Aımaqtar • 27 Qazan, 2020

Túrkistan oblysynda epıdemııalyq ahýal turaqtalyp keledi

314 ret kórsetildi

Túrkistan oblysy boıynsha koronavırýstyq ınfeksııamen aýyratyn naýqastardy emdeýge jatqyzý úshin turaqty negizde 600 ınfeksııalyq jáne 100 karantındik tósek-oryn daıyn. Qosymsha qajet bolǵanda oryn sanyn 5610-ǵa deıin ulǵaıtýǵa múmkindik bar. Qazirgi tańda óńirde epıdemıologııalyq ahýal turaqty. Bul jaıynda О́ńirlik kommýnıkasııalar qyzmetinde oblystyq qoǵamdyq densaýlyq basqarmasynyń basshysy Marat Pashımov málimdedi, dep habarlaıdy Egemen.kz oblys ákiminiń baspasóz qyzmetine silteme jasap.

"Oblysta medısınalyq uıymdardyń materıaldyq-tehnıkalyq bazasy joǵary deńgeıde jasaqtalǵan. Ottegi stansııasynyń sany 2 esege artyp, jalpy 8 stansııa bar. Sondaı-aq 80 birlik oksıgenasııa apparaty satyp alyndy.  Budan bólek, ottegi konsentratorlarynyń sany 890 birlikke jetti. Ottegi núkteleriniń sany 9,7 esege artyp, 205-ten 2005 núktege deıin ulǵaıdy. Aǵymdaǵy jyly oblystyq bıýdjet esebinen 1 kompıýterlik tomograf pen 3 sandyq rentgen apparattary ornatyldy. Medısınalyq uıymdarda pýlsoksımetrdiń qamtamasyz etilýi 190-nan 3879-ǵa deıin jetip otyr", - dedi basqarma basshysy.

Sonymen qatar oblysta PTR zerthanalarynyń sany 3 birlikten 9 birlikke deıin ósip, kún saıyn 2,5 myńnan astam zertteýlerge múmkindik berýde. Budan ózge, 12 birlik jyljymaly medısınalyq keshen jıyntyǵy satyp alynýda. Nátıjesinde jyljymaly medısınalyq keshenmen aýdandardy qamtamasyz etý kórsetkishi 100%-dy quraıtyn bolady. Jedel-járdem qyzmetine jyl sońyna deıin 122 avtokólik satyp alý josparlanǵan. Bul avtokólikter jedel-járdem qyzmeti parkin 96%-ǵa jańartýǵa múmkindik beredi.

Aıta keterligi, medısınalyq uıymdarda 2 aılyq dári-dármek qory bar. О́ńirde turǵyndardy dárilik zattar men medısınalyq buıymdarǵa qoljetimdiligin qamtamasyz etý maqsatynda bólshek saýda dárihanalary arqyly jergilikti turaqtandyrý qory qurylǵan. Jalpy oblys aýmaǵynda 557 bólshek saýda dárihanalary qyzmet atqarady. Onyń 238-men ózara árekettesý týraly Memorandýmǵa qol qoıyldy. Halyqty betperdelermen úzdiksiz qamtamasyz etý úshin eresekterge 1,5 mln dana jáne balalar úshin 1 mln dana qosymsha tapsyrys berildi.

Túrkistan oblysynda pandemııa bastalǵaly COVID-19 ınfeksııasyn juqtyrǵan  3 408 jaǵdaı tirkelgen. Jazylyp shyqqandar sany – 3 349, qaıtys bolǵandar – 46.

Uqsas jańalyqtar