Bıznes • 03 Qarasha, 2020

Salymshylardyń tabysy artty

155 ret

kórsetildi

2 mın

oqý úshin

Bıylǵy 9 aıda Biryńǵaı jınaqtaýshy zeınetaqy qory salymshylarynyń shottarynda 12,5 trln teńge mólsherinde qarjylaı qor jınaqtaldy. Qordyń málimetine sáıkes, 2019 jylǵy kezeńimen salystyrǵanda 598,6 mlrd teńgege artyq ósim negizinen salymshylardyń shottaryndaǵy 1,08 trln teńgeden astam taza ınvestısııalyq tabys esebinen qalyptasty.

Jaqsylyq SAǴADAT

Zeınetaqy jınaqtarynyń negizgi somasy mindetti zeınetaqy jarnalary (MZJ) esebinen qalyptasyp, 12,2 trln teńgeni qurady (2020 jyldyń basynan bergi ósim – 16%). Mindetti kásiptik zeınetaqy jarnalary (MKZJ) boıynsha zeınetaqy jınaqtarynyń somasy 301,9 mlrd teńge (ósim – 23%), erikti zeınetaqy jarnalary (EZJ) boıynsha zeınetaqy jınaqtarynyń somasy 2,14 mlrd teńgege jetti (ósim – 10%).

1 qazandaǵy jaǵdaıǵa sáıkes, BJZQ-daǵy jeke zeınetaqy shottarynyń sany 2019 jyldyń sáıkes kezeńimen salystyrǵanda 1,2 mln-ǵa jýyqtady.

Byltyr jeke zeınetaqy shottarynyń sany 10,6 mln birlikti (10 576 023) qurasa, bıyl 11,7 mln-nan (11 729 797) asty. Osylaısha bir jyldaǵy ósim 11% boldy.

Shottardyń eń kóp sany mindetti zeınetaqy jarnalary (MZJ) boıynsha ashylǵan – olar shamamen 11 mln, dálirek aıtqanda 10 982 963 (jyl basynan bergi ósim – 11%).

Mindetti kásiptik zeınetaqy jarnalary (MKZJ) esebinen qalyptasqan shottar – 521 681 (ósim – 2%), erikti zeınetaqy jarnalarynyń (EZJ) sany da birtindep ósýde, qazir BJZQ-daǵy mundaı shottardyń sany – 56 517 (ósim – 4%).

Salymshylardyń shottaryna 2020 jyldyń basynan beri jalpy kólemi 777,07 mlrd teńge zeınetaqy jarnalary aýdaryldy, bul 2019 jyldyń 9 aıyndaǵy kórsetkishten 61,7 mlrd teńgege nemese 9% artyq. Jarnalardyń jalpy kóleminiń 95,4%-y BJZQ-ǵa MZJ boıynsha aýdarylǵan 740,2 mlrd teńge mólsherindegi túsimder quraıdy. 35,2 mlrd teńge MKZJ boıynsha, al 353 mln teńge EZJ boıynsha jınaqtalǵan.

Tólemder 138,5 mlrd teńgeni qurap, olardyń basym bóligi, atap aıtqanda 33% jasyna baılanysty tólemderge (46,1 mlrd teńge), saqtandyrý uıymdaryna aýdarymdarǵa (36,1 mlrd teńge), Qazaqstannan tys jerlerge turaqty turýǵa ketý boıynsha (27,6 mlrd teńge), muragerlerge (24,5 mlrd teńge), jerleýge (3,01 mlrd teńge), múgedektik boıynsha tólemderge (1,1 mlrd teńge) tıesili boldy.