Ańyzǵa sengish halyqtyń urpaǵy retinde kónekózder osynaý qut mekenniń qadir-qasıetin urpaqtar sanasyna uıalatyp keledi.
Jahandanýmen jaǵa ustasqan búginde bul rýhanı maıdan burynǵysynan da qyza túsýde. Ulttyń upaıyn túgender tusta taǵylymdy tarıhy bar Qazyǵurttyń qadir-qasıetin keıingi tolqynnyń kóńil kókjıegine qondyrý úshin birqatar aýqymdy jumys qolǵa alynýda.
Sol ershimdi eńbektiń ishinde ońtústik jýrnalıstıkasynyń ardageri Baıdýlla Qonysbek aǵamyz tóraǵalyq etetin «Kıeli Qazyǵurt» qoǵamdyq qorynyń tyndyrymdy tirligin erekshe atap ótýge bolady.
2000 jyldan beri kıeli Qazyǵurt taýynyń tarıhı mańyzyn jan-jaqty nasıhattaý maqsatynda qurylǵan qoǵamdyq qor búginge deıin kóptegen is-shara atqardy.
Tarıhqa taǵzym jasalǵan sol sharalardyń birinde, naqtyraǵy 2007 jyly «Kıeli Qazyǵurt» qoǵamdyq qorynyń uıymdastyrýymen Qazyǵurt taýynyń ushar basyna bıiktigi 7 metr, taban aýdany 4h4 metr bolatyn «Qazyǵurt – Altyn qazyq» atty eskertkish qoıylǵan edi. Eskertkishtiń tóbesindegi dıametri 1 metr bolatyn aınashar búginde Shymkent qalasynan jarqyrap kórinip turady.
Osy eskertkishtiń sımvolıkalyq belgisi, ıaǵnı «Qazyǵurt – Altyn qazyq» arnaıy belgisi 2012 jyldan bastap túrli salalarda eleýli jetistikke jetken, el tatýlyǵy men birliginiń nyǵaıýyna aıtarlyqtaı úles qosqan, sonymen qatar óziniń ıgi isterimen kópshilikke úlgi bolyp júrgen memleketshil hám eljandy tulǵalarǵa berilip keledi.
Jyl saıyn dástúrli túrde tabystalatyn bul marapatqa bıyl ólkeniń órkendeýine eńbek sińirgen 4 azamat laıyq dep tanylypty.
Mine, sol ıgi sharany ótkizý úshin tańmen talasa tal besik – Qazyǵurtty betke alǵan bir top zııaly qaýym áýeli Tólebı aýdanyndaǵy Ǵaıyp Eren Qyryq Shilten áýlıege, onan ári Aqbýra áýlıe kesenesine zııarat etip, Qazyǵurttyń etegine bir sát damyldady.
«Jebe» baspa úıiniń dırektory Jarqynbek Tóltebaev Qazyǵurttyń kópshilik bile bermeıtin qupııalarymen bólisip, týrısterge qolaıly orta qalyptastyrýdy maqsat tutqan jobalarmen tanystyrdy.
Bir áttegenaıy, eks ákim Janseıit Túımebaevtyń tusynda qolǵa alynǵan «Naýryz Qazyǵurttan bastalady» sharasy, Qazyǵurt taýyn týrızm ortalyǵyna aınaldyrý jobasy jalǵasyn tappaı otyr. Jergilikti bılik ókilderiniń aıtýynsha, birinshi álemdi jaýlaǵan indet, ekinshiden bıýdjettik qolbaılaý keleli iske kedergi keltiripti.
Qazaqstannyń kıeli jerler tizimine engen áýlıeli oryndarǵa jasalǵan sapardyń sońy oblystyq «Ońtústik Qazaqstan» gazetinde jalǵasyn tapty. Qordyń tóraǵasy Baıdýlla Qonysbek ótken sharanyń mán-mańyzyna toqtalyp, saltanatty marapattaý rásimin ashyp berdi.
