Osylaısha, 15-20 jylǵa ıpotekalyq nesıe resimdep, moıyndaryna uzaqmerzimdik bank qamytyn kıgen 72 otbasy 10 aıdan beri quzyrly oryndardyń tabaldyryǵyn tozdyryp, eń bolmasa lıftini iske qosyp berýdi ótingenimen, shendiler qurǵaq ýádeden basqa eshbir kómek kórsete qoımaǵan.
Bul úıdiń joǵary qabatynda turatyn qart adamdar lıftiniń joǵynan 10 aı boıy úıinen shyǵa almaı, tórt qabyrǵada qamalyp otyr. Toǵyzynshy qabattaǵy 72-páterde turatyn zeınetker Marfýǵa Tólegenova 8-9-qabatta turatyn 4-5 keıýana aǵash basyna órmelep shyǵyp, qaıtyp túse almaı qalǵan mysyqtyń kebin kıip otyrǵanyn aıtady.
– Jeltoqsan aıynda osy úıge qonystanǵanymyzǵa bir jyl tolady. Lıft joq. Aı saıyn ýáde beredi, biraq oryndalmaıdy. О́zim naýqas adammyn. Jasym 62-den asyp barady. 9-qabatta turamyn. Túsip, qaıta kóterilý muńǵa aınaldy. Qan qysymym joǵarylap, qaıta-qaıta jedel járdem shaqyramyn. Olardyń da kelgisi kelmeıdi. О́ıtkeni 9-qabatqa baspaldaqpen kóterilý qıyn. Bul qashanǵa jalǵasady, nege bulaı sozbalap otyr? Munda seksennen asqan kórshim bar. Jeltoqsan aıynda kirdi, sodan dalaǵa shyqqan joq. Taıaqqa súıenip áreń júredi. Biz de adambyz, aýlaǵa shyǵyp az-kem boı jazyp, bir ýaq taza aýa jutyp, demalǵymyz keledi. Balkonǵa shyqsaq, tereze ashýdan qorqamyz, basymyz aınalady. 8-qabatta egiz balasy bar bir kelinshek bar, eki balasyn qushaqtap alyp, ol da qınalyp kirip, qınalyp shyǵady, – dedi zeınetker.
Atalǵan úıdiń turǵyny Sáýle Baıǵabylova da 2 jasar kishkentaıyn kóterip segizinshi qabatqa kúnine eki-úsh ret túsip-shyǵady.
– Balamdy dalaǵa shyǵaryp, taza aýada serýendep qaıtý men úshin naǵyz azapqa aınaldy. Aldymen oıynshyǵyn, odan keıin balamdy kóterip túsirýge týra keledi. Balam syrqattanyp qalsa, jedel járdem shaqyrtý qıyn. Segizinshi qabatqa kóterilgisi kelmeıdi. Kóterile qalǵan jaǵdaıda da «Lıfti joq ekenin aldyn ala nege eskertpediń» dep ursyp, renish bildiredi. Zeınet jasyndaǵy anam ekeýmiz birge turamyz. Ol kisiniń aıaǵy aýyrady, tómen tússe, kóterile almaı, kóterilse, tómen túse almaı qınalyp júr. Meniń túsinbeıtinim, biz ıpotekalyq nesıemizdi merzimdi ýaqytynan keshiktirmeı 100% tóleımiz. Al memlekettik baǵdarlama aıasynda jasalǵan kelisimshart boıynsha alǵan úıdi 100% paıdalana almaı otyrmyz. Mine, 10 aı boldy, lıfti joq. Qabyrǵadan jańbyr ótip, jertólege sý aǵyp jatyr. Kommýnaldyq tólemderdi tolyq tólep otyrmyz. Gaz, ystyq sý, elektr aqysyn sál keshiktirsek, ajyratamyz, kesip tastaımyz dep qorqytýǵa sheber. Al jumys istemeı turǵan jedelsatyǵa turǵyndardan basqa bas aýyrtyp jatqan eshkim joq, – dedi S.Baıǵabylova.
