9 qarashaǵa qaraǵan túni aımaq basshysy Arhımed Muhambetov pen oblystyq polısııa departamentiniń bastyǵy Beket Aımaǵambetov Qostanaı qalasynyń mańyndaǵy 3 sanıtarlyq bekette bolyp, kezekshilikke shyqqan qyzmetkerlerdiń jumys jaǵdaıymen tanysty.
– Sanıtarlyq beketterde 24 medısına qyzmetkeri, 94 polıseı jáne 13 avtopatrýl kezekshilik etip jatyr. Barlyǵy qajetti qorǵanys quraldarymen jabdyqtalǵan. Beket qyzmetkerleri 12 saǵat saıyn aýysyp otyrady. Qalaǵa kirip-shyǵyp jatqan jolaýshylarǵa muqııat baqylaý júrgizýdi, sondaı-aq kezekshiliktegi barlyq qyzmetkerlerdi kerek-jaraqpen qamtamasyz etýdi tapsyrdym, – dedi oblys ákimi.
Beket Aımaǵambetov polısııa men monıtorıng toptyń músheleri birlesip, karantın tártibin buzýshylardy tezge salý sharalaryn kúsheıtip jatqanyn aıtty.
– Keıingi kúnniń ishinde ǵana karantın rejimin buzǵan 232 adam anyqtalyp otyr. Aldyn ala aıtylǵan eskertýlerge qaramastan, oblys turǵyndary týǵan kún, úılený toıy, as berý sııaqty jıyndardy jasyryn ótkizýdi doǵarar emes. Mundaı jıyndarǵa 50-den 200-ge deıin adam jınalyp, sanıtarlyq normalar óreskel buzylyp, indettiń etek ala túsýine sebep bolyp jatyr, – dedi departament bastyǵy.
Sanıtarlyq talaptardyń saqtalýyna qamtamasyz etý maqsatynda kúndelikti reıd sharalaryna shyǵyp otyratyn monıtorıng tobynyń tekseris nátıjelerine júginsek, 7 qarashada oblys ortalyǵyndaǵy «Evrazııa» meıramhanasynda 100-ge jýyq adam qatysqan úılený toıy, «Dııar» dámhanasynda 35 adam bas qosqan qudalyq, birneshe jaldamaly kottedjderde 30-dan asa adam jınalǵan týǵan kún, qyz uzatý ótken. Sondaı-aq «Tandyr» dámhanasynda 30-dan asa adam otbasylyq merekege bas qosyp, «Relaks», «Led» degen saýnalardyń tyıym salynǵan ýaqyt ishinde jumys istegeni anyqtalyp otyr.
Saýda oryndarynda sanıtarlyq talapqa salǵyrt qaraıtyn satýshylardyń kóptigi de alańdatady. Máselen, bir kúnniń ishinde taýardy tarazy basynan qolǵapsyz, maskasyz jibergen 70-ten asa satýshy anyqtaldy. Monıtorıng toptyń málimetinshe, 7 qarasha kúni tek Qarasý men Uzynkól aýdandarynda ǵana birde-bir sanıtarlyq talaptardyń buzylý faktisi tirkelmegen.
Qostanaı oblysy
