Birinshi kezekte ol Qostanaıdaǵy «SQ – Farmasııa» JShS qoımasyna bardy. Atalmysh qoıma Nur-Sultan qalasyndaǵy habtan ákelingen dári-dármek, medısınalyq qurylǵylary men qorǵanysh buıymdaryn aımaqtaǵy emdeý mekemelerine jedel jetkizip otyrady. Munda túrli aýrýlardy stasıonarlyq jáne ambýlatorııalyq emdeýdi qamtamasyz etý barysynda medısınalyq mekemelerden kelip túsken ótinimder boıynsha, sondaı-aq koronavırýstyq ınfeksııany emdeý boıynsha tapsyrystarǵa qyzmet kórsetiledi.
– Ákimdik dári-dármekter, dárigerlerge qajet qorǵanys quraldaryn, sondaı-aq jan-jaqtan kelip jatqan gýmanıtarlyq kómek júkterin qabyldap alýdyń ashyqtyqtyǵyn tolyq qamtamasyz etip otyr. Árbir júk kelgen saıyn baqylaýshy top qurylyp, oǵan qoǵamdyq uıymdar belsendi túrde tartylýda. Pandemııa árbir otandasymyzǵa áser etti. Sondyqtan barmaq basty, kóz qysty jumys bolmaýy tıis. Dári-dármek alaıaqtardyń tabys kózine aınalmaı, tutynýshyǵa jetýi óte mańyzdy», dedi Alık Shpekbaev.
Aıta keteıik, buǵan deıin monıtorıngtik toptar birqatar aýdanda dári-dármek pen qorǵanys quraldarynyń jetkilikti emes ekeni týraly másele qozǵaǵan bolatyn. «SQ – Farmasııanyń» Qostanaıdaǵy fılıalynyń ókilderi buǵan deıin logıstıkada oryn alǵan kemshilikter joıylǵanyn, búginde óńirdiń barlyq aýdandaryna jetkilikti mólsherde dári-dármek jetkizilgenin aıtty.
Jergilikti atqarýshy organ ókilderiniń málimetinshe, koronavırýstyq ınfeksııaǵa, JRVI men pnevmonııaǵa qarsy kúres maqsatyndaǵy keshendi sharalar aıasynda oblystaǵy dárihana jelileri men farmasevtıkalyq fırmalardyń dıstrıbıýtorlaryna 538 mln teńge demeý qarjy bólingen. Agenttik tóraǵasy oblys bıýdjetinen bólingen qarjyǵa satyp alynǵan dárilerdi saýdalaıtyn «Svetnaıa» dárihanalaryna da bas suǵyp, dári-dármekterdiń baǵasymen tanysty.
Qostanaı oblysyna jumys sapary barysynda Sybaılas jemqorlyqqa qarsy is-qımyl agenttiginiń tóraǵasy Alık Shpekbaev oblys ákimi Arhımed Muhambetovpen birge Lısakov qalasynda boldy.
Memlekettik organdar qyzmetiniń azamattardyń qajettiligine beıimdelýine yqpal etý sybaılas jemqorlyqqa qarsy saıasattyń mańyzdy bóliginiń biri ekendigi burynnan aıtylyp keledi. Osy turǵydan alǵanda, ashyqtyq, aıqyndyq jáne eseptilik arqyly memlekettik apparatty transformasııalaý mańyzdy ról atqarady.
Sybaılas jemqorlyqqa qarsy vedomstvo basshysy ákimdikterde «bir tereze» qaǵıdatymen azamattarǵa servıstik jáne kedergisiz qyzmet kórsetýge arnalǵan «Kómek alańy» front-keńseleriniń jumysymen tanysty. Kez kelgen azamat kabınetterdiń tabaldyryǵynda kezek kútpeı-aq júgine alady. Ákimdikterdiń qyzmetkerleri turǵyn úı-kommýnaldyq sharýashylyq, jer qatynastary, áleýmettik qorǵaý, aýyl sharýashylyǵy jáne basqa da salalar boıynsha keńes beredi. Elektrondy qyzmetterdi alý úshin ózine ózi qyzmet kórsetý buryshtary da qarastyrylǵan.
«Turmystyq sybaılas jemqorlyq azamattar úshin qolaıly jaǵdaı jasalmaǵan jerde taralady. Azamattardyń qajetti zańdy kómek alý úshin memlekettik qyzmetshige syılyq berýine jol joq. Sheneýnikter máseleni sheshý joldaryn taryltyp, keńselerde otyrǵan qyzmetkerlerdiń mańyzdylyǵyn jasandy túrde asyra kótermeýi tıis. Árbir memlekettik qyzmetshiniń jumys barysynda ustanatyn qaǵıdalary – adaldyq, tártip, qoljetimdilik, ashyqtyq pen ádildik. Ákimdikterdiń yńǵaıly front-keńselerimen megapolısterdiń ǵana emes, shaǵyn kentterdiń turǵyndary úshin de qamtamasyz etý qajet», dep atap ótti Alık Shpekbaev.
Rýdnyı men Lısakov qalalarynda «Kómek alańy» ashylǵan sátten bastap olarǵa 12 myńnan astam turǵyn júgingen. Taıaý arada oblysta halyq tyǵyz ornalasqan barlyq aýyl ákimdikteri osyndaı jumys nysanyna kóshedi.
Agenttik tóraǵasy jergilikti memlekettik kirister organdary qyzmetkerlerimen kezdesip, azamattar men kásipkerlerge qyzmet kórsetý zaldarynyń jumysymen tanysty. Sonymen qatar, Lısakov qalasynda Alık Shpekbaev pen Arhımed Muhambetov kúrdeli jaǵdaılardy sheshýge kómek kórsetý týraly ótinish bildirgen azamattardy qabyldady.
Qostanaı oblysy
