Qalanyń Memlekettik aktıvter basqarmasynyń basshysy Rústem Álıev О́ńirlik kommýnıkasııalar qyzmetiniń alańynda ótken onlaın brıfıngte Almaty ákiminiń ıesiz jelilerdi qala balansyna berý tapsyrmasy qalaı júzege asyrylyp jatqany týraly baıandady.
Osy maqsatta bıyl «Alataý Jaryq Kompanııasy» AQ-da elektr jelileri men jabdyqtarynyń 117 nysanyn berý rásimi júrgizildi. 2019 jyly «AJK» AQ-na elektr jelileri men jabdyqtarynyń 544 nysany tapsyryldy. Barlyǵy eki jylda 661 nysan ótti.
«Bul sharalar qala turǵyndaryna sapaly kommýnaldyq qyzmetterdi alýǵa, tarıfterdiń tómendeýine jáne jalpyqalalyq tarıftermen teńestirilýine alyp keledi», dedi R.Álıev.
Sonymen qatar ıesiz jelilerdi qala balansyna berý kommýnaldyq qyzmetterge tótenshe jaǵdaılarda jedel áreket etýge múmkindik beredi. О́ıtkeni bul – tirshilikti qamtamasyz etý nysandaryndaǵy kommýnaldyq apattardyń basty sebepteriniń biri.
Injenerlik jelilerdi ıesiz dep taný rásimi Azamattyq kodekstiń 242-babyna sáıkes júzege asyrylady. Atap aıtqanda aýdandyq ákimdikter turǵyndardyń ótinishterin jınaıdy, energııa tıimdiligi jáne ınfraqurylymdyq damý basqarmasy men kommýnaldyq qyzmetterdi jetkizýshilermen birlesip, qaıtalanýdy boldyrmaý maqsatynda ıesiz nysandardyń tizbesi daıyndalady. Budan ári ıesiz nysandar tizbesi Memlekettik aktıvter basqarmasyna jiberilip, basqarma óz kezeginde nysandardy ıesiz dep taný rásimin bastaıdy.
ALMATY
