Qazaqstan Respýblıkasy Parlamentiniń Májilisi – zań shyǵarý bıligin júzege asyratyn jáne turaqty negizde áreket etetin respýblıkanyń joǵary ókildi organy Palatalarynyń biri. Májilis depýtattarynyń ókilettik merzimi – bes jyl.
Parlament Májilisi júz jeti depýtattan turady.
Májilistiń toqsan segiz depýtaty jalpyǵa birdeı, teń jáne tóte saılaý quqyǵy negizinde jasyryn daýys berý arqyly partııalyq tizimder boıynsha saılanady.
Májilistiń toǵyz depýtatyn Qazaqstan halqy Assambleıasy saılaıdy.
Qazaqstan Respýblıkasynyń jıyrma bes jasqa tolǵan jáne Qazaqstan aýmaǵynda sońǵy on jylda turaqty turatyn azamaty Parlament Májilisiniń depýtaty bola alady.
Sot is-áreketke qabiletsiz dep tanyǵan, sondaı-aq sot úkimi boıynsha bas bostandyǵynan aıyrý oryndarynda otyrǵan azamattardyń saılanýǵa quqyǵy joq.
Partııalyq tizimder boıynsha saılanatyn Parlament Májilisiniń depýtattyǵyna kandıdattar usyný quqyǵy belgilengen tártippen tirkelgen saıası partııalarǵa, al Qazaqstan halqy Assambleıasy saılaıtyn Májilis depýtattyǵyna kandıdattarǵa qatysty - Assambleıa Keńesine tıesili.
Májilis depýtattyǵyna saılaý úshin adamdardy partııalyq tizimge engizý saıası partııanyń joǵary organy músheleri jalpy sanynyń kópshilik daýsymen júrgiziledi.
Partııalyq tizimde áıelder men jıyrma toǵyz jasqa tolmaǵan adamdardyń sany oǵan engizilgen adamdardyń jalpy sanynyń keminde otyz paıyzyn quraýǵa tıis.
Máslıhattar – tıisti ákimshilik-aýmaqtyq birlik halqynyń erkin bildiretin jáne ony iske asyrý úshin qajetti sharalardy aıqyndaıtyn, sondaı-aq olardyń júzege asyrylýyn baqylaıtyn jergilikti ókildi organdar. Máslıhattar depýtattarynyń ókilettik merzimi – bes jyl.
Máslıhattardyń depýtattary jalpyǵa birdeı, teń, tóte saılaý quqyǵy negizinde jasyryn daýys berý arqyly saılanady.
Qazaqstan Respýblıkasynyń jıyrma jasqa tolǵan azamaty máslıhat depýtaty bolyp saılana alady.
Sot is-áreketke qabiletsiz dep tanyǵan, sondaı-aq sot úkimi boıynsha bas bostandyǵynan aıyrý oryndarynda otyrǵan azamattardyń saılanýǵa quqyǵy joq.
Partııalyq tizimder boıynsha saılanatyn máslıhattar depýtattyǵyna kandıdattar usyný quqyǵy belgilengen tártippen tirkelgen saıası partııalarǵa tıesili.
Máslıhat depýtaty bolyp saılaný úshin adamdardy partııalyq tizimge engizý saıası partııanyń tıisti fılıalynyń nemese ókildiginiń joǵary basshy organy músheleriniń jalpy sanynyń kópshilik daýsymen júrgiziledi.
Partııalyq tizimde áıelder men jıyrma toǵyz jasqa tolmaǵan adamdardyń sany oǵan engizilgen adamdardyń jalpy sanynyń keminde otyz paıyzyn quraýǵa tıis.
