúres toqtamaıdy. Qaryzdy qaıtarý úshin sotqa júginýge májbúrmiz deıdi jaýaptylar. Osy kúnge deıin sot arqyly 8 mln teńgege jýyq qarjy óndirilgen. Biraq odan jaǵdaı túbegeıli ózgermeıtini anyq. О́ıtkeni qalada 73 myńnan asa boryshker bar. Olardyń barlyǵynyń beresheginiń jıyntyǵy 202 mln teńgeden asady.
