Qazir Mártók, Qarǵaly aýdandarynyń sharýa qojalyqtarynan tikeleı tasylǵan 2 myń 339 tonna kartop, 535 tonna pııaz, 419 tonna sábiz jáne 319 tonna qyryqqabat turaqtandyrý qorynyń qoımasyna salyndy.
Búgin óńirlik turaqtandyrý qoryn qalyptastyrý jónindegi komıssııa músheleri kókónis saqtaý qoımasyna kelip, qysqy azyqtyń sapasyn tekserdi. "Aqtóbe" Áleýmettik-kásipkerlik korporasııasy agroónerkásip kesheni jáne azyq-túlik qaýipsizdigi departamentiniń bas menedjeri Mırambek Anarovtyń aıtýynsha, qorǵa úsh sharýashylyq – «Prıgorodnyı» , «Bolat LTD» jáne «Elaman-2014» JShS-teri kartop, sábiz, pııaz, qyryqqabat jetkizse, sońǵy ekeýi 200 tonnadan kartop tapsyrǵan. Qys boıy erekshe temperatýrada saqtalatyn kókónis jazǵa sheıin molynan jetýi kerek.
«Halyq kóp tutynatyn kókónis turaqty baǵamen qaladaǵy «Tabys» kommýnaldyq bazarynda, shaǵyn bazarlar men «HALYQ SAUDA» áleýmettik dúkenderinde satylady», dedi Mırambek Anarov.
Aıta ketý kerek, bul –oblysta halyq eń kóp tutynatyn azyq-túlik, sonyń ishinde kókónis baǵalarynyń kóterilip ketpeýine jol bermeý úshin jasalyp jatqan qadamdar. Sol úshin de bıylǵy kóktemde jergilikti sharýa qojalyqtarynyń ósirgen ónimderin turaqtandyrý qoryna satyp alý úshin oblystyq bıýdjetten 240 mıllıon teńge bólingen bolatyn.