«Kıeli Qazyǵurt» – eldi yntymaq-birlikke, dostyqqa shaqyratyn qordyń biri. О́ıtkeni «Kıeli Qazyǵurt» degen ataýynyń ózi úlken jaýapkershilik pen aýqymdy mindet júkteıdi. Qurylǵanyna 20 jyldan astam ýaqyt boldy. Sol jyldardyń ishinde alǵa qoıǵan maqsaty – Nuh paıǵambardyń kemesi Qazyǵurtqa toqtaǵanyn, sóıtip kúlli adamzattyń tirshiligi osy jerden ósip-ónip, taraǵan degen aqıqaty basym ańyzdy jalpaq álemge jarııalaý. Qolymyzdan kelgenshe sony nasıhattap kelemiz. Bul týraly birneshe derekti fılm, mýltfılm túsirdik. Kitaptar shyǵardyq. Búgingi tabystalar marapat, marapattalýshy azamattar arqyly biz Qazyǵurt ataýynyń bedelin onan beri bıiktete beremiz», deıdi qordyń tóraǵasy Baıdýlla Qonysbek.
«Kıeli Qazyǵurt» qoǵamdyq qorynyń uıytqy bolýymen dástúrli túrde ótkiziletin «Qazyǵurt – Altyn qazyq» marapaty bıyl 4 azamatqa tapsyryldy. Olar – respýblıkalyq «Egemen Qazaqstan» gazetiniń basqarma tóraǵasy, Halyqaralyq Túrki akademııasynyń prezıdenti Darhan Qydyráli, Ońtústik Qazaqstan oblysynyń, Qazyǵurt, Tólebı aýdandarynyń Qurmetti azamaty Ismat Tursynqululy, Ońtústik Qazaqstan oblysy, Shymkent qalasynyń qurmetti azamaty Ábdiǵanı Tashqaraev, Túrkistan oblysy, Shymkent qalasy ákiminiń burynǵy orynbasary Erbol Sadyr.
Alqaly jıynda marapat ıegerleriniń qaı-qaısysy da óz salasynda el ıgiligi úshin eńbek etken eleýli tulǵalar ekendigi tilge tıek etildi. Ári barsha marapattalýshylardy «Kıeli Qazyǵurt» ataýyna qyzmet etýge, nasıhattaýǵa shaqyrdy.
Belgili jazýshy, halyqaralyq «Alash» ádebı syılyǵynyń laýreaty Marhabat Baıǵut Tuńǵysh Prezıdentimiz Nursultan Nazarbaevtyń «Rýhanı jańǵyrý: bolashaqqa baǵdar» atty maqalasyndaǵy máseleler osy qoǵamdyq qordyń jumysymen ushtasyp jatqanyn aıtty.
«Elbasynyń maqalasynda «Týǵan jer» baǵdarlamasy týraly keremet aıtylǵan. «Qazaqstannyń qasıetti oryndaryn kórkeıtý úshin jergilikti ákimdikter men qoǵamdyq uıymdar ne isteý kerek?» degen máseleni naqty kórsetip bergen. Sol «Týǵan jer» jobasynyń aıasynda «Kıeli Qazyǵurt» qory da úlken jumys atqaryp keledi. «Qazyǵurt – Altyn qazyq» belgisi kıeli jerlerdi nasıhattaý úshin túrli saladaǵy qoǵam jáne memleket qaıratkerlerine berilip kele jatyr», dedi qarymdy qalamger.
Shara sońynda osyǵan deıin atalǵan syılyqtyń 30-ǵa tarta azamatqa tapsyrylǵanyn, olardyń qatarynda el úshin aıanbaı ter tókken tulǵalar barshylyq ekendigi aıtyldy. Máselen, «Asqar Myrzahmetov, Saýytbek Abdrahmanov, Beket Turǵaraev syndy el aǵalarynyń marapatqa ıe bolǵandyǵy atalǵan syılyqtyń bedelin bıiktete tústi», deıdi shara uıymdastyrýshylary.
О́z kezeginde keýdesine medal taqqan alqaýly azamattar sóz alyp, qor tóraǵasy men múshelerine óz alǵystaryn bildirdi.
Keleli jıynda ańyzǵa arqaý bolǵan Qazyǵurt taýyn Uly Jibek joly boıyndaǵy týrıstik baǵyttyń bir tarmaǵyna aınaldyrý úshin memleketten qoldaý suraıtyn hat daıyndalatyn boldy. Sondaı-aq Qazyǵurt asýynda qańqasy turǵan alyp kemeniń maketin jańartý úshin kásipker azamattardy qor jumysyna belsene atsalysýǵa shaqyrdy.
Qazyǵurt – Shymkent
