Bıyl astyqty aımaq el kóleminde un óndirýden birinshi orynǵa shyǵyp, ıogýrt, jarma jáne makaron ónimderin shyǵarýdan úshinshi orynǵa taban tirep otyr. Jıynda bıylǵy aýa raıynyń eginge qolaısyz bolǵanyna qaramastan, kúzgi jıyn terinde bitik shyqqan egindi shyǵynsyz jınap, qambaǵa 4,2 mln tonna astyq quıǵan dıqandardyń eren eńbegi dáripteldi. Oraq naýqany nátıjesi boıynsha joǵarǵy kórsetkishke qol jetkizgen dándi aýdandardyń jetistigi jóninde de áńgime qozǵaldy. Máselen, bıyl Sarykól aýdanyna qarasty sharýashylyqtar ár gektar alqaptan – 14,5 sentner, al Fedorov aýdanynyń dıqandary – 13,4, Uzynkól, Qarasý, Qostanaı, Meńdiqara aýdandary 12 sentnerden bıdaı alyp, tabysty eńbektiń ozyq úlgisin kórsetip otyr.
Kók shyqpaı jatyp jer qyrtysyna soqa túsirip, tóskeıge sebilgen árbir dándi ala jazdaı mańdaı terimen sýarǵan kánigi dıqan úshin bıyl bes aılyq beınettiń bási joǵary. Jıyn barysynda tájirıbe men ozyq tehnologııany sátti ushtastyryp, mol ónim alyp, kópten ozyq shyqqan birqatar sharýashylyqtardyń joǵary jetistigi jóninde oblys ákiminiń birinshi orynbasary Ǵaýez Nurmuhambetov te súısine sóz etti.
– Agrotehnologııa jetistikterin jetik ıgergen aýylsharýashylyq kásiporyndary men sharýa qojalyqtary aýa raıyna táýeldilikten arylyp, sońǵy eki jyl boıy jazdyń aptap ystyǵy pen qýańshylyǵyna qaramastan turaqty túrde joǵary ónim alyp keledi. Mysaly, Sarykól aýdanyndaǵy «Sarykól Agro» jaýapkershiligi shekteýli seriktestigi bıylǵy egin orý naýqanynda árbir gektardan 40 sentnerden, Altynsarın aýdanyndaǵy «Aıdala» seriktestigi – 21, Meńdiqara aýdanyndaǵy «Orlan 2004» seriktestigi – 20, osy aýdanǵa qarasty «Olja Arystan» JShS-i 17,6 sentnerden bıdaı alyp otyr, – dedi oblys ákiminiń birinshi orynbasary.
Aımaqtyń egin sharýashylyǵyna qatysty aýyz toltyryp aıtýǵa turarlyq taǵy bir jaqsy jańalyq – bıylǵy bıdaıdyń sapasy joǵary. Ásirese soltústik aýdandarda bıdaı qamyrlylyǵy ótken jyldardyń kórsetkishinen asyp tústi. Bıyl elevatorlarǵa qabyldanǵan bıdaıdyń 79%-y 3-klasqa jatady. Bul bıdaıdyń 60%-ǵa jýyǵynyń qamyrlylyǵy 28% jáne odan joǵary.
Onlaın-jıyndy túıindegen aımaq basshysy Arhımed Muhambetov bıylǵy karatındik shekteýler kóktemgi dán egý naýqanyna da, kúzgi jıyn-terin barysyna da aıtarlyqtaı kedergi keltirgenin tilge tıek etti.
– Aımaqta jappaı shekteý sharalary qabyldanǵanyna qaramastan, jergilikti atqarýshy organdar aýyl sharýashylyǵy salasyna barynsha qoldaý kórsetti. Munyń syrtynda bıyl aýa raıy qolaısyz bolǵanyn ózderińiz jaqsy bilesizder. Biraq sharýashylyqtar joǵary ónim aldy. Biz egin sharýashylyǵy maqsatyndaǵy alqaptardy ártaraptandyrý boıynsha bastalǵan jumysty aldaǵy jyly da jalǵastyramyz. Jyldan-jylǵa maıly daqyldardyń úlesin eseleı túsýimiz kerek. Buǵan qoldaý kórsetetin jańa baǵdarlamalar bar. Osy máselege kóbirek nazar aýdarý qajet, – dedi A.Muhambetov.
Jıyn sońyna qaraı aýylsharýashylyq eńbekkerleri kúnine oraı, oblys ákimi eseli eńbegimen daralanǵan agronomdarǵa, ınjenerlerge, sharýa qojalyqtarynyń basshylaryna gramotalar tapsyrdy. Birqatar dıqannyń omyraýyna tósbelgiler taǵyldy. Dıqan eńbegi dáriptelgen osy taqylettes saltanatty jıyndar oblystyń barlyq aýdandarynda ótti.
Qostanaı oblysy
