Máselen, jaqynda Almaty telearnasyndaǵy tikeleı efırde Medeý aýdanynyń turǵyny qoıyp jatqan bir saýaldy qulaǵamyz shalyp qalǵan-dy. Saýsaqpen sanarlyq kúnde qala ákimi Baqytjan Saǵyntaev aýdan turǵyndary aryzdanǵan sol aýmaqta júrgenin kórip qýandyq. Jáne keshke qaraı Medeý aýdanynyń máselesi qalaı sheshilip jatqany týraly naqty málimdeme de taratty.
Cóıtsek taý bókterindegi turǵyndar qarǵyn sý men kóshkinnen qorqyp buǵan deıin de ákimnen birneshe ret kómek suraǵan eken. Endi qarajat bólinip, betkeılerdi nyǵaıtýǵa múmkindik beretin gabıon qurylymdarynyń qurylysy men jańbyr sýlaryn aǵyzatyn aryqtar jasalyp jatyr.
Máselen, «Dýman» yqsham aýdanynda 18,5 shaqyrymdyq sýmen jabdyqtaý jáne 26 shaqyrym sý burý jelileriniń qurylysy aıaqtalyp keledi. Qoǵamdyq kólik baǵyttary ótetin Han Táńiri, Qazyǵurt, Qarqaraly, Aqmeshit, Býrabaı, Bolashaq kóshelerinde 3,7 shaqyrymdyq jol kúrdeli jóndeýden ótip jatyr. Sol kúni qala ákimi óziniń áleýmettik paraqshasynda «Kelesi jyly qalǵan 53 kósheniń joldaryn jóndeımiz. Sondaı-aq «Muztaý» shaǵyn aýdanynda ınjenerlik jelilerdi salýǵa baılanysty qazylǵan jol jabynyn tez arada qalpyna keltirýdi tapsyrdym. Býtakovka shatqalyna aparatyn joldyń uzyndyǵy – 4,6 shaqyrym. Bul jol týrıstik baǵyttardyń qataryna kiredi», dep jazdy.
Taǵy bir máseleniń sheshimi jaýyn-shashyn saldarynan kóshkinniń júrýi yqtımal «Kompot» turǵyn alaby halqynyń tileýin qabyl etti. Kókkınakı kóshesindegi qaýipti aımaqta 42 úı bolǵan. Bıyl jyl sońyna deıin jalpy uzyndyǵy 350 shaqyrym bolatyn betkeılerdi nyǵaıtý josparlanǵan. Almalyq kóshesi boıyndaǵy eńisti nyǵaıtyp, aryq júıesin ornatý jumystary aıaqtaldy, mundaǵy qaýipti aımaqta 60 úı bar bolatyn.
Sondyqtan qazirgi kúnderi «Qala ákiminiń turǵyndarmen ótken kezdesýinde men osy máseleni aıttym», «Ákim bizdiń ótinishimizdi eskerýsiz qaldyrmady», «Sport alańdaryn ornatty, balalar stadıonyn ashty» deıtin almatylyqtar az emes. Belsendi qala turǵyndary áleýmettik ınfraqurylym máseleleri qalaı sheshimin taýyp jatqany týraly áleýmettik jelilerde pikirlerin jazyp jatady.
Máselen, osy joly Almatynyń ákimi Baqytjan Saǵyntaev Áýezov aýdanyndaǵy jumys sapary barysynda aýdan turǵyndarynyń ótinishteri negizinde júzege asyrylǵan áleýmettik jobalarmen tanysty. Almatynyń Áýezov aýdanynda bıyl áleýmettik turǵyn úı-kommýnaldyq sharýashylyǵyn damytý men aýmaqtardy abattandyrýǵa baǵyttalǵan 39 joba júzege asyryldy.
Osy saparynda «Dostyq» shaǵyn aýdanynyń Aqsaqaldar keńesiniń tóraǵasy Álı Ahmetov ınjenerlik jelilerdi jańǵyrtý jáne jol jaǵdaıyn jaqsartý boıynsha jasalǵan jumystardy atap ótti. «Bizdiń aýdanda osynyń aldynda káriz júıesi bolmady, sý qubyrlary jumysqa jaramsyz, keı jerlerde jaryq ta joq edi. Sońǵy kezderi osy baǵyttarda aýqymdy jumys atqarylyp jatyr. Aýdanymyzda sport alańdaryn ornatty, endi bizde fýtbol, voleıbol jáne basketbol alańdary bar. Bizdi biraz ýaqyttan beri joldardyń sapasy alańdatyp kelgen, biraq endi bul is te qolǵa alyndy. Qazir jolymyzdy jóndep jatyr. Endi bári joǵary deńgeıde bolady dep senemiz», deıdi ol.
Sol sııaqty, aýdannyń taǵy bir turǵyny Dilmurat Musaev buǵan deıin stadıonnyń orny bos jatqanyn jáne turǵyndardyń sol aýmaqty óz kúshimen abattandyrmaq bolǵanyn aıtty. Biraq ol úshin kóp kúsh pen qarajat qajet bolǵan. Endi qala ákiminiń tikeleı aralsýymen iske asqan tirlik úshin ákimdikke alǵysyn bildirip, barlyq jumystyń turǵyndardyń ótinishi boıynsha olardyń tilekterin eskere otyryp jasalǵanyn atap ótti.
Zeınetker Gúldarııa Qasteeva aýdanda qarttar úshin demalys oryndary paıda bolǵanyna qýanady.
«Biz bul aýdanda 30 jyldan asa ýaqyt turamyz. Buryn balalar úshin úlken aýmaq bolǵan, biraq ýaqyt óte kele ol joq boldy. Biraq búgingi tańda bizde balalarǵa arnalǵan alańdar, sport alańdary ornatyldy, trotýarlar jóndeldi, jol jıekteri aýystyryldy. Bizdi de umytqan joq, aýdannyń qart turǵyndary qoldanatyn trenajerler ornatyldy. Mine, qazir men trenajerlerge barý úshin shyqtym. Biz aýdan turǵyndary, atqarylǵan jumystar úshin óte rızamyz», deıdi qarııa.
ALMATY
