Dárishananyń ashylý rásimine oqý ornynyń basshylyǵy men professorlyq-oqytýshylyq quramy, generaldyń burynǵy áriptes dostary men týǵan-týysy jınaldy.
Zamanaýı tehnologııamen jabdyqtalǵan oqý zalynyń lentasyn JOO-nyń bastyǵy polısııa polkovnıgi Nurlan Bıekenov pen otstavkadaǵy sýdıa Baqytqazy Ordabaev qıdy.
– Osy bilim ordasynyń qalyptasýyna eleýli eńbek sińirgen belgili tulǵalardyń esimi umytylmaýy tıis. Olardyń ónegeli ómiri men eńbek joly búgingi jas býyn úshin úlgi-ónege bolýy qajet. Osyndaı maqsatta búgin ashylǵan jańa dárishanada ótetin sabaqtar ishki ister organdaryna eren eńbek sińirgen qaıratker, osy joǵary oqý ornyn birinshi bolyp basqarǵan Talap Qabdenulynyń qyzmetimen sabaqtasa ótýi kerek dep oılaımyn. Kýrsanttarymyzdyń boıyna otanshyl sezim uıalatyp, Talap aǵanyń eńbek jolyn ónege ete bilsek, jastardyń naǵyz elshil, memleket múddesine adal azamat bolyp qalyptasýyna óz septigimizdi tıgize alǵanymyz, – dedi NurlanBıekenov.
Zoom platformasynda uıymdastyrylǵan sharaǵa Talap Qabdenovtiń ózi de qatysty. Ol: «Beıne baılanysqa shyǵyp, ózderińizben júzdesip otyrǵanyma qýanyshtymyn. Qıyn kezeńde ashylǵan joǵary mekteptiń – ınstıtýt, odan ári akademııa bolyp qaıta qurylǵany, oǵan Shyraqbek Qabylbaev esiminiń berilýi zor abyroı. Shyraqbek Qabylbaev – ishki ister organdarynyń qara nary ispettes bolǵan tulǵa. Osyny árdaıym eskerip júrseńizder, búgingi ıgi sharalaryńyz da jastardy tárbıeleýge septigin tıgizse eken deımin. Ozyq oqytý quraldarymen jaraqtandyrylǵan zal oqytýshyǵa qanat bitiredi. О́ziniń bilimin aýdıtorııaǵa uǵynyqty túrde, jan-jaqty jetkizýine jol ashady. Sondyqtan da bilim nárin sińirýde zamanaýı dáris zalynyń róli qashanda zor.Sizderdiń osyndaı ár oń qadamdaryńyz meni qatty qýantady» – dep rızashylyq sezimin bildirdi.
Budan ári LED ekrannan joǵary oqý ornynyń tarıhynan, onyń tuńǵysh bastyǵy Talap Qabdenulynyń ónegeli ómir joly men ǵıbratty qyzmetinen syr shertetin derekti fılm kórsetildi.
Shara sońynda, máni erekshe ıgi iske jınalǵandar generaldyń kórneki portreti aıasynda sýretke túsip, bilim oshaǵynyń murajaıymen tanysty.
Qostanaı oblysy
