Gazǵa qosylǵan alǵashqy úılerdiń turǵyndary: "Bizge bir túnde 20-ǵa jýyq kórshimiz kelip, qarap, qyzyǵýshylyq tanytty. Áýelde kómirden gazǵa aýysýǵa bolatyndyǵyna senimsizdik boldy. Qazir bári óte qýanyshty. Týystarymyz jazyp, qońyraý shalyp, gazǵa qosylǵanymyzben quttyqtap jatyr", deıdi olar.
"Gaz tartyldy. Bul uzaq ýaqyt boıǵy tynymsyz eńbek nátıjesi. Gazǵa 11 qarashada qosyldyq. Bizdiń aýdandaǵy chatta turǵyndar qazir bizden keıingi kóptegen adamdar naqty mysaldy kórip, kómirden gazǵa kóshýge bel býǵanyn jazady. Bıyl gaz tartylatynyna senbeıtinder de boldy", deıdi Indýstrıalnyı TA turǵyny Dáýlet Bekbosynov.
"Keshe gazǵa qosyldyq. Elbasy elordaǵa gaz jetkiziletinin aıtqan bolatyn. Biz sol jumystyń nátıjesin kórip otyrmyz. О́te rızamyz", deıdi qala turǵyny Zeınolla Ábdirov.
Agroqalashyq turǵyn alabynyń bir bóligi, Promyshlennyı, Kóktal-2 turǵyn alaptarynda da qurylys-montaj jumystary aıaqtalyp, qysymdy synaý júrip jatyr. Qosylý ústimizdegi jyldyń jeltoqsan aıyna deıin josparlanǵan. Jyl sońyna deıin Kóktal-1 turǵyndary da gazǵa qosyla alady.
"Elordany gazdandyrý – Elbasynyń tarıhı jobasy. Gazdandyrý qorshaǵan ortany jaqsartýǵa ǵana emes, sonymen qatar jeke sektor turǵyndarynyń ómir súrý jaǵdaılaryn aıtarlyqtaı jeńildetýge múmkindik beredi. Kómirdi qaıda saqtaý keregin, onyń sapasyn ýaıymdaýdyń qajeti joq. Adamdar kómirqyshqyl gazymen ýlanǵan jaǵdaılar boldy. Osy máselelerdiń barlyǵy sheshimin tabady. Gazdandyrý prosesi birneshe satyda ótedi jáne barlyq turǵyn aýdandar kezeń-kezeńimen qosylady. Osy jylytý maýsymynda JEO-1 jáne JEO-2 birqatar qazandyqtary da gazǵa aýystyryldy", dedi elorda ákimi Altaı Kólginov.
Ishki gazben jabdyqtaý jelilerin ornatqan turǵyndardy qosý úshin Respýblıka dańǵyly, 24 meken-jaıy boıynsha "Parasat" bıznes ortalyǵy "Qaztransgaz Aımaq" AQ keńsesine habarlasý qajet. Bul uıym ishki gazben jabdyqtaý jelileriniń qaýipsizdigi men tikeleı qosylýyn tekserýmen aınalysady, ári qaraıǵy jumysyna da jaýap beredi.
