«Jańa tolqyn» jaǵdaıynda 5 500-ge jýyq kadr rezervte tur
Atalǵan baǵytta atqarylyp jatqan jumystar týraly kezekti onlaın-brıfıngte Joǵary medısınalyq kolledjdiń dırektory Svetlana Sultanǵazıeva aıtyp berdi. «Dári-dármekpen der kezinde qamtamasyz etý, klınıkalardyń materıaldyq-tehnıkalyq jabdyqtalýy, ınfeksııalyq tósektik oryndardy ulǵaıtý syndy áleýmettik-ekonomıkalyq máselelerden basqa densaýlyq saqtaý uıymdaryn medısına kadrlarymen qamtamasyz etýge erekshe kóńil bólindi», dedi ol.
Medısınalyq kadrlarmen qamtamasyz etýdi taldaý barysynda 2020 jylǵy 1 tamyzdaǵy jaǵdaı boıynsha COVID-19 aýrýyn emdeýge 27 Densaýlyq saqtaý uıymy jumyldyrylyp, 6 200-ge jýyq tósektik oryn ornalastyrylǵany anyqtaldy. Sol kezde ınfeksııalyq stasıonarlarda
4 035 qyzmetker eńbek etti.
Epıdemııalyq jaǵdaı turaqtala kele, kópsalaly klınıkalar qalypty rejimge kóshkeni belgili. Koronavırýs ınfeksııasy bar juqpaly klınıkalarda 100-den asa naýqas bar, 400-ge jýyq dáriger jáne meıirger, kishi medısınalyq personaldar shtattyq rejimde jumysyn jalǵastyryp otyr.
Qazir Almaty qalasynda qoǵamdyq densaýlyq basqarmasyna qarasty 74 uıym, 20 respýblıkalyq uıym jáne 93 jekemenshik nysanyndaǵy uıym jumys isteıdi. Bul uıymdarda 38 myńnan asa qyzmetker bar.
«Jańa tolqyn» jaǵdaıynda 5 500-ge jýyq medısınalyq kadr rezervte tur. Medısınalyq joǵary oqý oryndarynyń oqytýshylary, rezıdentteri men dáriger ınternderinen rezerv qalyptastyryldy, olardyń sany 450-ge jýyq.
Dárigerlerdiń biliktiligin kóterýge qarajat bólindi
Almatyda COVID-19 aýrýyn dıagnostıkalaý men emdeý taqyryptary dáriger daıarlaýdyń basym baǵyttaryna aınalyp otyr.
«Bıyl KVI dıagnostıkasy jáne emdeý, jańa ınfeksııalyq klınıkalarda jumys isteý úshin medısına qyzmetkerlerin daıarlaýǵa basa kóńil bólindi. Osy ózekti taqyrypqa sheteldik (Izraıl, Germanııa, Reseı, Ispanııa, Anglııa, Koreıa jáne t.b.) jáne otandyq mamandardy tarta otyryp, biliktilikti arttyrýdyń 40-tan asa sıkli ótkizildi. Koronavırýs ınfeksııasy taqyryby boıynsha tájirıbelik densaýlyq saqtaýdyń 3 myńnan asa qyzmetkeri bilimin jetildirdi. Basqa sıkldarda 4,5 myńǵa jýyq maman oqytyldy», deıdi Joǵary medısınalyq kolledjdiń dırektory.
S.Sultanǵazıvanyń aıtýynsha, jyldan jylǵa dárigerler men orta medısına qyzmetkerlerin dıplomnan keıingi daıarlaýǵa jergilikti bıýdjetten qarjylandyrý ósip keledi. О́tken jyldarmen salystyrǵanda 2020 jyly Almaty qalasynyń medısına qyzmetkerleriniń biliktiligin arttyrýǵa jergilikti bıýdjetten 60%-dan asa qarjy bólingen.
«2020-2021 oqý jyldarynda bizdiń kolledjde oqý úshin 325 grant bólindi, al aldyńǵy jyldary granttar sany 225-ten aspaǵan. Munyń bári Almaty qalasy ákimdiginiń jergilikti atqarýshy organynyń tájirıbelik densaýlyq saqtaý problemalaryna jiti nazar aýdaratynyn bildiredi», deıdi spıker.
Keler jyly 4 100-den asa kolledj stýdenti oqýyn aıaqtaıdy
Amandyq bolsa, 2020-2021 jyldary medısınalyq kolledjderdiń 7,5 myńnan asa túlegi meıirgerler «áskerin» tolyqtyrady. Búgingi tańda Almaty qalasynda bakalavrlardy, ınternderdi, rezıdentter men doktoranttardy daıyndaýmen aınalysatyn iri joǵary oqý oryndarynan bólek, ortasha medısınalyq qyzmetkerlerdi daıyndaýmen 10-nan asa medısınalyq kolledj aınalysady. Bul oqý oryndarynda 14 myńnan asa stýdent bilim alýda (bul bilim alýshylardyń jalpy kontıngentiniń sany), onyń 10%-ǵa jýyǵy granttyq negizde oqıdy. Oqytý «Emdeý isi», «Meıirbıke isi», «Zerthanalyq dıagnostıka, gıgıena jáne epıdemıologııa», «Stomatologııa», «Farmasııa» jáne basqa da mamandyqtar boıynsha júrgiziledi.
«2020 jyly medısınalyq kolledjderde oqýyn aıaqtaǵan 3 628 túlek dıplom aldy, atap aıtqanda, bizdiń kolledjden 364 maman bitirdi. Búgingi tańda osy jylǵy túlekter arasynda jumysqa ornalasý paıyzy joǵary jáne 93%-ǵa deıin jetedi, bul bizdiń stýdentterimizdiń qajettiligin jáne bilim berýdiń tıisti sapasyn kórsetedi», dep atap ótti S.Sultanǵazıeva.
2021 jyly kolledjderdiń 4 100-den astam stýdenti oqýyn aıaqtaıdy, olar Almaty qalasy men óńirlerdiń tájirıbelik densaýlyq saqtaý salasyndaǵy qatarlaryn tolyqtyrady.
О́tken jyldan bastap medısınalyq uıymdardyń suranystaryna sáıkes, kadrlar daıarlaýǵa baǵyttalǵan dýaldy bilim berý engizildi, ıaǵnı bul – oqý ornynda oqytýdy tájirıbelik qyzmetpen úılestirý, bilim alýshy úshin jeke baǵdarlama jasaý. Sabaqtardyń teorııalyq bóligi 30%-dan aspaıdy, stýdentter kóp ýaqyt tájirıbemen aınalysady, ári qaraı sol uıymda jumys isteıdi.
Jalpy, Almatyda medısına kadrlaryn daıarlaý júıesi jolǵa qoıylyp, osy baǵyttaǵy jumystar jalǵasyn taýyp jatyr.
ALMATY