2019 jyldyń jeltoqsan aıynda paıdalanýǵa berilgen kópqabatty úıge turǵyndar bıyl qańtar aıynan beri kire bastaǵan. Jańa qonystarynda lıfti jumys istemeı turǵanyn aıtqan turǵyndarǵa qala ákimdigi «Aldymen páter ıeleriniń 50%-y qutty ornyna qonyp alsyn, lıftini sodan keıin qosamyz», dep jaýap beredi. Aqpanda turǵyndardyń 80%-y kóship kelip, páterlerine birjola ornalasady. Lıfti sonda da jumys isteı qoımaǵan soń, turǵyndardyń qaıta shaǵymdanýyna týra keledi. Ákimdik bul joly jedelsatyǵa qosalqy bólshek bolmaı turǵanyn, taıaýda Reseıden ákelinetinin aıtyp, turǵyndardyń sabyr saqtap kúte turýyn suraıdy. Osylaısha, páterine aq ter-kók ter bolyp kóterilip júrip aqpandy ótkizgen turǵyndar 25 sáýirde qala ákimi Qaırat Ahmetovtiń atyna jazbasha túrde taǵy bir shaǵym hat joldaıdy. 11 mamyrda ákimniń sol kezdegi orynbasary Andreı Fınkten «Reseıden ákelinetin qosalqy bólshekti kútip otyrmyz. 25 mamyrǵa deıin jetýi tıis» degen jaýap hat keledi. Ýádeli ýaqyt ótip ketse de, jedelsatyny jóndegen jan kórinbegen soń, taǵatsyzdanǵan turǵyndar maýsymnyń 8-inde qala ákimine PIK ókili T.Otarov arqyly hat joldap, 10 maýsymda №9 úıdiń turǵyndary lıftini iske qosý máselesine qatysty 30-dan aspaıtyn adamnyń qatysýymen páter ıeleriniń jıyny ótetinin habarlap, atalǵan jıynǵa qala ákiminiń de qatysýyn talap etedi.
Bul turǵyndar jıynyna ákim kelmeıdi, biraq úıdi turǵyzǵan «Sáýlet» qurylys kompanııasynyń basshysy D.Mıhaılov qatysyp, Reseıden kele jatqan qosalqy bólshek 15 maýsymǵa qaraı Qostanaıda bolatynyn, lıfti 30 maýsymda iske qosylatynyn aıtyp, jınalǵandardy taǵy da ýádege toıdyryp ketedi. Alaıda 30-y kúni Mıhaılov qarasyn da kórsetpeıdi. Ýádege toıǵyzǵan qala ákimdigi men merdiger «Sáýlet» seriktestiginen ábden kúder úzgen turǵyndar endi aımaq basshysyna shyqpaq bolyp, oblys ákimdiginiń apparatyna qońyraý shalyp, Arhımed Muhambetovtiń qabyldaýyna kezekke tirkeýdi ótinedi. Ákimdik mamany A.Sháripova shaǵymdanýshylardyń ákimniń qabyldaýyna jazylýǵa asyqpaı qoıa turýyn surap, «Sáýlet» seriktestigi 30 shildege deıin lıftini qosatynyn aıtyp, ýáde etkenin habarlaıdy. О́kinishke qaraı mamannyń sózi de ótirik bolyp shyqty.
Ashynǵan turǵyndar 6 tamyzda A.Muhambetovke shaǵym hat joldaǵan. Oblys ákimi turǵyndardyń shaǵymyn qala ákimine jiberedi. Qala ákimi ony qurylys bólimine ysyrady. 28 tamyz kúni qurylys bóliminiń basshysy Nurjan Qurmanǵalıev turǵyndarǵa kezekti jaýap hat joldaıdy. Mazmuny «23 tamyzǵa deıin «Sáýlet» seriktestigine sizder turyp jatqan úıdiń jedelsatysyna qajet qosalqy bólshekti taýyp, lıftiniń aqaýyn jónge keltirýdi mindettep, eskertpe hat joldadyq. Sondaı-aq sizderge qurylys bólimi «Sáýlet» seriktestigin ózine tıisti mindetti 5 qyrkúıekke deıin zań kúshimen májbúrli túrde oryndatý týraly talap-aryz daıyndap, qalalyq sotqa jibergeli jatqanyn habarlaımyz», degen.
Biraq «Sáýlet» seriktestigine sottyń da shamasy jetpedi me, áıteýir qyrkúıek kelgenimen, lıfti qozǵalmady. Eriksiz «Maqta qyz» ertegisi keıipkeriniń kebin kıip, taýy shaǵylǵan turǵyndar endi Prezıdentke shaǵym hat joldap, №9 úıde tek jas otbasylar ǵana emes, múmkindigi shekteýli jandar, zeınetkerler, kópbalaly jáne jalǵyz basty analar turatynyn, osyny eskerip, 9 aı boıy áýre-sarsańǵa túsirip, tapjylmaı turǵan lıftiniń iske qosylýyna septigin tıgizýin ótinedi.
Kóp keshikpeı toǵyzynshy úıdiń turǵyndary Qostanaı qalasy ákiminiń orynbasary Rústem Qarkenovtiń ýáde hatyn alady. Ol lıftiniń Qostanaı oblysynyń memlekettik sáýlet-qurylys baqylaý basqarmasynda tirkeýden ótip jatqanyn, odan keıin jedelsatynyń durys jumys isteıtinin tekserý úshin qalalyq tótenshe jaǵdaı basqarmasyna hat jiberiletinin, lıft 1 qarasha kúni ornatylatynyn habarlaǵan eken, biraq ýádeli kúni lıft iske qosylmaı qaldy.
Qostanaı oblysy
