Osy kezge deıin áýe kóligi arqyly kelgenderden qaýipti dert tabylǵan joq. Qaýip avtokólikpen ótip jatqandardan týyndap tur. Sonyń ishinde shekara ótkizý beketteri arqyly oblys aýmaǵynan Reseıge qaraı jáne beri ótip jatqan tranzıt aýyr kólikteri sanıtarlyq-epıdemııalyq qyzmet mamandarynyń alańdaýshylyǵyn týǵyzyp otyr. Úsh kún buryn «Jaısań» ótkizý beketinde eki qazaqstandyq pen bir Reseı azamatynyń PTR-test qorytyndysy oń nátıje kórsetip, olar dereý oqshaýlanǵan.
Halyqaralyq júk tasymaldaýshylary oblys aýmaǵynyń birneshe eldi mekenderiniń ústinen ótip, jol boıy kempıngterge, janar-jaǵarmaı quıý beketterine, dúkenderge toqtaıtyny anyq. Qaýipti derttiń aýyldarda taralyp ketpeýi úshin sheteldik júrgizýshilerdiń jol boıyndaǵy servıstik qyzmet kórsetetin nysandar qyzmetkerlerimen baılanysyn boldyrmaýdy baqylaý asa mańyzdy. Qazir negizinen, ózbekstandyq jáne qyrǵyz aýyr júk kólikterin eldi mekenderge kidirmeýin patrýldik polıseıler baqylap, olardy oblys shekarasynan shyǵaryp salyp júr. Degenmen kúnine árli-berli ótip jatatyn myńdaǵan tranzıttik kólikterdiń bárin birdeı baqylaý múmkin emes. Aqtóbe oblysy aýmaǵynda blok-beketter qoıylǵan joq. Al jergilikti dárigerlerdiń aıtýynsha, pnevmonııamen aýrýhanaǵa túsip jatqandar qalada birtindep kóbeıip keledi.
AQTО́BE
